Read Talaud WATTI'U MANGA RASUL 8 Bible Online

WATTI'U MANGA RASUL 8 - Talaud bible

WATTI'U MANGA RASUL 8

¹Wuṛṛu i Saulus lulluassa lai su ola'u pamamate udde. Allo udde lai jamaatta su Yerusalem mannattake a'enggenanna, na'oman sara anambon taumata mangngimanna, tabene'e manga rasul, nassal᷊iawukke watukku ahewallu leta'u Yudea wuṛṛu Samaria.

²Manga taumata apan matta'uttu Ruata nallabingngi Stefanus wuṛṛu nilumuain tou ringannu massusa atonna.

³Arawe i Saulus sidutu maddea'a manongkakku jamaatta. I tou rudanganna su manga wal᷊e wuṛṛu mammol᷊engnga su liudde manga taumata apan mangngimanna, see i mangitou nitaṛṛo su tuttupanna.

⁴Manga taumata mangngimanna apan nassal᷊iawukka udde, mabatti'u Watti'u Al᷊al᷊uassa wuassu Ruata su al᷊awo'u tampa.

⁵I Filipus inaite watukku soan Samaria wuṛṛu nabbati'a su manga taumata poiaroddi su ola'u Ratum Punnu Sal᷊amatta apan pina'iren Ruata.

⁶Napawe manga taumata naaringikka si Filipus mangngaṛṛa'a, wuṛṛu see i mangitou naasilo manga al᷊aṛṛindu'a apan niolangnge, manambo su wallatti mangitou madaringikka apa apan iaaṛṛa'i Filipus.

⁷Ana waugu manga ghaṛṛaho lal᷊eo sinumabangke ringannu mangngintul᷊i wuassu lal᷊ummu taumata nambo apan niasuttannu setanna. Taumata lome wuṛṛu u'ento manambo lai niapaapia.

⁸Ne manga taumata su soan Samaria udde mangke lulluassa.

⁹Su soa udde pia sangkatou esakka aranne i Simon, apan mal᷊annute ma'aola'a taumatan Samaria iaaguke su ola'u apande bal᷊iimmata. I tou mabal᷊o si mangitou manungku i tou taumata paṛṛalane wuassu taumata nambo.

¹⁰Ne anambon taumata su soa udde wuassu al᷊awo'u taumata tumanangnge mangke mangngimanna si tou. “Ete taumata indi atatohassu Ruata apan niasingkatanna ‘Atatohassa apan Wahewa’ udde,” wisara mangitou.

¹¹Mal᷊annute atonna i tou mappaagukku taumata ringannu bal᷊iimmatane, na'oman sara i mangitou mangngimanna si tou.

¹²Arawe i Filipus mabatti'u Watti'u Al᷊al᷊uassa si mangitou su ola'u ereapa Ruata mamarentate ere sangkatou ratu, wuṛṛu su ola'u Mawu Yesus Kristus, Ratum Punnu Sal᷊amatta udde. Ne i mangitou nangngimante watti'a apan niapasingkatti Filipus, see i mangitou nissaṛṛanite — mawae esakka ara'e lai wawine.

¹³I Simon sassane lai nangngimanna. Wuṛṛu napawe suete nissaṛṛani, i tou sidutu uatantalongnga si Filipus. Manga al᷊aṛṛindu'a apan suete nariaddi udde, mangke ma'atiangnga si Simon.

¹⁴Manga rasul su Yerusalem naaringikka manungku manga taumatan Samaria suete nanengkamma wisaran Ruata. Ana waugu udde i mangitou nandolokki Petrus wuṛṛu i Yohanes inai poiaroddi.

¹⁵Napawe i Petrus wuṛṛu i Yohanes na'omate, i mangitou inumal᷊iomannu manga taumatan Samaria udde tadea'u i mangitou maasomba Ghaṛṛahon Ruata,

¹⁶ana waugu Ghaṛṛaho Ruata taambe nirumanta nangintaṛṛo su saran sangkatou su wallatti mangitou; i mangitou wakkute nissaṛṛani tumba'u ringannu arannu Mawu Yesus.

¹⁷See i Petrus wuṛṛu i Yohanes nangaddo lima mangitou su manga taumatan Samaria udde; ne i mangitou nanengkampe Ghaṛṛahon Ruata.

¹⁸I Simon na'ellega manungku ana waugu lima manga rasul niaddo su wowo manga taumata udde, Ghaṛṛahon Ruata nionggolla si mangitou. Ana waugu udde i Simon nangapiddu roitta ionggolla si Petrus wuṛṛu si Yohanes,

¹⁹see nabbisara, “Onggol᷊a'e si ya'u taṛṛino udde lai, tadea'u amungkangngu lima'u iaddo su al᷊awo'u taumata, taumata udde sarun maasengkamma Ghaṛṛahon Ruata.”

²⁰Arawe i Petrus sinumimbakka, “Nasilakate i'o wuṛṛu roinnu! Sunnanu aonggolu Ruata wotongnge aawalliannu roitta?

²¹I'o tawe maatantalongnga sulal᷊ummu manarang kami, ana waugu naungngu wengkola su saruannu Ruata.

²²Ana waugu udde tantanga'e pandumannu apan lal᷊eo udde, wuṛṛu padorongke su Mawu tadea'u i Tou mangampungnga ṛingiṛṛannu apan lal᷊eo udde!

²³Ana waugu i ya'u masingkatta manungku i'o napenen sasihikka wuṛṛu naola'a allangngu al᷊al᷊eo.”

²⁴See i Simon nabbisara si Petrus wuṛṛu si Yohanes, “Tul᷊unga'a padorongnga su Mawu tadea'u tawe saran sambau wuassu wisara manga tuṛṛangnga udde mariaddi su riri'u.”

²⁵Napawe i mangitou suete nattiala wuṛṛu napaasingkattu wisara Mawu, i Petrus wuṛṛu i Yohanes nabelengke watukku Yerusalem. Wuṛṛu su amatanna lai i mangitou mammasingkattu Watti'u Al᷊al᷊uassa udde su anambo manga ampungnga su Samaria.

²⁶Sangkatou mala'ekattu Mawu nabbisara si Filipus, “Ote amata'e! Roote watukku timukka su lal᷊anna apan uasampa'u Yerusalem wuṛṛu Gaza.” Lal᷊anna udde mal᷊annaba tawe damene.

²⁷Ne i Filipus inaite. Su tempo udde pia sangkatou tembonannu Etiopia apan tantal᷊anna u'amatta mappul᷊e watukku wanuane. Taumata udde sangkatou mammamanaran tembonanne apan mangngatokka wuṛṛu mallu'ada paa'alan Kandake ratu wanuan Etiopia. Taumata udde suete wuassu Yerusalem mattaṛṛamawu Ruata wuṛṛu orassa udde tantal᷊anna mabelengnga uasa'e keretane. Tantal᷊anna ua'ianna sulal᷊ummu kereta, i tou mabbasan Wuke Nabi Yesaya.

²⁹Ghaṛṛahon Ruata nabbisara si Filipus, “Roote pangundanin Kereta udde.”

³⁰Ne i Filipus inaite nangundanin Kereta udde see i tou naaringikka taumata udde mabbasan Wuken Yesaya. I Filipus naiwal᷊o si tou, “Tuangnga ma'asunna apa apan iwabbasan Tuangnga udde?”

³¹Taumata udde sinumimbakka, “Ereapa i ya'u maasunna, amungkangngu taweddu manal᷊a'a si ya'u?” See i tou nangahe si Filipus sinuma'e su kereta wuṛṛu inuma'ianna su adio'a ringanni tou.

³²Ete indi tatialane apan iwabbasan Tou, “I Tou naal᷊ihida ere domba apan aehetanna inai pototanna, naal᷊ihida ere ana'u domba apan tawe ṛumeo'a amungkangngu wambul᷊une huntinganna, ete aroddi i Tou tawe nabbisara saran sangka paddi.

³³I Tou nilobossa wuṛṛu niola'a ringannu tawe su ṛinone. Niawa-Ne nisawutta wuassu wowon runia na'oman sara taweddu sangkatou apan wotongnge mabatti'a su ola'u pabbawala-Ge.”

³⁴Tembonanne wuassu Etiopia udde nabbisara si Filipus, “Pasingkata'a si ya'u, isai apan su pandummu nabi indi? Watanganne sassane ara'e taumata waine?”

³⁵Ne i Filipus nanattakke mabbisara, i tou nappaattu manga tatialane udde ipanattaku Watti'u Al᷊al᷊uassa su ola'u Mawu Yesus su tembonanne wuassu Etiopia udde.

³⁶Su pattangngannu amatanne, itarua na'omate su sambau tampa pia ua'e. Tembonanne udde nabbisara, “Pa'ellega udde pia ua'e! apa lai auranganne tadea'u i ya'u saṛṛanianna?” [

³⁷I Filipus nabbisara, “Amungkangngu i Tuangnga mangngimanna ringannu naungnga atonna, i Tuangnga wotongnge saṛṛanianna.” “I Ya'u mangngimanna manungku Mawu Yesus Kristus eteudde Ana'u Ruata,” unnu tembonanne wuassu Etiopia udde.]

³⁸See i tou napa'ata'allu kereta udde, see itarua, i Filipus wuṛṛu tembonanne udde nilumintuka sulal᷊ummu ua'e wuṛṛu i Filipus nanaṛṛanite si tou.

³⁹Napawe i mangitou nilumapputa wuassu ua'e, Ghaṛṛahon Ruata nangal᷊appa si Filipus wua isudde. Tembonanne wuassu Etiopia udde tate naasilo si tou. Ringannu lulluassa tembonanne udde nanassukku amatanne.

⁴⁰Inaṛṛombanganne i Filipus uddete su Asdod. Wuṛṛu napawe i tou nanassukku amatanne, i tou mammasingkatu Watti'u Al᷊al᷊uassa su ola'u Mawu Yesus su al᷊awo'u soa na'oman sara i tou na'omate su Kaisarea.