Read Talaud ROMA 1 Bible Online

ROMA 1 - Talaud bible

ROMA 1

¹Manga tuṛṛangnga sarangkanambone su Roma apan arangnguannu Ruata wuṛṛu apan buatte niwagoannu Ruata maola'a al᷊aṛṛanang-Nge. Ruata buatte namile wuṛṛu i ya'u sassane niapaatenega mammasingkattu Watti'u Al᷊al᷊uassa wuassu Ruata.

²Watti'u Al᷊al᷊uassa udde buatte nipa'iren Duata su tempo rorone sulal᷊ummu manga nabi-Ne wuṛṛu nawoṛṛette sulal᷊ummu Wuke Susi.

³Watti'u Al᷊al᷊uassa udde mabbatti'u Ana'u Ruata, eteudde Mawun kite Yesus Kristus. Su ola'u saṛṛene ere taumata, i Tou walahanni Daud,

⁴arawe su ola'u saṛṛen pangangimanna i Tou udde Ana'u Ruata. Udde nilumiatta'a sulal᷊ummu taṛṛino apan wahewalla sulal᷊ummu pabbawangun-Ne wuassu papate.

⁵Sulal᷊ummi Tou lai Ruata nangonggolu al᷊amatta si ya'u maola'a rasul, tadea'u i ya'u — mangadatta Mawu Yesus — mangngehetta manga taumata wuassu al᷊awo'u walahanna tadea'u mangngimanna wuṛṛu tumuṛṛutta.

⁶Pandumannu wisara al᷊awo'u walahanna eteudde i yamiu lai apan uatana'a su Roma; i yamiu lai buatte niwagoanna maola'a taumatan Mawu Yesus Kristus.

⁷Ana waugu udde i ya'u namoṛṛettu suratta indi si yamiu. Antimanna Ruata Iamangngi ite wuṛṛu Mawu Yesus Kristus mangonggolu al᷊amatta wuṛṛu al᷊al᷊uassa si yamiu.

⁸Paarorone sulal᷊ummi Yesus Kristus, i ya'u maadiangkamanna su Ruata ana waugu manga tuṛṛangnga sarangkanambone; ana waugu ahewallu runia naaringikke manungku i yamiu mangngimanna atonna su Mawu Yesus Kristus.

⁹I ya'u sidutu uanaungnga si yamiu amungkangngu i ya'u umal᷊iomanna. Ruata matatialane manungku apa apan iwabbatti'u udde atonna. Tumba'u i Tou Ruata apan sassubbangku ringannu ahewallu naungku ringannu namasingkattu Watti'u Al᷊al᷊uassa su ola'u Anang-Nge.

¹⁰I ya'u sussal᷊ande ringannu atonna su Ruata, antimanna i Tou mamala'u orassa indi inai mattembo si yamiu.

¹¹Ana waugu i ya'u mangke maapulu atonna maisasomban kamiu tadea'u i ya'u wotongnge mattahia darangngu wuassu Ghaṛṛahon Duata ipannohassa si yamiu.

¹²Pandumangku eteudde ana waugu i ite su sambau buatte nangimanna Mawu Yesus Kristus, ne i ite wotongnge lai uatatohassa sangkatou ringannu sangkatou.

¹³Manga tuṛṛangnga! I ya'u maapulu tadea'u i yamiu maasingkata manungku masokkate i ya'u pia pandumma mattembo si yamiu arawe sidutu mangke pia hal᷊ahene. I ya'u maapulu tadea'u su wallatti yamiu lai, manara'u pia gessine ere lai manara'u apan buatte nabbua su wallattu manga taumata apan wal᷊ine Yahudi su manga tampa waine.

¹⁴Ana waugu i ya'u pia manara'u su saruannu al᷊awo'u walahanna; apan pia addanne wuṛṛu ta'e lul᷊u, apan pia asingkanne ara'e lai apan taambe asingkanne.

¹⁵Ana waugu udde i ya'u maapulu atonna mamasingkattu Watti'u Al᷊al᷊uassa udde si yamiu apan uatana'a su Roma lai.

¹⁶I ya'u mangngimanna atonna Watti'u Al᷊al᷊uassa udde, ana waugu Watti'a udde atatohassu Ruata ipanal᷊amatta anambon taumata apan mangngimanna; paarorone taumatan Yahudi, wuṛṛu walahanna waine lai.

¹⁷Ana waugu ringannu Watti'u Al᷊al᷊uassa udde Ruata napaal᷊iatta'a ereapa lal᷊anne paa'aukku taumata ringannu Ruata maola'a apia; lal᷊anne eteudde ringannu mangngimanna Ruata, wuassu panattaṛṛanne saran pangudusanne. Udde ere lai uawoṛṛetta sulal᷊ummu Wuke Susi, “Taumata apan mangngimanna Ruata ma'oman sara paa'aukka ringannu Ruata maola'a mapia, taumata udde sarun masal᷊amatta!”

¹⁸Wuassu surga Ruata napaal᷊iatta'u asasa'u-Ne su anambon rosa wuṛṛu al᷊al᷊eon taumata, ana waugu al᷊al᷊eo mannal᷊are taumata ma'illal᷊a al᷊aṛṛa'u Ruata apan atonna.

¹⁹Apa apan wotongnge asingkatannu taumata su ola'u Ruata natualage sulal᷊ummu naungngu taumata, ana waugu Ruata sassane napaal᷊iatta'a su taumata.

²⁰Ro'en Duata nandiaddi runia, pallal᷊agun Duata apan tawe asiloanna, eteudde olangnge ere Ruata wuṛṛu taṛṛino-Ne apan uatialu, wotongnge asunnannu taumata wuassu al᷊awo'u niriaddianne. Nariaddi taumata tawe pangaiananne mapaaṛṛinon batanganne.

²¹Taumata maaillal᷊a Ruata, arawe taumata maddiri mangadata ere sangkatou Ruata wuṛṛu tawe lai maadiangkamanna. Arawe taumata sidutu maṛṛingiddu al᷊awo'a apan tawe gunane; naungngi mangitou nadandumpe.

²²I mangitou mammendamma manungku i mangitou pandete, wutte'e i mangitou woddo.

²³Wal᷊inewe Ruata apan uata'a sassubanni mangitou, ewe'e manga paal᷊uanna apan naal᷊ihida riadianna apan wotongnge mate; eteudde taumata, manu'u winalanganna, winatangnga leddane appata wuṛṛu winatangnga apan tuttondon roone.

²⁴Ana waugu udde Ruata namala mangitou tuttuṛṛutta apulu naungngi mangitou ma'ola'a al᷊al᷊eo na'oman sara i mangitou lai ma'ola'a al᷊al᷊eo su sansul᷊ungngu taumata.

²⁵Ruata apan naṛṛino, nihantianni mangitou ringannu sarannapa awusu. Wal᷊ine mandariaddi ewe'e apan niriaddine udde sassubanna wuṛṛu a'imbeanni mangitou. Sumbal᷊i iapa nandiaddi udde apan ṛinone raloanna sarangkal᷊o'engnge! Amin.

²⁶Ana waugu taumata inolaanne aroddi, ne Ruata namalan mangitou tuttuṛṛutta apulun mangitou apan lal᷊eo. Manga wawinen mangitou maddirite manga esakka ere lai inanaramannu taumata ewe'e uaa'apulute wawine rundussa wawine.

²⁷Aroddi lai esakka, i mangitou tate lai uaa'apulun wawine, ewe'e apulun mangitou tumba'u su esakka rundussa esakka. Esakka ma'ola'a inolaanna apan maasili su saruannu rundussa esakka, na'oman sara i mangitou manengkamma wawal᷊ine uasul᷊ungngu inolaanne apan lal᷊eo udde.

²⁸Ana waugu taumata maddirite lai ma'illal᷊a Ruata, ne Ruata namalaten ṛingiddi mangitou malal᷊eo, na'oman sara i mangitou ma'ola'a manga inolaanna apan ṛinone tawe wotongnge olaanna.

²⁹Naungngi mangitou napenen al᷊awo'u al᷊al᷊eo, al᷊awo'u awusu; napenen awawal᷊iu, awawukku'a, wuṛṛu mannihikka taumata waine, napenen apulu mamate, uawawul᷊o, mallinga wuṛṛu mangngune. I mangitou apulune ma'umbilangngu taumata waine,

³⁰apulune mandal᷊eo arannu taumata waine; i mangitou mawunga wuṛṛu tawe atoranne, apan maddantinnu Ruata wuṛṛu mataṛṛupassi. I mangitou pande madea'a lal᷊anne wakku ipadea'a al᷊al᷊eo. I mangitou lullawanna timmadde;

³¹i mangitou maddiri massunna taumata waine; i mangitou mal᷊awangnga wuṛṛu tawe apedamma mantul᷊ungngu taumata.

³²I mangitou masingkata manungku tumuṛṛuttu titan Duata, taumata apan ma'ola'a sarangkanambone udde ṛinone iṛṛuumanna pateanna. Salaiwe aroddi, i mangitou ta'e lai ma'ola'a inolaanna udde; wuṛṛu ewe'e inumire lai amungkangngu taumata waine ma'ola'a udde.