Read Talaud WATTI'U MANGA RASUL 27 Bible Online

WATTI'U MANGA RASUL 27 - Talaud bible

WATTI'U MANGA RASUL 27

¹Napawe naṛṛawesse manungku i yami inaite massenggota watukku Italia, i Paulus wuṛṛu manga pira taumata apan tataṛṛanganna waine tinantilla si Yulius, perwiran tantaran Roma apan isassago lai “Tantaran Kaisar”.

²I yami sinuma'ete su apalla apan nirumanta wuassu Adramitium, wua'udde sinuma'ete apalla udde apan nasaddiate massenggota watukku manga tatul᷊ianna su leta'u Asia. I Aristarkhus, sangkatou taumatan Makedonia apan nirumanta wuassu Tesalonika nassenggotte lai suadio'a ringanni yami.

³Tiṛṛabbine i yami na'omate su Sidon. I Paulus papadul᷊iananni Yulius ringannu mapia. I tou niwala mattembo manga hawene tadea'u i mangitou wotongnge mangonggolu sarannapa apan pappandumanne.

⁴Wua'isudde i yami nanassukku pasasenggotti yami. Ana waugu uasomakka anginna, i yami nassenggotta rudurukka apannu taṛṛanusan Siprus apan tawe aṛṛinoannu anginna.

⁵Wua'udde i yami namarete tahal᷊oangnga apan uasaruanna Kilikia wuṛṛu Pamfilia see na'omate su Mira su wanua Likia.

⁶Isudde perwira udde naasomba sambau apalla wuassu Aleksandria apan inai watukku Italia. Ne i yami nangingkatte su apalla udde.

⁷Manga pira allo al᷊annune i yami massenggota tumanite mal᷊iwue atonna, wuṛṛu ringannu masahadda atonna panginsueanne i yami na'omate araune sara soan Knidus. Wua'udde ana waugu hatin banua ta'e lal᷊eo, i yami tawe nanassu pasasenggotti ami su mona paarorone. Ne i yami nassenggotte watukku timukka su taṛṛanusan Kreta su mabbi tongokku Salmone tadea'u i yami tawe aṛṛinoannu anginna.

⁸Ringannu nallome i yami nassenggotta rudurukka apannu taṛṛanusa udde, wuṛṛu panginsueanne i yami na'omate su sambau tampa aranne Tatul᷊ianna Maṛṛamaga tawe marau wuassu soan Lasea.

⁹Su tempo udde Allo Wahewan Paddaramen taumatan Yahudi nal᷊iute. Manambo tempo naholo'a si yami, na'oman sara tate tempone lai yami massenggota lenakka. Ana waugu udde i Paulus nanantiro arendi si mangitou,

¹⁰“Manga tuṛṛangnga, tumuṛṛuttu adapa'u tumanite ma'asilaka amungkangngu i ite manassukku amatanni ite. I ite sarun maasomba asasilaka wal᷊ine tumba'u luranni ite wuṛṛu apalla sasa'eanni ite, arawe niawang kite lai wotongnge mawul᷊i.”

¹¹Arawe piaṛṛa'u tantara udde tumanite mangngimanna mangangul᷊inna wuṛṛu apitennu apalla wuassu mangngimanna manga wisaram Paulus.

¹²Tatul᷊ianna isudde tumaniten dal᷊eo su manga apalla apan mabal᷊ango su tempo masunge. Ana waugu udde anamboanne mammanarang kapalla mappulute massenggota apia manantangngu tatul᷊ianna udde, ana waugu i mangitou ma'apulu maddea'a ma'omate su Feniks wuṛṛu matana'a poiaroddi al᷊annune napawe tempon runia masunge nal᷊iudde. Feniks eteudde tatul᷊ianna su Kreta apan uasaruanna anginna taṛṛanganna wuṛṛu anginna pal᷊onna.

¹³Su tempo udde anginna timukka tuttiuppe masi'ome. Ne mamamanarang kapalla maṛṛangngo manungku i mangitou wotongngete massenggota apia. Ne i mangitou nabatunte wal᷊ango see nassenggotte rudurukka apannu taṛṛanusan Kreta.

¹⁴Arawe tawe nal᷊annu wua'udde, anginna ma'ikkatta tinumiuppa — eteudde anginna apan isassago lawassiitta — tinumiuppa wuassu ammaranne,

¹⁵wuṛṛu namappa'u apalli yami. Ana waugu apalli yami tawe maapasenggota ana waugu massomakka anginna, ne i yami nangillol᷊ote wuṛṛu namalateng kapalla ia'elekku anginna.

¹⁶I yami nial᷊indumanna adio'a, su tempo sinumabbi samba'an timukku taṛṛanusan Kauda apan adio'a udde. Isudde ringannu nallome lai yami mannaṛṛangnga pel᷊ong apalli yami.

¹⁷Napawe pelo udde nal᷊ureante su apalla apia, apalla udde ete nitohassa niwa'isannu tal᷊i nipamal᷊iwutta apalla udde. Ana waugu matta'utta isiladde su ranassu annen Sirtis apan mawawo, senggota niol᷊ote see apalla niwalate iappaapidda suanginna.

¹⁸Anginna sidutu mandi'uṛṛu, na'oman sara tiṛṛabbine lurannu apalla iradammete su tahal᷊oangnga.

¹⁹Allo manansunna lai mamanaran apalla udde nandammen al᷊awo'u lurannu apalla su tahal᷊oangnga ringannu lima mangitou sassane.

²⁰Mal᷊annu i yami tawe naasilo matannallo wuṛṛu anumpitanna, wuṛṛu anginna mangke sidutu tuttiuppa. Panginsueanne i yami inawul᷊ianu antimma mabbiakka.

²¹Manga pira allo al᷊annune manga taumata tawe umanna. Ne i Paulus inaite dirumarisikka su wallatti mangitou see nabbisara, “Manga tuṛṛangnga! Amungkangngu yamiu nadaringikka tantiro'u wuṛṛu i ite tawe nassenggotta wuassu Kreta, i ite tawe niahohaṛṛannu sarannapa wuṛṛu narugi ereindi.

²²Arawe orassa indi lai ya'u madorongnga tadea'u naungngi yamiu paahewalla. Tawe saran sangkatou wuassu manga tuṛṛangnga apan uasa'e apalla indi mate; i ite tumba'u awul᷊iannu apalla indi.

²³Ana waugu na'allawanna mala'ekattu Ruata apan sassubbangku, eteudde Ruata apan uatahuanna si ya'u nirumanta ringangku.

²⁴Mala'ekatta udde nabbisara, ‘Arie pa'ata'utta, Paulus! Ana waugu i'o sarun sumaruanna si Kaisar. Wuṛṛu ana waugu wuassu apapia naungngu Ruata si'o, anambon taumata apan uasa'e apalla suadio'a ringannu sarun masal᷊amatta ana waugu i'o lai isudde.’

²⁵Ana waugu udde manga tuṛṛangnga, ṛinone manga tuṛṛangnga pia antimma! Ana waugu i ya'u mangngimanna Ruata manungku sarangkanambone sarun matipussa ere niwal᷊on Tou si ya'u.

²⁶Arawe i ite sarun irangkalle su sambau apannu taṛṛanusa.”

²⁷Su ṛabbi appul᷊one appatta, i yami tantal᷊anna ual᷊allatto su Tahal᷊oangngu Adria. Iraṛṛangngo ṛabbi mattangnga mammanaran apalla naapendamma apalla maraniten ammaranne.

²⁸Nariaddi i mangitou nangul᷊ukku tal᷊i aiitannu watu ipanguukka alal᷊ummu tahal᷊oangnga. Inauuṛṛanna tampa udde alal᷊umme maranin appatu pul᷊o su meteṛṛene. Tawe nal᷊annu wua'udde i mangitou nanguukka apia, see niauuṛanna tahal᷊oangnga isudde tumba'u tallum pul᷊o su meteṛṛene.

²⁹I mangitou matta'uttu apalla isiladde su watun sahatta ne i mangitou namontollu wal᷊ango appata su petone, wuṛṛu uaantimma amungkangngu wotongnge paal᷊ihakke maallo.

³⁰Mal᷊anna-l᷊annaba manga mammanarang apalla ma'annamma tumal᷊angnga manantangngu apalla. I mangitou nanossokku pelo wuṛṛu mangngawusu manungku i mangitou manossokku wal᷊ango wuassu monang apalla.

³¹Arawe i Paulus nabal᷊o su perwiran tantara wuṛṛu manga tantara su apalla udde, “Amungkangngu mammanarang apalla indi tawe matana'a su apalla, manga tuṛṛangnga sarangkanambone tawe masal᷊amatta.”

³²Ana waugu udde manga tantara naṛṛassatta tal᷊im pelo udde na'oman sara pelo udde nielekke.

³³Napawe maraniten allo, i Paulus nandolokki mangitou sarangkanambone niapaanna. I Paulus nabbisara, “Mapul᷊ote appata su allone manga tuṛṛangnga sarangkanambone uaraṛṛaddo ringannu atata'utta, wuṛṛu tawe umanna sarang kadio'a.

³⁴I ya'u madorongnga tadea'u i yamiu umanna adio'a. Udde mapia si yamiu tadea'u i yamiu matohassa apia. Ana waugu tuṛṛangnga sarangkanambone sarun masal᷊amatta ma'oma su ammaranne ringannu tawe auranganne.”

³⁵Wua'nabbisara aroddi i Paulus nanganu roti see naadiangkamanna su Ruata su saruanni mangitou sarangkanambone. Wua'udde i tou nattahia roti udde see niumante.

³⁶Ne i mangitou sarangkanambone natohasse apia, wuṛṛu inumante su sampunna apia.

³⁷Sulal᷊ummu apalla udde lal᷊oṛṛone sarangkanambone rua ṛasutta pitum pul᷊o annuma su atoune.

³⁸Napawe suete niumanna i mangitou namontollu luranna manga gandumma su tahal᷊oangnga tadea'u apalla maṛṛanna.

³⁹Napawe allote, mammamanaranna apalla naasilote ammaranne, arawe i mangitou wagga ammarannu apa udde. I mangitou naasilo sambau tongokke ringannu apanne. Nariaddi i mangitou mappandumma amungkangngu wotongnge i mangitou mabal᷊ango isudde.

⁴⁰Ne manga tal᷊im bal᷊ango niṛṛassatta see manga wal᷊ango udde niwalate nilumakkuba su tahal᷊oangnga. Naṛṛindo'u udde lai i mangitou namu'a manga tal᷊i apan ua'iitta a'ul᷊inna. Wua'udde i mangitou nanduittu senggota su monang apalla tadea'u anginna mangapiddu apalla udde watukku ammaranne.

⁴¹Arawe apalla udde nattu'a su ranassa. Monane nisiladde wuṛṛu tate umal᷊ore, arawe wageangngu petone naṛṛimunsa'a nirapannu lua'a wahewalla.

⁴²Manga tantara su apalla udde pia pandumma mamate anambon taumatan ṛuumanna, ana waugu i mangitou matta'utta aṛṛengenne piaddu umalangnga watukku ammaranne see tumal᷊angnga.

⁴³Arawe perwiran tantara udde naningaddu pandumanni mangitou udde ana waugu i tou ma'apulu manal᷊amatta si Paulus. I tou nandolokku anambon taumata apan masingkatta umalangnga tumumpa rorone wuṛṛu umalangnga watukku apanne;

⁴⁴wuṛṛu ingana'a waine manantuṛṛutta ringannu uaagassa manga pappala ara'e pesangngu apalla udde. Ringannu lal᷊anne aroddi, yami na'omate su ammaranne ringannu sal᷊amatta.