Read Talaud WATTI'U MANGA RASUL 6 Bible Online

WATTI'U MANGA RASUL 6 - Talaud bible

WATTI'U MANGA RASUL 6

¹Manga mallal᷊aṛṛenggennu Mawu Yesus mallannu aatambanna anambone. Su tempo udde manga taumatan Yahudi apan mabbisaran Yunani naola'a tawe mal᷊uassa su saruannu manga taumatan Yahudi tumanangnge. Apan mabbisaran Yunani udde nabbisara, “Manga wawineng kami apan inawal᷊uanna tawe naasomba tahia ipabiakka miallo-miallo apan nitahia su manga taumata.”

²Ana waugu udde sire mapul᷊o dua rasul udde nangammullu anambo mallal᷊aṛṛenggenne wuṛṛu nabbisara si mangitou, “Dal᷊eo amungkangngu i yami umaddo mamasingkattu wisaran Ruata, ana waugu ta'e maṛṛingiddu anna.

³Nariaddi, mappianne manga tuṛṛangnga mamile wuassu wallatti yamiu sire pitu apan pallal᷊agune mapia wuṛṛu pia taṛṛinon Ghaṛṛaho Ruata see lai pande, apan botongnge iapamanarang kami mangatokku hatto indi;

⁴ana waugu i yami inai umal᷊iomanna wuṛṛu mabatti'u wisaran Ruata.”

⁵Awada'alla udde nanengkamma addapattu manga rasul udde. See i mangitou namilete si Stefanus, sangkatou apan mangngimanna Mawu Yesus wuṛṛu pia Ghaṛṛahon Ruata. Napile lai i Filipus, i Prokhorus, i Nikanor, i Timon, i Parmenas, wuṛṛu i Nikolaus wuassu Antiokhia; i tou wal᷊ine taumatan Yahudi arawe sinumuttate agaman Yahudi.

⁶Siri pitu udde niapidda su manga rasul, see manga rasul udde inumal᷊iomanna wuṛṛu nadorongnga al᷊amattu Mawu rumanta si mangitou.

⁷Aroddite watti'u Ruata mangke nassal᷊iawukka wuṛṛu manga mallal᷊aṛṛenggennu Mawu Yesus su Yerusalem lembon a'atambanna anambone. Wuṛṛu manambo lai manga imam apan nangngimanna Mawu Yesus.

⁸I Stefanus lembo nial᷊amatannu Ruata, na'oman sara i tou ma'ola'a manambo al᷊aṛṛindu'a wuṛṛu inolaanna apan wahewalla su wallattu tumana'u soa.

⁹Arawe pia lai manga taumata apan mannal᷊are si tou; i mangitou eteudde taumata wal᷊em pattataṛṛamawuanna apan isassago wal᷊em pattataṛṛamawuannu manga Taumata Tawe Limbanne. Manga taumata wal᷊em pattataṛṛamawuanna udde eteudde manga taumatan Yahudi wuassu Kirene wuṛṛu Aleksandria. I mangitou wuṛṛu manga taumatan Yahudi wuassu Kilikia wuṛṛu Asia uasasimbakki Stefanus.

¹⁰Arawe i mangitou tawe maapanompolla wisaran Stefanus, ana waugu Ghaṛṛahon Ruata mangngonggolu apande si tou iapawisara.

¹¹Ana waugu udde i mangitou nangonggolu roitta su manga pira taumata iapawisara, “I yami naaringikka taumata udde mangngadio'a si Musa wuṛṛu Ruata!”

¹²Ete aroddi i mangitou mapawawul᷊o manga taumata, wuṛṛu manga piaṛṛa'u Yahudi, wuṛṛu manga hurun agama. See i mangitou inaite nanametta si Stefanus, wua'udde i tou niapidda sinumaruanna Mallaṛṛuungngu Agama.

¹³Wuṛṛu i mangitou lai nangapiddu manga mattatiala apan mangngonggolu tal᷊a'a awusu su ola'i Stefanus. Manga mattatiala udde nabbisara, “Taumata indi sidutu mangngadio'a Wal᷊e Mawu apan na'ukkassa, wuṛṛu mangngadio'a manga parentan Ruata apan niapaasingkatti Musa.

¹⁴I yami suete naaringikka si tou mabbisara, manungku Mawu Yesus wuassu Nazaret udde sarun mangngohakku Wal᷊e Mawu indi, see mamal᷊u anambon inanaramanna apan nisossokki Musa si ite!”

¹⁵Awada'alla apan uasemodda sulal᷊ummu ammul᷊annu Mallaṛṛuungngu Agama udde nanutudda si Stefanus. Wuṛṛu su tempo udde hatin Stefanus aellehanna naal᷊ihidda hati mala'ekatta.