Read Talaud WATTI'U MANGA RASUL 4 Bible Online

WATTI'U MANGA RASUL 4 - Talaud bible

WATTI'U MANGA RASUL 4

¹Tantal᷊anna i Petrus wuṛṛu i Yohanes ta'e uahahatto manga taumata udde, manga imam tembonanne wuṛṛu piaṛṛa'u mandariaga Wal᷊e Mawu wuṛṛu manga taumatan Saduki nirumanta ringanni Petrus wuṛṛu i Yohanes.

²I mangitou massa'u ana waugu i Petrus wuṛṛu i Yohanes mabatti'a manungku Mawu Yesus suete nabbiakka apia wuassu papate. Wuṛṛu udde maola'a tatiala manungku taumata nate sarun mabbiakka apia.

³Ne i mangitou nanametta rasul darua udde see niapasutta sulal᷊ummu tuttupanna. Wuṛṛu ana waugu ṛabbite, ne i Petrus wuṛṛu i Yohanes tinaṛṛanganna isudde na'oman sara tiṛṛabbine.

⁴Arawe manga taumata apan naaringikke al᷊aṛṛa'u manga rasul udde, manambonampangimanna. Ne reenganni mangitou niatambanna na'oman sara iraṛṛangngo lima ṛiwu su atoune.

⁵Tiṛṛabbine manga mapapande Mallaṛṛuungngu Agama, manga piaṛṛa'u taumatan Yahudi wuṛṛu manga hurun agama na'ammulla su Yerusalem.

⁶I mangitou naisasomban Imam Bahewa Hanas, see lai i Kayafas, i Yohanes, i Aleksander, wuṛṛu sarangkanambone apan nasutta su reengannu walahannu imam bahewa udde.

⁷I Petrus wuṛṛu i Yohanes niapidda sinumaruanna si mangitou, see i mangitou naiwal᷊o, “Ereapa olangnge i yamiu napaapian taumata lome udde? Ringannu atatohassu sassane ara'e ringannu taṛṛinon sai yamiu ma'ola'a udde?”

⁸I Petrus apan niintaṛṛoannu Ghaṛṛahon Ruata, sinumimbakka, “Manga mawu piaṛṛa'u walahanna, wuṛṛu manga mawu wageangngu mallaṛṛuungnga!

⁹I yami niparikisanna allo indi ana waugu na'ola'a apapia ipantul᷊ungngu taumata lome, wuṛṛu ana waugu manga mawu maapulu maasingkatta taumata udde pinapaapia.

¹⁰Ne, manga mawu sarangkanambone ṛinone maasingkatta wuṛṛu anambon walahannu Israel ṛinone lai maasingkatta manungku taumata indi uarisikka orassa indi ringannu wadangnga apan mapia su saruannu manga mawu, ana waugu atatohassa wuṛṛu taṛṛino wuassu Mawu Yesus Kristus taumatan Nazaret. Manga mawu suete nangarussa Mawu Yesus udde, arawe Ruata suete napaawiakki Tou apia.

¹¹Ete Mawu Yesus udde apan su pandummu aaddoanne indi sulal᷊ummu Wuke Susi, ‘Watu apan tate ipaatta su manga wal᷊e, nasemakka naola'e watu apan paarorone.’

¹²Tumba'u sulal᷊ummu Mawu Yesus sassane taumata masal᷊amatta. Ana waugu su ahewallu runia indi su wallattu taumata tawe saran sangkatou taumata waine maasomba taṛṛino wuassu Ruata ipanal᷊amatta si ite.”

¹³Manga wageangngu ammul᷊annu Mamamarikissa udde naherangnga naasilo awawaṛṛanin Petrus wuṛṛu i Yohanes, see lai i mangitou masingkatta manungku rasul darua udde taumata wiasa apan tawe si'ol᷊ane. See i mangitou naatutukke manungku rasul darua eteudde manga taumata apan uatantalongnga Mawu Yesus.

¹⁴Arawe i mangitou tawe naasinaukka saran adio'a, ana waugu taumata apan suete niapaapia udde uarisikka lai isudde su saruanni mangitou suadio'a ringanni Petrus wuṛṛu i Yohanes.

¹⁵Ne i mangitou nandolokku rasul darua udde sinumabangnga wuassu tampam pa'ammul᷊anna, wua'udde i mangitou na'ire.

¹⁶I mangitou mabbisara, “Ṛinone olaanni ite ereapa manga taumata indi? Anambon taumata apan uatana'a su Yerusalem masingkate manungku al᷊aṛṛindu'a apan wahewalla indi, niola'i tarua. I ite tawe mappassinaaddu olangnge udde.

¹⁷Arawe tadea'u hatto indi tawe massal᷊iawukka su manga taumata, wette i ite mapaanaungngi tarua manungku tate wotongnge itarua mabbisara taumata ringannu mappaattu arannu Mawu Yesus.”

¹⁸Ne i mangitou namago rasul darua udde niapaasutta apia, wuṛṛu niwal᷊oanna manungku itarua tate wotongnge managon ara'e mangaṛṛa'a ringannu mappaattu arannu Mawu Yesus.

¹⁹Arawe i Petrus wuṛṛu i Yohanes sinumimbakka, “Ṛingiṛṛa'e sassane apa apan ṛinone su saruannu Ruata: tumuṛṛuttu parenta manga mawu ara'e tumuṛṛutta parentan Ruata.

²⁰Ana waugu i yami tawe maaillol᷊o mabbisara su ola'u apa apan suete niasiloanni yami wuṛṛu niaringiṛṛanni yami sassane.”

²¹Manga lal᷊oṛṛon ammul᷊anna udde tawe naasomba sambau pinangiananne ipakkuumanni Petrus wuṛṛu i Yohanes. Nariaddi i mangitou napaanaungngi tarua apia, see itarua nipallosse, ana waugu anambon taumata mangke maddalo Ruata ana waugu arariaddianna udde.

²²Taumata apan suete niapaapia udde appatem pul᷊o su tonnane pia lebene uukke.

²³Napawe i Petrus wuṛṛu i Yohanes nipallose, i mangitou nabelengke ringannu manga hawene wuṛṛu nabatti'u manga wisaran imam tembonanne wuṛṛu manga piaṛṛa'u Yahudi udde si mangitou.

²⁴Napawe manga hawene naaringikka udde, i mangitou suadio'a inumal᷊iomanna ringannu naungnga sambua su Ruata. I mangitou mabbisara, “Mawu, tumba'u I'o nandiaddi langitta wuṛṛu runia wuṛṛu tahal᷊oangnga ringannu al᷊awo'u lal᷊oṛṛone.

²⁵Ringannu Ghaṛṛaho-Nu I'o suete nabbisara su iupungngu al᷊amonan kami Daud, eteudde allang-Ngu; I'o nabbisara, ‘Anio manga taumata, apan tawe maaillal᷊a Mawu, massa'u; anio manga walahanna ma'ola'a ṛingiṛṛanna lal᷊eo?

²⁶Manga ratu su runia uasasaddia mappapangalo, wuṛṛu manga piaṛṛangnge uaaukka lumawangnga Mawu wuṛṛu Ratum Punnu Sal᷊amatta.’

²⁷Ana waugu i Herodes wuṛṛu i Pontius Pilatus suete na'ola'a ammula ringannu manga taumata apan tawe ma'aillal᷊a Mawu wuṛṛu ringannu taumatan Israel su soa indi. I mangitou ma'amulla lumawangnga Mawu Yesus allang-Ngu apan na'ukkassa udde, apan suete nitene-Gu maola'a Ratum Punnu Sal᷊amatta.

²⁸I mangitou naaukka ma'ola'a al᷊awo'u manara, apan suete tinantunna ro'en paarorone manungku udde sarun matippussa. Wuṛṛu I'o sarun manantunnu udde wuassu taṛṛino wuṛṛu apulu-Nu sassane.

²⁹Orassa indi, Mawu, ellehete ereapa i mangitou mammansaggi yami. Wuṛṛu wala'e i yami, manga allang-Ngu indi mamasingkattu watti'a ringannu tawe matta'utta.

³⁰Onggol᷊aawe aakannu, tadea'u taumata marada'a iapaapia wuṛṛu manga al᷊aṛṛindu'a see inolaanna apan bahewalla mariaddi wuassu taṛṛino wuṛṛu atatohassa wuassu arannu Mawu Yesus, Allang-Ngu apan na'ukkassa udde.”

³¹Napawe i mangitou suete inumal᷊iomanna, tampa i mangitou uaammulla udde inumio'a. I mangitou sarangkanambone naasomba taṛṛinon Ghaṛṛahon Ruata, wuṛṛu nanattakke mabbisara ringannu waṛṛani atonna, su ola'u watti'u Ruata.

³²Anambon taumata apan mangngimanna udde mabbiakka ringannu naungnga wuṛṛu apendamma sambau. Tawe saran sangkatou wuassi mangitou mammendamma manungku apa tatahuananne udde darotongnge sassane. Al᷊awo'u apa si mangitou, ipappaatti mangitou su sambau.

³³Ringannu taṛṛino apan bahewa, manga rasul udde mangngonggolu tatiala manungku Mawu Yesus nabbiakke apia. Ne Ruata lembo nangal᷊amatta si mangitou.

³⁴Wuṛṛu tawe saran sangkatou wuassu wallatti mangitou apan niatalannu manga apa. Ana waugu i mangitou apan uatahuanna leta'a ara'e wal᷊e, nabal᷊u'u leta'a ara'e wal᷊e mangitou udde; roinne niapiddi mangitou

³⁵wuṛṛu tinantilli mangitou su manga rasul. Wua'udde roitta tinahia su manga taumata apan mappandumma.

³⁶Aroddi lai i Yusuf. I tou lai nabal᷊u'u leta'a, see roinne niapiddi tou wuṛṛu tinantilla su manga rasul. I Yusuf indi sangkatou wuassu papapulunni Lewi wuassu Siprus; manga rasul mammago si tou lai i Barnabas (atappasanne Mallal᷊uassa).