Read Talaud WATTI'U MANGA RASUL 9 Bible Online

WATTI'U MANGA RASUL 9 - Talaud bible

WATTI'U MANGA RASUL 9

¹Tantal᷊anna udde i Saulus sidutu mangke ma'apulu mammansaga wuṛṛu mamate manga mallal᷊aṛṛenggennu Mawu Yesus. I tou inaite ringannu imam bahewa,

²wuṛṛu madorongnga surattu parenta inai su manga piaṛṛa'u wal᷊en pattataṛṛamawuannu taumatan Yahudi su Damsyik, tadea'u amungkangngu i tou maaratingnga poiaroddi manga taumatan apan mangngimanna Mawu Yesus, i tou wotongnge manametta wuṛṛu mangapiddi mangitou su Yerusalem.

³Tantal᷊anna mattudan Damsyik, napawe maraniten soa udde, inaṛṛombanganne sambau semakka wuassu langitta natuakka si Saulus.

⁴I tou nema'a su leta'a see naaringikka sambau tingikka mabbisara si tou, “Saulus, Saulus! Anio i'o mandal᷊eo si Ya'u?”

⁵“Isai I'o, Mawu?” aiwal᷊on Saulus. Tingikka udde sinumimbakka, “Ete i Ya'u Mawu Yesus, apan raddal᷊eoannu.

⁶Arawe orassa indi darisikke wuṛṛu suttate su soa. Isudde sarun iapaasingkatta si'o apa apan sarun manarannu.”

⁷Manga taumata apan uatantalongnga suadio'a ringanni Saulus, niṛṛumindu'a na'oman sara tawe napatuntingikka; ana waugu i mangitou naaringikka tingikka udde arawe tawe naasilo taumatane.

⁸See i Saulus dirumarisikka namu'a matane, arawe matane tate maasilo manga apa lai. Nariaddi i mangitou nangagassa limane wuṛṛu nangehette si tou sinumutta su Damsyik.

⁹Tallu allo al᷊annune i tou tawe maasilo wuṛṛu al᷊annune udde lai i tou tawe umanna wuṛṛu ma'inumma sarang kadio'a.

¹⁰Su Damsyik pia sangkatou mallal᷊aṛṛenggennu Mawu Yesus aranne i Ananias. Sulal᷊ummu sambau sondappa, Mawu nabbisara si tou. Mawu nabbisara, “Ananias!” Ananias sinumimbakka, “I ya'u, Mawu.”

¹¹Mawu nabbisara, “Otte inaite orassa indi. Roote watukku wal᷊en Yudas su Lal᷊anna Matul᷊ida. Iwal᷊oi poiaroddi taumata aranne i Saulus wuassu soan Tarsus. Taumata udde tantal᷊anna u'al᷊iomanna,

¹²wuṛṛu sulal᷊ummu sondappa udde i tou naasilo sangkatou esakka, aranne Ananias, nirumanta ringanni tou wuṛṛu namita si tou tadea'u i tou wotongnge maasilo apia.”

¹³Ananias sinumimbakka, “Mawu, i ya'u suete naaringikka manambo taumata uahahatton taumata indi, lembonete su ola'u pandal᷊al᷊eo apan niolangnge su saruannu walahanna su Yerusalem.

¹⁴Wuṛṛu su orassa indi tou nirumantate isindi, niwala manga imam tembonanne iapasametta anambon taumata apan mangngimanna Si'o.”

¹⁵Arawe Mawu nabbisara si Ananias, “Roote! Ana waugu i Ya'u suete namile si tou mangimbe si Ya'u, tadea'u i tou mamasingkatta su ola'u riri-U su manga walahanna waine apan agamane wal᷊ine Yahudi wuṛṛu su manga ratu wuṛṛu lai su walahannu Israel.

¹⁶Wuṛṛu i Ya'u sassane sarun mapaal᷊iatta'u anambon asasusa apan ṛinone apendamanni tou ana waugu i Ya'u.”

¹⁷Ne i Ananias inaite watukku wal᷊e udde wuṛṛu namitate si Saulus. “Tuṛṛangku Saulus,” unni Ananias, “Mawu Yesus apan niasiloannu su tangngan dal᷊anna su tempo tuṛṛangnga mattudan Damsyik, ete i Tou nandolo'u rumanta tadea'u tuṛṛangnga wotongnge maasilo apia wuṛṛu maasomba taṛṛinon Ghaṛṛahon Ruata.”

¹⁸Orassa udde lai pia sarannapa naal᷊ihida ere onappu inassa napallossa wuassu matan Saulus see i tou naasilote apia. Ne i tou napu'ote, see nissaṛṛanite.

¹⁹Wuṛṛu napawe sueten inumanna, i tou natohasse apia. I Saulus natana'a su Damsyik su adio'a ringannu mallal᷊aṛṛenggennu Mawu Yesus manga pira allo al᷊annune.

²⁰I tou lapiddu rudanta su manga wal᷊em pattataṛṛamawuanna wuṛṛu mannattake mabatti'a manungku ete Mawu Yesus udde Ana'u Ruata.

²¹Awada'alla naherangnga naaringikka si Saulus. I mangitou nabbisara, “Wal᷊inewe ete i tou indi su Yerusalem suete namate anambon taumata apan mangngimanna Mawu Yesus? I tou nirumanta isindi pandumanne manametta wuṛṛu mangapiddi mangitou su imam tembonanne!”

²²Arawe i Saulus mangke mattohassa wawohene. Manga tatiala apan niapaasilon tou su ola'u Mawu Yesus aroddi a'apangimananna manungku eteudde Mawu Yesus Ratum Punnu Sal᷊amatta, na'oman sara taumatan Yahudi apan uatana'a su Damsyik tawe maapanompolla.

²³Napawe nal᷊iu manga pira allo al᷊annune manga taumatan Yahudi na'ire mamate si Saulus.

²⁴Arawe ṛingiranni mangitou udde niasingkatanni Saulus. Allo ṛabbi i mangitou ual᷊aṛṛaddo su ngara pasallangannu soa tadea'u mapamate si tou.

²⁵Arawe su sambau ṛabbi, manga mallal᷊aṛṛenggenni Saulus nangal᷊appa si tou, see niul᷊ukka sulal᷊ummu sambau so'anna nalliu darandungngu soa.

²⁶I Saulus inaite watukku Yerusalem, wuṛṛu poiaroddi i tou maddea'a maammullu manga mallal᷊aṛṛenggennu Mawu Yesus. Arawe i mangitou matta'utti Saulus, ana waugu i mangitou tawe mangngimanna manungku atonna-tonna Saulus naola'e mallal᷊aṛṛenggennu Mawu Yesus.

²⁷Wua'udde i Barnabas nirumanta ringanni tou, see nangapiddi tou ringannu manga rasul. I Barnabas nabatti'a si mangitou ereapa i Saulus naasilo Mawu su tangngan dal᷊anna wuṛṛu ereapa Mawu nabbisara si tou. I Barnabas nabbatti'a lai su ola'u ereapa awawaṛṛanin Saulus mangngaṛṛa'a su Damsyik ringannu arannu Mawu Yesus.

²⁸Ne i Saulus natana'e ringanni mangitou, wuṛṛu mangngaṛṛa'e ringannu waṛṛani su ahewallu Yerusalem sulal᷊ummu arannu Mawu.

²⁹I tou mangngaṛṛa'a wuṛṛu uaaiwal᷊o lai ringannu manga taumatan Yahudi apan mabbisaran Yunani, arawe i mangitou maddea'a mamate si tou.

³⁰Su tempo manga taumata mangngimanna waine naasingkatta olangnge udde, i mangitou nangapidi Saulus watukku Kaisarea, wua'udde nandolokki tou watukku Tarsus.

³¹Ne jamaatta su ahewallu Yudea, Galilea, wuṛṛu Samaria nadamete. Ringannu pammamanaran Ghaṛṛahon Ruata, wuṛṛu matta'uttu Mawu, manga jamaatta udde lembo natohassa wuṛṛu a'atambanna anambone.

³²I Petrus nanute su al᷊awo'u tampa nattembo manga jamaatta. Su sambau allo i tou nattembo al᷊aṛṛana'u Mawu apan uatana'a su Lida.

³³Poiaroddi i tou nassomban sangkatou esakka aranne i Eneas, apan lome wuṛṛu tate maawangunna wuassu tampa atatiil᷊anne tallute tonna al᷊annune.

³⁴I Petrus nabbisara si Eneas, “Eneas, Mawu Yesus mapaapianu. Pabbangunte wuṛṛu sahangginte tattereannu.” Orassa udde lai i Eneas dirumarisikke.

³⁵Anambon tumana'u Lida wuṛṛu Saron naasilo si Eneas, see i mangitou sarangkanambone nangngimante Mawu Yesus.

³⁶Su Yope pia sangkatou wawine aranne i Tabita. I tou sangkatou apan mangngimanna Mawu Yesus. (Aranne sulal᷊ummu wisaran Yunani eteudde i Dorkas atappasanne rusa.) Inolaanni tou sidutu mapia wuṛṛu mantul᷊ungngu taumata asiangnga.

³⁷Su tempo udde i tou naradda'a see nate. Napawe winal᷊unanne nireno, i tou niaddo su wabbo'a ṛengkenne rosone.

³⁸Yope tawe marau wuassu Lida. Nariaddi su tempo manga mallal᷊aṛṛenggennu Mawu Yesus su Yope naaringikka i Petrus uatana'a su Lida, i mangitou nandolokku ruang katou inai ringanni Petrus ringannu tanata indi, “Paal᷊ihakka rumanta isindi.”

³⁹I Petrus lapiddu dirumarisikka wuṛṛu tinumantalongnga si mangitou. Na'oma poiaroddi, i tou niapidda su wabbo'a ṛengkenne rosone. Anambon bawine wal᷊u isudde naṛṛimpulunna si Petrus lapiddu lulluai wuṛṛu manta'e si tou manga laubba wuṛṛu manga jubah apan nitabbi'i Dorkas si mangitou su tempo i tou ta'e wiakka.

⁴⁰I Petrus nandolokki mangitou sarangkanambone sinumabangnga, see i tou inumal᷊intuda wuṛṛu inumal᷊iomanna. Wua'udde i tou sinumaruanna winal᷊unanni Dorkas wuṛṛu nabbisara, “Tabita, apu'ote.” Ne Dorkas inumaallate, wuṛṛu napawe i tou naasilo si Petrus, i tou inuma'ianna.

⁴¹See i Petrus namita limane wuṛṛu nantul᷊ungngi tou dirumarisikka. Wua'udde i Petrus namaggo manga taumata apan mangngimanna isudde suadio'a ringannu manga wawine wal᷊u udde, see nanantilli Dorkas apan nabbiakke udde si mangitou.

⁴²Watti'a su ola'u arariadianna udde nassal᷊iawukke su ahewallu Yope, na'oman sara manambo taumata mangngimanna Mawu Yesus maola'a Ratum Punnu Sal᷊amatti mangitou.

⁴³I Petrus uatana'a isudde manga pira allo lai su wal᷊en sangkatou mallal᷊aha pisi aranne i Simon.