Read Talaud ROMA 15 Bible Online

ROMA 15 - Talaud bible

ROMA 15

¹I ite apan atonna-tonna pia antimma su pangangimanni ite, ṛinone masabare su al᷊awo'u wisaran taumata apan lome pangangimanne. Ariewe i ite tumba'u maapulu malluassa watanganni ite sassane.

²Arawe i ite sambau-sambau ṛinone malluassa naungngu tuṛṛangngi ite su apapiane, tadea'u pangngangimanne aatambanna atohanne.

³Ana waugu Kristus lai tawe maṛṛingiddu al᷊al᷊uassu riri-Ne sassane. Sulal᷊ummu Wuke Susi uawoṛṛetta arendi, “Al᷊awo'u al᷊uandaga apan nipangal᷊uandaga si'o, naṛṛia'e si ya'u.”

⁴Sarangkanambone apan nawoṛṛette sulal᷊ummu Wuke Susi udde ipannantiro si ite. Ana waugu al᷊aṛṛa'a apan nisengkammi ite wuassu Wuke Susi mammal᷊u si ite maola'a masabbare wuṛṛu matohassa na'oman sara i ite wotongnge mangngantimma Ruata.

⁵Sal᷊andeanna su Ruata apan mangonggolu asasabare wuṛṛu lal᷊imbata su taumata, mantul᷊ungngi yamiu mabbiakka su paa'aukka tumuṛṛuttu tul᷊adan Kristus Yesus.

⁶Ringannu naungnga sambau tuṛṛangnga sarangkanambone wotongnge maddalo Ruata, Iamangngu Mawun kite Yesus Kristus.

⁷Ana waugu udde ṛinone manga tuṛṛangnga uararingikka sangkatou ringannu waine ringannu naungnga mal᷊uassa, ere lai Kristus nanal᷊oho si yamiu ipaddalo Ruata.

⁸Ana waugu, paanaunge, manungku Kristus suete nangimbe taumatan Yahudi tadea'u mapaal᷊iatta'a manungku Ruata atonna mannuungngu paaire-Ne su iupungngu al᷊amonan kite.

⁹Mawu Yesus lai na'ola'a manga walahanna waine mammantuga Ruata ana waugu apapia naungnge si mangitou. Sulal᷊ummu Wuke Susi uawoṛṛetta arendi, “Ana waugu udde i ya'u maddalo Si'o su wallattu manga walahanna, i ya'u sarun mangantari aantarin daralo ipaddalo aran-Nu.”

¹⁰Pia lai uawoṛṛetta arendi, “Lalluasse suadio'a ringannu al᷊aṛṛana'u Ruata apan napile, ei manga walahanna!”

¹¹Wuṛṛu indi lai, “Paddalote Ruata, ei anambon walahanna, ṛinone anambon taumata maddalo si Tou!”

¹²Wuṛṛu indi lai apan niwal᷊on Yesaya, “Wuassu papapulunni Isai sarun rumanta sangkatou taumata apan sarun mamarenta manga walahanna; wuṛṛu ete si Tou manga walahanna udde sarun mangantimma.”

¹³Ete Ruata apan pangngantimanni yamiu. Sal᷊andeanna i Tou malloṛṛo naungngu ringannu al᷊al᷊uassa wuṛṛu paddarame ana waugu i yamiu mangngimanna, tadea'u ringannu taṛṛinon Ghaṛṛahon Duata i yamiu lembo mangngantimma Ruata.

¹⁴Manga tuṛṛangku! I ya'u mangngimanna manungku manambo atonna apapia si yamiu. I yamiu lai masingkatu sarangkanambone wuṛṛu wotongnge lai mangaṛṛa'a sandingananna.

¹⁵Arawe su ola'u manga inolaanna apan suete nitantunna, i ya'u mapaanaungnga si yamiu ringannu atonna sulal᷊ummu suratta indi, ana waugu Ruata buatte nangonggolu manara udde si ya'u.

¹⁶I Tou buatte na'ola'a si ya'u mangangimben Kristus Yesus tadea'u irolokka su manga walahanna apan wal᷊ine Yahudi. Wuṛṛu i ya'u naola'a sangkatou imam, apan mammasingkattu Watti'u Al᷊al᷊uassa wuassu Ruata, tadea'u manga taumata apan wal᷊ine Yahudi maola'a sambau sasamba su Ruata apan wotongnge sengkamanni Tou. Doronganna Ghaṛṛahon Duata ma'ola'a si mangitou sambau sasamba apan apianne su Ruata sassane.

¹⁷Nariaddi, ana waugu i ya'u suete naaukka ringanni Kristus Yesus, ne i ya'u wotongngete lumuassu manara'u indi su Ruata.

¹⁸I ya'u waṛṛani mabbisara aroddi tumba'u su ola'u apa apan buatte niola'i Kristus si Ya'u ipa'ola'a manga taumata wal᷊ine Yahudi tuttuṛṛutta Ruata. I ya'u mammanara udde ringannu manga wisara ara'e lai ringannu manga inolaanna see lai pallal᷊agu,

¹⁹wuṛṛu manga al᷊aṛṛindu'a wuṛṛu manga inolaanna apan wahewalla; sarangkanambone udde wuassu taṛṛinon Ghaṛṛahon Ruata. Watti'u Al᷊al᷊uassa su ola'u Mawu Yesus suete ta'u niapaasingkatta su anambon taumata, nanattaka wuassu Yerusalem na'oman sara watukku Ilirikum.

²⁰Apulu'u eteudde mamasingkatu Watti'u Al᷊al᷊uassa wuassu Ruata su manga tampa suapan taumata taambe naaringikka si Kristus. Ana waugu i ya'u maddiri mapararisikku manara su rapappake apan niaddon taumata waine.

²¹Sulal᷊ummu Wuke Susi uawoṛṛetta, “Manga taumata apan taambe naaringikka watti'a su ola'i Tou, sarun maasilo; wuṛṛu i mangitou apan taambe naaringikka, sarun maasunna.”

²²Ana waugu udde, i ya'u masokkate aal᷊imbatanna inai mattembo si yamiu.

²³Arawe orassa indi manara'u su wageangngu manga wageangu leta'a udde nasuete. Pirate tonna nangkal᷊iu i ya'u maapulu mattembo si yamiu.

²⁴Paṛṛangatte amungkangngu i ya'u sumabbi soa atatanaannu sulal᷊ummu amatangku watukku Spanyol, i ya'u mangantimma wotongnge maissomban kamiu wuṛṛu lumuassa tal᷊an kadio'a ringanni yamiu. Wua'udde i ya'u mangantimma yamiu wotongnge mallal᷊ima si ya'u su amatangku watukku Spanyol udde.

²⁵Arawe orassa indi ya'u maapulu inai watukku Yerusalem mangapiddu sasumbala su jamaattu Ruata poiaroddi.

²⁶Ana waugu manga jamaatta su Makedonia wuṛṛu Akhaya maapulute mangonggolu sasumbala su manga tuṛṛangnga apan asiangnga su wallattu jamaattu Ruata su Yerusalem.

²⁷Ringannu naungnga mal᷊uassa i mangitou nakkawessa ma'ola'a udde. Atonna ṛinone i mangitou mantul᷊ungngu manga tuṛṛangnga apan asiangnga su Yerusalem; ana waugu wuassu manga taumatan Yahudi udde, manga taumata wal᷊ine Yahudi buatte nanengkamma al᷊amatta wuassu Ruata. Nariaddi manga taumata wal᷊ine Yahudi ṛinone lai mantul᷊ungngu taumatan Yahudi ringannu manga al᷊amatta ere manga darotongnga.

²⁸Amungkangngu i ya'u buatte nanginsue manara'u indi, wuṛṛu manantilla si mangitou apan uatana'a su Yerusalem sasumbala apan buatte niammulla udde, ne i ya'u inaite watukku Spanyol sumabbi soa atatanaannu.

²⁹Amungkangngu i ya'u rumanta ringannu, sulal᷊ummete i ya'u rumanta mangapiddu manambo al᷊amatta wuassi Kristus si yamiu.

³⁰Ringannu arannu Mawun kite Yesus Kristus, wuṛṛu ringannu darangngu apan nionggolu Ghaṛṛahon Duata, i ya'u sumal᷊ande si yamiu, doronganna i yamiu suadio'a u'al᷊iomanna su Ruata hunan manara'u.

³¹Aal᷊iomante tadea'u Ruata mamallossu riri'u wuassu lima manga taumata apan tawe mangngimanna su Yudea, wuṛṛu tadea'u manara'u ipangapiddu sasumbala watukku Yerusalem itarimmatu al᷊aṛṛana'u Ruata ringannu naungnga mal᷊uassa poiaroddi.

³²Ringannu aroddi, amungkangngu Ruata maapulu, i ya'u wotongnge rumanta ringanni yamiu, ringannu naungnga mal᷊uassa. Wuṛṛu i ya'u wotongnge maapendama al᷊al᷊uassu naungnga su pattangnganni yamiu.

³³Antimanna Ruata, apan nangonggolu paddarame su taumata, uatana'a ringanni yamiu sarangkanambone. Amin.