Read Talaud ROMA 13 Bible Online

ROMA 13 - Talaud bible

ROMA 13

¹Suapan taumata ṛinone matuṛṛutta su tembonanne, ana waugu tawe tembonanne apan tawe naasomba taṛṛino wuassu Ruata. Wuṛṛu tembonanne apan uaparenta orassa indi, mappaamattu manarane wuassu darolokku Ruata.

²Ana waugu udde taumata apan mannompol᷊la tembonanne udde, nassul᷊ungngu lai mannompol᷊la apa apan suete tinantunnu Ruata. Wuṛṛu taumata apan ma'ola'a aroddi sarun iṛṛuumanna.

³Ana waugu taumata apan ma'ola'a apapia arie mata'uttu tembonanne. Tumba'u taumata apan ma'ola'a al᷊al᷊eo apan ṛinone mata'utta. Amungkangngu i'o maapulu tadea'u i'o tawe mata'uttu tembonanne, i'o ṛinone ma'ola'a apapia, ne i'o sarun raloanna.

⁴Ana waugu tembonanne udde, allangngu Ruata apan mammanara hunane ipadde'a apapianu. Arawe amungkangngu i'o ma'ola'a al᷊al᷊eo, i'o ṛinone mata'utti tou, ana waugu wal᷊inewe tawe mangal᷊ene i tou maṛṛuumannu taumata. Ete i tou allangngu Ruata, apan mangngonggolu ṛuumannu Ruata su manga taumata apan ma'ola'a al᷊al᷊eo.

⁵Ana waugu udde ṛinone i'o matuṛṛutta tembonanne — wal᷊ine tumba'u ana waugu i'o maddiri iṛṛuumanna, arawe ana waugu ahewallu apulun naungngu.

⁶Eteudde lai pinangiananne anio tuṛṛangnga mammaekka wose, ana waugu tembonanne udde mamamanaran Duata apan mappaamattu manaran Mawu indi.

⁷Nariaddi waeṛṛete su tembonanne apa apan ṛinone tuṛṛangnga mamaekka si tou. Waeṛṛete wose, amungkangngu tuṛṛangnga ṛinone mamaekka wose, wuṛṛu waeṛṛete beane amungkangngu tuṛṛangnga ṛinone mamaekka bea. Imbei i mangitou apan ṛinone imbeanna wuṛṛu aaddatewe i mangitou apan ṛinone addatanna.

⁸Imbaṛṛangnga pia awallasa sisai-sai, tabene'e uawawallasa darangngu sangkatou ringannu waine. Ana waugu taumata apan marangngu su sansul᷊ungnge taumata, buatte nanuungngu anambon titan Musa.

⁹Ana waugu titan agama Yahudi eteudde: Imbaṛṛangnga sumandaga, imbaṛṛangnga mamate, imbaṛṛangnga manna'o, imbaṛṛangnga numemman sarannapan taumata waine; sarangkanambone udde niammulle ringannu tita waine, suete nisari tumbau naola'a tita sambau eteudde, “Pandangngu sansul᷊ungngu taumata ere lai i'o mandangngu ririnu sassane.”

¹⁰Taumata apan mandangngu taumata waine tawe ma'ola'a al᷊al᷊eo su taumata udde. Nariaddi taumata apan mandangngu sansul᷊ungnge eteudde taumata apan suete tinumuṛṛutta anambon titan agama.

¹¹Su liuddu sarangkanambone udde i yamiu maasingkata manungku tempo indi eteudde temponu mapu'o wuassu atatiilla. Ana waugu tempone i ite iapaasal᷊amatta maranite orassa indi, wuassu i ite wakkute mannattaka mangngimanna.

¹²Ṛabbi maranite mal᷊iudda; wuṛṛu ete lai adio'a allote. Nariaddi mappianne i ite mangillol᷊o ma'ola'a inolaanna apan marandumma. I ite ṛinone mapaasuungngu watanganni ite ringannu ahiddu asasemakka.

¹³I ite ṛinone ma'ola'a inolaanna apan aaddatanna ere su inanaramanne a'olaannu taumata su tempo allo; imbaṛṛangnga maddamea tumaniten manampal᷊iu, ara'e mabbu'anna. Imbaṛṛangnga sumandaga, ara'e pia pallal᷊agu tawe addane. Imbaṛṛangnga mabbawul᷊o, ara'e mangune.

¹⁴Wala'e Mawu Yesus Kristus mangatokku apa apan sarun olaanna. Wuṛṛu imbaṛṛangnga tumuṛṛutta pallal᷊agun taumata marosa ipamatu'a apulun naungnga.