Read Talaud ROMA 10 Bible Online

ROMA 10 - Talaud bible

ROMA 10

¹Manga tuṛṛangnga! I ya'u maapulu atonna tadea'u walahangku masal᷊amatta. Wuṛṛu i ya'u atonna-tonna u'al᷊iomanna su Ruata huna mangitou.

²I ya'u waṛṛani mabbisara manungku i mangitou mal᷊utu atonna mattaṛṛamawu Ruata. Arawe apulun mangitou udde tawe pinangiananne wuassu asingkattu Ruata.

³I mangitou wagga olangnge Ruata ma'ola'a paa'aukku taumata ringanni Tou maola'a apia. Wuṛṛu ana waugu i mangitou maapulu tumuṛṛutta apulun mangitou sassane, ne i mangitou maddiri tumuṛṛutta su lal᷊anna apan niaṛṛa'u Ruata.

⁴Titan agama buatte nitipussi Kristus. Nariaddi suapan taumata apan mangngimanna si Kristus, paa'aukki mangitou ringannu Ruata maola'a apia.

⁵Musa namoṛṛetta manungku taumata apan uasasangkapia ringannu Ruata pinangiananne wuassu titan agama, taumata udde sarun mabbiakka ana waugu tutuṛṛutta titan agama udde.

⁶Arawe su ola'u lal᷊annu taumata masasangkapia ringannu Ruata pinangiananne mangngimanna Ruata, Wuke Susi namasingkata arendi, “Ariete i'o mabbisara sulal᷊ummu naungngu, ‘Isai apan sarun masengkengnga su surga?’ (atappasanne mangapiddi Kristus sumossokka),

⁷ara'e, ‘Isai apan sarun sumossokka su runian taumata nate?’ (atappasanne mappaawiakki Kristus wuassu papate).”

⁸Pandumanne arendi, “Watti'a wuassu Ruata udde marani atonna ringanni yamiu; su moṛṛongngu wuṛṛu sulal᷊ummu naungngu.” Eteudde watti'a apan iapaasingkati yami, watti'a manungku taumata ṛinone mangngimanna.

⁹Ana waugu amungkangngu tuṛṛangnga mangnga'u ringannu moṛṛongngu manungku “Yesus udde Mawu”, wuṛṛu i'o mangngimanna sulal᷊ummu naungngu manungku Ruata buatte napaawiakku Mawu Yesus wuassu papate, i'o sarun masal᷊amatta.

¹⁰Ana waugu ringannu naungnge taumata mangngimanna, na'oman sara Ruata nanengkamma si tou naola'a sangkatou taumata apan uasasangkapia Ruata. Wuṛṛu ringannu moṛṛongnge taumata mangnga'u, na'oman sara i tou naasomba asasal᷊amatta.

¹¹Sulal᷊ummu Wuke Susi uawoṛṛetta, “Taumata apan mangngimanna tawe iapaasusa.”

¹²Udde mariaddi su anambon taumata, ana waugu tawe paṛṛalane taumatan Yahudi wuṛṛu taumatan walahanna waine. Ruata apan sambau eteudde Ruatan anambon taumata. I Tou mangngonggolu al᷊amatta manambo-nambo su anambon taumata apan ma'itul᷊ungnga si Tou.

¹³Sulal᷊ummu Wuke Susi uawoṛṛetta, “Anambon taumata apan madorongnga su Mawu, sarun masal᷊amatta.”

¹⁴Arawe ereapa lal᷊anne taumata wotongnge maitul᷊ungnga su Mawu amungkangngu i mangitou taambe nangimanna? Wuṛṛu ereapa i mangitou wotongnge mangngimanna Mawu amungkangngu i mangitou taambe naaringikka su ola'i Tou? Wuṛṛu ereapa lai i mangitou wotongnge maaringikka Watti'u Mawu amungkangngu tawedu mamasingkata?

¹⁵Wuṛṛu ereapa taumata wotongnge mangapiddu watti'a udde amungkangngu i mangitou tawe nirolokka? Sulal᷊ummu Wuke Susi uawoṛṛetta arendi, “Apiawe eteapa daranta manga taumata apan uaapiddu Watti'u Al᷊al᷊uassa wuassu Ruata!”

¹⁶Arawe tawe anambon taumata mannengkamma Watti'u Al᷊al᷊uassa udde. Ana waugu Yesaya nabbisara, “Mawu, isaite apan mangngimanna watti'i yami?”

¹⁷Ana waugu udde manga taumata mangngimante ana waugu i mangitou naaringikke watti'a, wuṛṛu watti'a niaringiṛṛana ana waugu pia taumata apan namasingkata su ola'i Kristus.

¹⁸Arawe i ya'u maiwal᷊o: Atonnawe i mangitou taambe naaringikka watti'a udde? Atonna buatte! Ana waugu sulal᷊ummu Wuke Susi uawoṛṛetta arendi, “Tingikki mangitou niaringiṛṛante su ahewallu runia, manga wisaran mangitou na'omate sara petakku runia.”

¹⁹I ya'u maiwal᷊o apia: Apa walahannu Israel taambe naasingkata? Wala'e aiwal᷊o udde paarorone simbaṛṛani Musa. Musa nabbisara, “Arendi lai unnu Ruata, ‘I Ya'u sarun ma'ola'a si yamiu tawe mal᷊uassa su saruannu sambau walahanna apan wal᷊ine al᷊aṛṛana-U wuṛṛu i Ya'u sarun ma'ola'a si yamiu masa'u su walahanna apan longonna.’ ”

²⁰Yesaya lembon waṛṛani lai. I tou nabbisara, “Arendi lai unnu Ruata, ‘Manga taumata tawe madea'a si Ya'u, buatte nassomba-U; wuṛṛu i Ya'u nattingkapasilon riri-U si mangitou apan tawe maiwal᷊o-U.’ ”

²¹Arawe su ola'u walahannu Israel Yesaya nabbisara, “Arendite unnu Ruata, ‘Su al᷊o'engngu allo i Ya'u mangngul᷊ukku lima-U su sambau walahanna apan mal᷊awangnga wuṛṛu tawe tumuṛṛutta.’ ”