Read Talaud WATTI'U MANGA RASUL 28 Bible Online

WATTI'U MANGA RASUL 28 - Talaud bible

WATTI'U MANGA RASUL 28

¹Napawe na'omate su ammaranne ringannu sal᷊amatta, i yami naasingkate manungku taṛṛanusa udde aranne Malta.

²Tumana'u taṛṛanusa udde masaṛṛionto'a atonna si yami. I mangitou nanal᷊oho si yami sarangkanambone ringannu mapia wuṛṛu nakkunuttu putungnga hunang kami ana waugu mangnguṛṛintingke wuṛṛu runia lai masunge.

³I Paulus nangammullu alu, see nironsolla su putungnga. Tantal᷊anna i tou mandonsolu putungnga, atoanna sambua sinumabangnga, ana waugu naapendamma sal᷊ihangngu putungnga udde, see nangi'i limam Paulus.

⁴Napawe tumana'u taṛṛanusa udde naasilo atoanna udde ua'ele su ta'iakki Paulus, i mangitou uahahatto sangkatou ringannu waine, “Taumata indi asinungka taṛṛa pate, ana waugu salaiwe i tou nal᷊iute wuassu papate su tahal᷊oangnga, Mongannu Atatul᷊idda tawe mamalan tou wiakka.”

⁵Arawe i Paulus namappa'u atoanna udde su putungnga ringannu tawe naapendamma taddu'a sarang kadio'a.

⁶I mangitou massunna manungku tate mal᷊annu lai ta'iakki Paulus humanne ara'e aṛṛengenne i tou mate. Arawe napawe naṛṛado allannune tawedu nariaddi si tou, ṛingiṛṛanni mangitou nawal᷊u see i mangitou nabbisara manungku i Paulus sangkatou monganna.

⁷Tawe marau wuassu tampa udde pia leta'a pussa'am Publius, tembonanne atanggaṛṛanne su taṛṛanusa udde. Ringannu al᷊al᷊uassu naungnge i tou nanal᷊oho si yami maola'a rahone tallu allo al᷊annune.

⁸Tempo udde iamangnge marada'a, masunge wuṛṛu ma'uru. Paulus inaite na'ellega timmade marada'a udde, see inumal᷊iomanna wuṛṛu namita si tou na'oman sara i tou napia.

⁹Ana waugu inolaanna udde, anambon taumata apan marada'a su taṛṛanusa nirumanta ringanni Paulus, see i mangitou niapaapiate.

¹⁰Manambo aonggolli mangitou si yami, wuṛṛu napawe i yami inaite nassenggotta apia, i mangitou nanguntudu wal᷊unni yami su apalla.

¹¹Napawe tallute wul᷊anna poiaroddi yami nassenggotte wuassu wanua taṛṛanusa udde wuṛṛu sinuma'ete apalla wuassu Aleksandria apan uawal᷊ango su taṛṛanusa udde su tempon runia masunge. Apalla udde uapaattu waneṛṛa “Monganna Ṛindua Kastor wuṛṛu Poluks.”

¹²I yami nabbal᷊ango su soa Sirakusa wuṛṛu natana'a isudde tallu allo al᷊annune.

¹³Wua'isudde i yami nassenggotte apia rudurukka apanne na'omate su soan Regium. Tiṛṛabbine anginna mannattake tuttiuppa wuassu timukka, na'oman sara tumba'u sulal᷊ummu rua allo i yami na'omate su soam Putioli.

¹⁴Isudde i yami nassomban sire pira taumata apan mangngimanna Mawu Yesus, wuṛṛu ana waugu aahe mangitou i yami natana'a ringanni mangitou sangkamisa al᷊annune. See i yami nassenggotte watukku Roma.

¹⁵Manga tuṛṛangnga su Roma apan mangngimanna Mawu Yesus naaringikka watti'a su ola'i yami, na'oman sara i mangitou nirumanta sara Pasakku Apius wuṛṛu Pangangillol᷊oanna Tatallu see nanal᷊oho si yami. Napawe i Paulus nassomba mangitou, i tou namantugga Ruata wuṛṛu naungnge nabal᷊i matohassa.

¹⁶Napawe na'omate su Roma, i Paulus niwala matana'a sassane wuṛṛu rariagannu sangkatou tantara.

¹⁷Napawe tallute allo, i Paulus namaggo manga piaṛṛa'u taumatan Yahudi su tampa udde. Wuṛṛu napawe i mangitou suete naammulla, i tou nabbisara si mangitou, “Manga tuṛṛangnga! I ya'u tawe pasasal᷊a su saruannu walahanni ite, ara'e nilumawangnga addatta inanaramanna apan sinengkammi ite wuassu iupungngu al᷊amonang kite. Salaiwe aroddi ya'u sinametta su Yerusalem wuṛṛu tinantilla su manga taumatan Roma.

¹⁸Napawe hatto'u niparikisante, i mangitou namallo'u, ana waugu ya'u niasingkatanna tawe passasal᷊a'u saran sambau, apan botongnge maaṛṛuumangku ringannu ṛuumanna pateanna.

¹⁹Arawe ana waugu manga taumatan Yahudi mannal᷊are, i ya'u nangapiddu hatto'u parikisanna su mallaṛṛuungngu Kaisar Roma. I ya'u na'ola'a udde wal᷊ine ana waugu i ya'u pia sambau alae su saruannu pabbawala'u sassane.

²⁰Wuṛṛu ana waugu udde i ya'u madorongnga maisasommbang kamiu, maggahattong kamiu; ana waugu i ya'u ṛaṛṛapusanna, ana waugu Punnu Sal᷊amatta apan a'antimannu walahannu Israel.”

²¹See i mangitou nabbisara si tou, “Yami taambe naasengkamma saran paassa suratta wuassu Yudea su ola'u tuṛṛangnga. Wuṛṛu tawe sangkatou tuṛṛangnga wua poiaroddi apan nangapiddu watti'a su ola'u tuṛṛangnga ara'e nabatti'u al᷊al᷊eon tuṛṛangnga.

²²Arawe i yami ma'apulu lai madaringikka watti'u pangangimannu, ana waugu i yami sarangkanambone suete naaringikka taumata manggal᷊usa'a al᷊aṛṛa'a apan pangngimanannu udde.”

²³Ne i mangitou wuṛṛu i Paulus nanantunnu sambau allo pasasombanna. Su allo udde manambo taumata nirumanta su tampa atatanaanni Paulus. Wuassu rua'allo madatingngu bawallo i Paulus mannal᷊a'a wuṛṛu mabatti'a si mangitou watti'a su ola'u ereapa Ruata mamarenta ere sangkatou Ratu. Ringanni nappaattu manga tatialane sulal᷊ummu Wuke Musa wuṛṛu Wuke Manga Nabi, i Paulus mangke maddea'a tadea'u i mangitou mangngimanna Mawu Yesus.

²⁴Piaddu mangngimanna watti'i Paulus, arawe piaddu lai apan tawe mangngimanna.

²⁵Ringannu ṛingidda uata'ae i mangitou nanantangngu tampa udde, napawe i Paulus nabbisara arendi si mangitou, “Mangke atonna papasingkattu Ghaṛṛahon Ruata si Nabi Yesaya su iupungngu al᷊amonan kamiu!

²⁶Ruata nabbisara, ‘Roote wal᷊oa'a su walahanna indi: I yamiu sidutu maaringikka, arawe tawe maasunna; i yamiu sidutu mannutukka arawe wagga apa apan sarun mariaddi.

²⁷Ana waugu ṛingiṛṛannu walahanna indi mal᷊umute tal᷊inga mangitou nabengelle wuṛṛu mata mangitou suete niaṛṛimbuta. Indi mariaddi tadea'u mata mangitou tawe maasilo, tal᷊inga mangitou tawe maaringikka, ṛingiṛṛanni mangitou tawe maasunna, wuṛṛu arie mabelengnga ringang-Ku, see i Ya'u mapaapia mangitou.’ ”

²⁸Panginsueanne i Paulus nabbisara, “Manga tuṛṛangnga ṛinone maasingkata manungku su ola'u watti'u asasal᷊amatta wuassu Ruata orassa indi suete niapaasingkatta su manga walahanna waine apan bal᷊ine Yahudi. I mangitou sarun tumuṛṛutta!” [

²⁹Napawe i Paulus suete nabbisara aroddi, manga taumatan Yahudi nanantangngu tampa udde lapiddu nattatiakka sangkatou ringannu waine.]

³⁰Rua tonna al᷊annune i Paulus uatana'a su Roma, su wal᷊e apan sasewanne sassane. I tou mal᷊uassa manarimmattu anambon taumata apan rudanta mattembo si tou.

³¹Wuṛṛu ringannu waṛṛani tou mabatti'a si mangitou su ola'u ereapa Ruata mamarenta ere sangkatou Ratu wuṛṛu su ola'u Mawu Yesus Kristus. I Paulus nabbatti'u udde ringannu tawe gal᷊ahene wuṛṛu tawe mangngangul᷊a'ukke.