Read Talaud WATTI'U MANGA RASUL 7 Bible Online

WATTI'U MANGA RASUL 7 - Talaud bible

WATTI'U MANGA RASUL 7

¹Imam bahewa naiwal᷊o si Stefanus, “Apa anambon wisaran taumata udde atonna?”

²I Stefanus sinumimbakka, “Manga tuṛṛangnga wuṛṛu manga Iamangnga! Padaringikka si ya'u! Tantal᷊anna iupungngu al᷊amonang kite Abraham taambe nangingkatta watukku Haran, su tempo i tou ta'e uatana'a su Mesopotamia, Ruata apan mawantuga nirumanta ringanni tou

³wuṛṛu nabbisara, ‘Tantanga'e wanuanu wuṛṛu manga tuṛṛangngu. Roote su wanua apan sarun ipantingida si'o.’

⁴Ne i Abraham nanantangken wanua Kasdim, see nangingkatte watukku Haran. Napawe iamangngi Abraham natete, Ruata napa'ingkatti Abraham watukku wanua indi atatanaannu manga tuṛṛangnga wuṛṛu manga iamangnga orassa indi.

⁵Su tempo udde tawe saran sambageanganna wuassu wanua indi nionggolu Ruata si Abraham maola'a pussa'an Abraham; tawe saran sandango nionggolla si tou. Arawe Ruata na'ire manungku i Tou sarun mangonggolla si Abraham maola'a pussa'an Abraham wuṛṛu papapulunne. Tempo udde i Abraham tawe ana'a.

⁶Arawe indi bawal᷊on Ruata si tou, ‘Papapulunne sarun matana'a ere taumata raho su wanuan taumata waine. Manga tumana'u wanua udde sarun mangallangnga si mangitou wuṛṛu ma'ola'a si mangitou maṛṛagisa appatu ṛasutta su tonnane al᷊annune.

⁷Arawe i Ya'u sarun makkuumannu walahanna apan mangngallangnga si yamiu, wuṛṛu i mangitou sarun masal᷊iu wuassu wanua udde wuṛṛu sarun massubba si Ya'u su tampa indi.’

⁸Napawe suete nabbisara aroddi pa'aire udde pinattohassu Ruata ringannu sunatta. Ne napawe i Ishak, ana'i Abraham niasungkangnga, Abraham nassunatte si tou napawe uukke ual᷊ute allo. Wua'udde i Ishak nassunatta lai al᷊aṛṛanangnge, eteudde i Yakub. Wuṛṛu i Yakub nassunatta lai sire mapul᷊o dua al᷊aṛṛanangnge, eteudde apan naola'a iamangngu al᷊amonan walahannu Yahudi.

⁹Manga iamangngu al᷊amonang kite udde massa'u si Yusuf, na'oman sara i mangitou nabal᷊u'i tou naola'a allangnga su Mesir. Arawe Ruata sidutu uatantalongnga si tou,

¹⁰wuṛṛu napaal᷊iun tou wuassu al᷊awo'u asasusa. Ruata nangonggolu apapia wuṛṛu apande si tou su tempo i tou sinumaruanna si Firaun ratu Mesir, na'oman sara i Firaun nanenegi tou naola'a gubernure su wanua Mesir wuṛṛu tembonannu wal᷊en araratuannu Mesir.

¹¹Wua'udde nariaddite al᷊aṛṛatumma apan wahewa su ahewallu wanua Mesir wuṛṛu Kanaan na'oman sara taumata uatataṛṛangnga lunussa. Iupungngu al᷊amonang kite tawe maasomba anna.

¹²Ne napawe i Yakub naaringikka pia gandumma su Mesir i tou nandolokku al᷊aṛṛanangnge, iupungngu al᷊amonang kite, inai poiaroddi su paarorone.

¹³Su tempo i mangitou inai aruane, i Yusuf namasingkatta manga tuṛṛangnge udde manungku ete i tou i Yusuf. Wakkute udde ratu Mesir naasingkatta manga tuṛṛangngi Yusuf.

¹⁴Wua'udde i Yusuf nananatan watti'a su iamangnge, eteudde i Yakub tadea'u i Yakub wuṛṛu manga tuṛṛangnge mangingkatta watukku Mesir — sarangkanambone pitum pul᷊o l᷊ima su atoune.

¹⁵Ne i Yakub nangingkatte watukku Mesir wuṛṛu isudde i tou wuṛṛu iupungngu al᷊amonang kite, nate.

¹⁶Winal᷊unanni mangitou niapidda apia su Sikhem wuṛṛu nilabingnga su lal᷊abinganna apan suete niwallianni Abraham ringannu roitta wuassu taumatan walahannu Hemor su Sikhem.

¹⁷Napawe maranite tempone Ruata manipussa pa'aire-Ne si Abraham, walahanni ite su Mesir niatambante anambone.

¹⁸Panginsueanne sangkatou ratu waine apan waggan Yusuf, namarenta su Mesir.

¹⁹Ratu udde mannalangnga walahanni ite ringannu araṛṛagissa su iupungngu al᷊amonang kite. I tou mammata'i mangitou mandammen al᷊aṛṛana'a apan wakkute niasungkangnga tadea'u masusa wuṛṛu mate.

²⁰Su tempo udde i Musa niasungkangnga; i tou ana'a aṛṛamahanne. Tallu wul᷊anna al᷊annune i tou papadul᷊ianannu iamangnge,

²¹wuṛṛu napawe i tou nirammete, maṛṛualan Firaun nangampia si tou, see namadul᷊i si tou naal᷊ihida ere anangnge sassane.

²²Al᷊awo'u apanden taumata Mesir niaṛṛa'a si tou wuṛṛu i tou naola'a taumata apan lembon taṛṛino sulal᷊ummu wisara wuṛṛu inolaanne.

²³Su tempo i Musa uukke appatu pul᷊o su tonnane, nirumantate apulune sulal᷊ummu naungnge inai mattembo walahannu taumatan Israel.

²⁴See i tou naasilo sangkatou wuassi mangitou sassanrannu taumata Mesir, ne i tou nanamba'a taumata apan sassanranna udde wuṛṛu namate taumata Mesir.

²⁵I Musa massunna pabbawalage sarun maatutukka manungku Ruata tantal᷊anna mappaatti tou mamallossi mangitou. Arawe i mangitou tawe maatutukka.

²⁶Tiṛṛabbine i tou naasilo lai ruang katou taumatan Israel uawawul᷊o, see i tou nallaassa wuṛṛu nandame mangitou. I tou nabbisara, ‘I yamiu indi sangkatuṛṛangnga, anio i yamiu uawawul᷊o?’

²⁷Arawe taumata apan namuulla hawene udde nanuṛṛudi Musa su winggine see nabbisara,

²⁸‘Isai namile si'o maola'a piaṛṛangnge wuṛṛu mallaṛṛuungngi yami? I'o pia pandumma mamate si ya'u ere lai i'o namate taumata Mesir udde na'aṛṛabbi?’

²⁹Napawe i Musa naaringikka wisaran taumata udde, i Musa tinumal᷊angnga wuassu Mesir see natana'a su wanua Midian. Poiaroddi i tou naasomba ana'a darua.

³⁰Appatu pul᷊o su tonnane wua'udde, sangkatou mala'ekatta nirumanta ringanni Musa su wadda'a marani Wowon Sinai. Mala'ekatta udde nirumanta sulal᷊ummu putungnga su anggaṛṛumunanne apan lukkenggamma.

³¹I Musa naherangnga naasilo olangnge udde, na'oman sara i tou inaite nangundani tadea'u maasingkatta apa nariaddi udde. See i tou naaringikka tingikku Mawu nabbisara,

³²‘Ete i Ya'u Ruata iupungngu al᷊amonanu; i Ya'u Ruatan Abraham, Ishak, wuṛṛu Yakub.’ I Musa nangindon atata'utta na'oman sara i tou tate waṛṛani ma'ellega anggaṛṛumunanne udde.

³³Wua'udde Mawu nabbisara apia, ‘Luatte silope apan ualuṛṛe si'o udde ana waugu leta'a apan dararisiṛṛannu udde leta'a na'ukkassa.

³⁴I Ya'u suete naasilo wuṛṛu naatutukka aroddi apettane asasusam pabbawala-U su Mesir. I Ya'u naaringikke sasal᷊iomanni mangitou wuṛṛu i ya'u sinumossokka mamallosi mangitou. Orassa indi wette! I Ya'u sarun mandolokku mabelengnga watukku Mesir.’

³⁵I Musa indi Musa apan tawe nia'um balagu Israel wuṛṛu nito'e ringannu wisara indi, ‘Isai suete namile si'o maola'a piaṛṛa'a wuṛṛu mallaṛṛuungngi yami?’ Arawe ete i tou taumata apan nirolokku Ruata maola'a piaṛṛangnge wuṛṛu mananal᷊amatta, ringannu sasumbala mala'ekatta apan nirumanta ringanni tou su anggaṛṛumunanne apan lukkenggamma udde.

³⁶Ete i Musa udde apan namiaṛṛa'u walahannu Israel sinumabangnga wuassu Mesir ringannu na'ola'a al᷊aṛṛindu'a wuṛṛu inolaanna apan wahewalla su Mesir, su Tahal᷊oangnga Maṛṛamu wuṛṛu su wadda'a, appatu pul᷊o su tonnane al᷊annune.

³⁷Ete i tou lai Musa apan nabbisara su walahannu Israel, ‘Ruata sarun mangonggolla si yamiu sangkatou nabi apan nipile wuassu wallatti yamiu sassane, ere lai i Tou namile si ya'u.’

³⁸Ete i Musa lai apan su pattangngannu walahannu Israel su wadda'a, naola'a uatangnga mala'ekatta apan mabbisara si tou su Wowon Sinai ringannu iupungngu al᷊amonang kite. Ete i tou apan nanengkamma watti'a apan wiakka wuassu Ruata niapaasingkatta si ite.

³⁹Salaiwe aroddi iupungngu al᷊amonang kite maddiri tumuṛṛutta si tou. I mangitou maddirin tou wuṛṛu maapulu mabelengnga watukku Mesir.

⁴⁰I mangitou nabbisara si Harun, ‘Pallanginte manga paal᷊uanna hunang kami, tadea'u manga paal᷊uanna udde mamiaṛṛa'i yami. Ana waugu i yami wagate lai apa apan sarun mariaddi si Musa udde, apan nangapiddi yami sinumabangnga wuassu Mesir!’

⁴¹See su tempo udde i mangitou nallanginnu sambau paal᷊uanna ana'u sapi, wua'udde i mangitou nangonggolu sasamba su paal᷊uanna udde wuṛṛu na'ola'a andeangnga ipassubba paal᷊uanna apan nilanginni mangitou sassane.

⁴²Ne Ruata nanantangngi mangitou wuṛṛu namala mangitou massubba manga anumpitanna su langitta. Udde ere lai uawoṛṛetta sulal᷊ummu Wuke Manga Nabi. Arendi, ‘Ei manga taumatan Israel! Wal᷊inewe hunane si Ya'u i yamiu mammototta wuṛṛu ma'ola'a sasamba wuassu winatangnga, appatu pul᷊o su tonnane al᷊annune su wadda'a.

⁴³Ete rasanna pasasubbanna si Molokh apan ia'apiddi yamiu suadio'a ringannu paal᷊uannu winatangnga sassubbannu, eteudde Refan; eteudde paal᷊uanna niola'a sassubbanni yamiu. Ana waugu udde i Ya'u sarun mallimbuakka si yamiu marau-rau watukku samba'a wanua Babel.’

⁴⁴Rasanna tampa rantannu Ruata ringannu taumata, pia lai su iupungngu al᷊amonang kite su wadda'a. Rasanna udde niola'a wuassu parentan Ruata si Musa tumuṛṛuttu saṛṛene apan niapasilon Ruata si Musa.

⁴⁵See rasanna udde niapiddu iupungngu al᷊amonang kite su tempo i mangitou wuṛṛu i Yosua inai mangaṛṛo wanuang kite indi wuassu tatahuanannu manga walahanna apan nilimbuaṛṛannu Ruata su saruanni mangitou. Rasanna udde uaraddo isudde na'oman sara i Daud.

⁴⁶I Daud ma'al᷊uassa naungngu Ruata wuṛṛu sussal᷊ande si Tou tadea'u i tou iwala mapararisikku sambau Wal᷊en Ruata apan sassubbanni Yakub udde.

⁴⁷Arawe ete i Salomo napararisikku Wal᷊en Ruata.

⁴⁸Ewe'e Ruata lembon ahewal᷊anne tawe matana'a su wal᷊e apan niola'u taumata; ana waugu su Wuke Nabi uawoṛṛetta arendi,

⁴⁹‘Langitta eteudde aṛṛa'uang-Ku, wuṛṛu runia apampakku ledda-U. Wal᷊e ereapa ṛinone iapararisikki yamiu si Ya'u? Suapa tampa pangillol᷊oang-Ku?

⁵⁰Wal᷊inewe i Ya'u sassane nandiaddi sarangkanambone udde?’ ere udde wisaran Ruata.

⁵¹Wal᷊ine hampa aatikku puan manga tuṛṛangnga, wuṛṛu aroddi asahadde tumuṛṛutta Ruata! Tal᷊inganu wengella ipadaringikka wisaran Ruata! I yamiu naal᷊ihida ere iupungngu al᷊amonanu; sidutu lullawangnga Ghaṛṛahon Ruata!

⁵²Apa pia sangkatou nabi apan tawe nisansarannu iupungngu al᷊amonanu? I mangitou namate daroloṛṛannu Ruata apan dorone suete namasingkatta manungku Allangngu Ruata apan atonna udde sarun rumanta. Wuṛṛu orassa indi yamiu nandal᷊eo wuṛṛu namate Allangngu Ruata udde.

⁵³Manga mala'ekatta suete namasingkattu manga parentan Ruata si'o arawe i yamiu maddiri tumuṛṛutta!”

⁵⁴Aroddi manga ammul᷊annu Mallaṛṛuungngu Agama udde naaringikka sarangkanambone apan niwisaran i Stefanus, i mangitou nannaungnga lal᷊eo wuṛṛu nasa'u atonna si tou.

⁵⁵Arawe i Stefanus apan aintaṛṛoannu Ghaṛṛaho Ruata, naningngara langitta. I tou naasilo awawantugu Ruata, wuṛṛu Mawu Yesus uarisikka su tampa pia taṛṛino su samba'an uanannu Ruata.

⁵⁶“Pa'ellega” unni Stefanus, “i ya'u ma'asilo surga nawu'a wuṛṛu Ana'u Taumata uarisikka su samba'an uanannu Ruata!”

⁵⁷Manga ammul᷊annu mallaṛṛuungnga udde nanapingnga tal᷊inga mangitou lapiddu inumui, see sangkaṛṛindo'a naṛṛimpulunna si Stefanus.

⁵⁸I mangitou namol᷊engnga si tou su liuddu soa wua'udde i tou tinuntungannu watu. Manga taumata apan na'ola'a arariadianna udde nanantangngu laubbi mangitou su sangkatou umbasanna aranne i Saulus.

⁵⁹Tantal᷊anna i mangitou mannuntungnga si Stefanus, Stefanus sussal᷊ande, “Mawu Yesus, sengkammawe niawa'u!”

⁶⁰See i tou inumal᷊intuda wuṛṛu inumui ringannu tingikka ma'ikkatta, “Mawu, ariewe rosa indi maola'a winabbawa mangitou!” Napawe wua nabbisara aroddi i tou nate.