Read Talaud WATTI'U MANGA RASUL 3 Bible Online

WATTI'U MANGA RASUL 3 - Talaud bible

WATTI'U MANGA RASUL 3

¹Su sambau allo i Petrus wuṛṛu i Yohanes inai su Wal᷊e Mawu su puulla tatallu wawallo, eteudde orassa umal᷊iomanna.

²Poiaroddi ngara wahewa apan isassago “Ngara Maṛṛamaga”, pia sangkatou esakka lome ro'en dariaddine. Miallo-miallo taumata udde ia'apidda isudde iaparorongnga su manga taumata apan sumutta su Wal᷊e Mawu.

³Napawe taumata udde naasilo si Petrus wuṛṛu si Yohanes sussutta su Wal᷊e Mawu, i tou nadorongnga sitarua mangonggolu sarannapa si tou.

⁴Ne itarua nanutuda si tou, wua'udde Petrus nabbisara, “Pa'ellege si yami!”

⁵See taumata udde nanutuda sitarua ringannu antimma sarun onggol᷊annu sarannapa wuassi mangitou.

⁶Arawe i Petrus nabbisara si tou, “I Ya'u tawe doitta sarang kadio'a. Arawe apa apan indi si ya'u, sarun ta'u ionggolla si'o: Ringannu taṛṛinon Yesus Kristus taumata Nazaret udde, amatte i'o!”

⁷See i Petrus nangagassa taumata udde su lima aikkatanne wuṛṛu nantul᷊ungngi tou dirumarisikka. Leddan taumata udde wuṛṛu wawul᷊annu leddane, lapiddu nabal᷊i matohassa.

⁸See i tou sinumolo'a dirumarisikka, wuṛṛu inumamatte uapapal᷊ele isudde. Wua'udde i tou sinumutta su Wal᷊e Mawu suadio'a ringanni Petrus wuṛṛu i Yohanes lapiddu u'amatta wuṛṛu sussolo'a wuṛṛu maddalo Ruata.

⁹Awada'alla naasilo si tou u'amatta wuṛṛu maddalo Ruata.

¹⁰See i mangitou naatutukka manungku ete i tou madarorongnga apan wiasane ua'ianna su “Ngara Maṛṛamaga” su Wal᷊e Mawu. I mangitou naherangnga wuṛṛu niagukke naasilo apa apan suete nariaddi si tou.

¹¹Taumata udde sidutu uatantalongnga si Petrus wuṛṛu si Yohanes. Wuṛṛu napawe i mangitoun tallu na'omate su panumbal᷊e apan isassago “Panumbal᷊en Salomo”, anambon taumata nirumanta maṛṛimpulunna si mangitoun tallu ana waugu niagukke.

¹²Napawe i Petrus naasilo manga taumata udde, i tou nabbisara si mangitou, “Ei manga taumatan Israel, anio manga tuṛṛangnga maggerangngu olangnge indi? Anio i yamiu sidutu ua'ellega si yami? Apa i yamiu massunna manungku taumata indi naamatta ana waugu taṛṛino wuassi yami ara'e ana waugu i yami matuṛṛutta Ruata?

¹³Ruata apan sassubbanni Abraham, i Ishak, i Yakub, Ruatan al᷊amonang kite, Ruata udde suete namantuga Allang-Nge eteudde Mawu Yesus, ete Mawu Yesus udde tinantilli yamiu su tembonanne wuṛṛu niroapanni yamiu su saruanni i Pilatus, su tempo Pilatus ma'apulu mamallosi Tou.

¹⁴I tou na'ukkassa wuṛṛu mapia, arawe i yamiu mannal᷊are wuṛṛu mammata'a tadea'u i Pilatus mamallossu sangkatou taṛṛa pate si yamiu.

¹⁵Manga tuṛṛangnga namate si Tou, sumbal᷊i ete i Tou punnu wiakku taumata nambo. Wuṛṛu Ruata suete napaawiakki Tou apia wuassu papate. Wuṛṛu i yami suete naasilo sassane olangnge udde.

¹⁶Manga tuṛṛangnga suete naasilo wuṛṛu nattiala apa apan nariaddi su taumata lome indi. I Tou nabal᷊i matohassa, wuṛṛu napia ana waugu mangngimanna Mawu Yesus wuṛṛu taṛṛino-Ne. Ana waugu mangngimanna Mawu Yesus, ne taumata indi napiate apia su saruannu manga tuṛṛangnga sarangkanambone.

¹⁷Manga tuṛṛangnga! Orassa indi ya'u masingkate manungku apa apan a'olaanni yamiu wuṛṛu manga piaṛṛa'i yamiu su Mawu Yesus, udde a'olaanni yamiu ana waugu i yamiu wagga apa apan tantal᷊anna a'olaanni yamiu.

¹⁸Wuṛṛu ana waugu eteudde natipusse apa apan suete niapaasingkattu Ruata ro'en al᷊amonane sulal᷊ummu manga nabi-Ne, manungku Ratum Punnu Sal᷊amatta apan pina'ire udde ṛinone matataṛṛangnga.

¹⁹Ana waugu udde manga tuṛṛangnga, awal᷊ute wuassu manga rosanu wuṛṛu pabelengke ringannu Ruata tadea'u i Tou mamapassa manga rosanu.

²⁰Mawu sarun rumanta ringanni yamiu, wuṛṛu i yamiu sarun maapendamma atatohassa wakku sulal᷊ummu pangangimanna. Wuṛṛu Mawu sarun mandolokku Mawu Yesus rumanta ringanni yamiu, ana waugu i Tou suete tinantunnu Ruata maola'a Ratum Punnu Sal᷊amatti yamiu.

²¹I Tou sarun matana'a su surga ma'oman sara Ruata ma'ola'a sarangkanambone wakku ere lai suete niapaasingkattu Ruata su manga nabi-Ne tempo rorone.

²²I Musa suete nabbisara, ‘Ruatanu sarun mandolokka ringanni yamiu sangkatou nabi wuassu walahannu sassane ere lai i Tou nandolo'u. I yamiu ṛinone madaringikka anambon watti'a apan nipasingkattu nabi udde si yamiu.

²³Taumata apan tawe madaringikka wisara nabi udde, taumata udde sarun limbuaṛṛanna wuassu walahannu Ruata wuṛṛu pateanna.’

²⁴Manga nabi apan suete namasingkattu watti'u Ruata, manattakka wuassi Nabi Samuel wuṛṛu manga nabi waine apan nirumanta sal᷊immurine, sarangkanambone namasingkatta su ola'u tempo indi.

²⁵Manga pa'airen Ruata apan niapaasingkattu manga nabi, eteudde huna manga tuṛṛangnga. Sulal᷊ummu pa'aire apan niola'u Ruata su iupungngu al᷊amonanu, Ruata nabbisara si Abraham arendi, ‘Wuassu papapulunnu, i Ya'u sarun mangal᷊amatta al᷊awo'u taumata su runia.’ Pa'aire udde hunane si yamiu lai.

²⁶Ana waugu udde Ruata namile Allang-Nge, see nandolokki Tou nirumanta ringanni yamiu paarorone, tadea'u i Tou mangal᷊amatta si yamiu. Olangnge i Tou mangal᷊amatta eteudde na'ola'a manga tuṛṛangnga sarangkanambone nawal᷊u wuassu ola'u wiakki yamiu apan lal᷊eo.”