Read Talaud ROMA 16 Bible Online

ROMA 16 - Talaud bible

ROMA 16

¹I ya'u maapulu mamasingkatta si yamiu su ola'u tuṛṛangngi ite, Febe. I tou massumbala jamaatta su Kengkrea.

²Tarimmata'e i tou ere sangkatou wuassu jamaattu Mawu. Ne aroddite manga taumata apan mangngimanna Ruata ṛinone uatatarimmata sangkatou ringannu sangkatou. Tul᷊ungaawe i tou, amungkangngu i tou mappandumma sasumbala wuassi yamiu, ana waugu i tou sassane suete nangonggolu sumbala su taumata nambo — nareengnga lai ya'u.

³Wal᷊oa'a tabea'u si Priskila wuṛṛu si Akwila, manga hawe'u apan suadio'a mammanara manaran Kristus Yesus.

⁴I mangitou maraniten mate, ana waugu maapulu manal᷊amatta sia'u. I ya'u maadiangkamanna si mangitou — wuṛṛu wal᷊ine tumba'u i ya'u, arawe anambon jamaatta wuassu walahanna waine apan wal᷊ine Yahudi lai maadiangkamanna si mangitou.

⁵Wal᷊oa'a lai tabea'u su jamaatta apan uasemodda su wal᷊en mangitou. Tabea si Epenetus apan aranguangku. Ete i tou taumata apan paarorone nangimanna si Kristus su leta'u Asia.

⁶Tabea'u lai si Maria. I tou suete nammanara maṛṛimada ana waugu yamiu.

⁷Wal᷊oa'a lai tabea'u si Andronikus wuṛṛu si Yunias. Itarua wuṛṛu i ya'u papapulunnu sangkatou wuṛṛu buatte niṛṛuumanna su sampunna. Tantal᷊anna i ya'u taambe nangimanna si Kristus, i mangitou doronete nangimanna. I mangitou tinumelengnga su wallattu manga rasul.

⁸Tabea si Ampliatus, arangnguangku, ana waugu i tou susampunna ringangku su sambau ringannu Ruata.

⁹Wal᷊oa'a tabea'u si Urbanus, hawen kite apan mammanara su sampunna ringanni ite ana waugu Kristus. Wuṛṛu tabea'u lai si Stakhis apan arangnguangku.

¹⁰Tabea'u si Apeles. Tatuṛṛunne si Kristus niatialante. Tabea lai su lal᷊oṛṛon bal᷊e Aristobulus,

¹¹wuṛṛu si Herodion. Iambua walahanna sambau. Aroddi lai tabea'u su manga tuṛṛangnga pangangimanna sambau su wal᷊en Narkisus.

¹²Tabea'u si Trifena wuṛṛu si Trifosa apan mammanara maṛṛimadda mangngimbe Mawu, wuṛṛu si Persis apan arangnguangku. I tou lai suete nammanara maṛṛimadda manara Mawu.

¹³Tabea si Rufus wuṛṛu inangngene, apan iwaratta si ya'u ere inangku sassane. Eteudde Rufus taumata nipile Mawu wuṛṛu raddaloanna.

¹⁴Wal᷊oa'a lai tabea'u si Asinkritus, Flegon, Hermes, Patrobas, Hermas wuṛṛu tuṛṛangnga sarangkanambone apan pangangimanna sambau ringanni mangitou.

¹⁵Tabea si Filologus wuṛṛu Yulia; si Nereus wuṛṛu tuṛṛangnge wawine; si Olimpas wuṛṛu anambon taumata mangngimanna suadio'a ringanni mangitou.

¹⁶Patatabeate ringannu uararangngu su pasasangkatuṛṛangannu taumatan Saṛṛani. Anambon jamaatti Kristus nananatan tabean mangitou su manga tuṛṛangnga.

¹⁷Manga tuṛṛangnga! I ya'u sumal᷊ande ringannu lembone: Paatehamma su saruannu manga taumata apan ma'ola'a patatatiakka wuṛṛu mannongkakku pangangimannu taumata su Mawu. Olangnge udde uapapaṛṛala apa apan buatte niaṛṛa'a si yamiu. Arie paggawei taumata ereudde.

¹⁸Ana waugu manga taumata inolaanne aroddi, wal᷊inewe mammanara manaran Kristus Mawun kite, ewe'e tumba'u mappaal᷊uassu apulu naungngi mangitou sassane. Ringannu sasal᷊o'a wuṛṛu manga wisara apan mapia, i mangitou mammahia manga taumata apan waggan apa-apa.

¹⁹Anambon taumata naasingkate manungku i yamiu matuṛṛuta su al᷊aṛṛa'u Watti'u Al᷊al᷊uassa wuassu Ruata. Wuṛṛu i ya'u mal᷊uassa su inolaanni yamiu udde. I ya'u maapulu tadea'u i yamiu pande su inolaanna apan mapia, wuṛṛu longonna su inolaanna apan lal᷊eo.

²⁰Ruata apan nangonggolu paddarame su taumata, mal᷊ihakke mandolokku Setanna massuṛṛubawa su taṛṛinonu wuṛṛu maṛṛimunsa'a si tou. Antimanna manga tuṛṛangnga sidutu aal᷊amatanni Yesus Kristus Mawun kite!

²¹Timotius, hawe'u nabbal᷊on tabeane si yamiu. Aroddi lai Lukius, Yason wuṛṛu Sosipater, i yami indi walahanna sambau.

²²Namoṛṛettu suratta indi eteudde i ya'u, Tertius. I ya'u nabbal᷊on tabean pasasangkatuṛṛangnga si yamiu.

²³Gayus napaapiddu tabea lai si yamiu. I ya'u uatana'a su wal᷊ene wuṛṛu jamaatti yami lai mattaṛṛamawu isudde. Erastus, tembonannu mananahipunna roittu soa, napaapiddu tabeane lai si yamiu. Aroddi lai tuṛṛangngi ite Kwartus. [

²⁴Antimanna Mawun kite Yesus Kristus mangal᷊amatta tuṛṛangnga sarangkanambone. Amin.]

²⁵Daralo su Ruata! I Tou uataṛṛino mannohassa pangangimannu tuṛṛangnga nassul᷊ungngu Watti'u Al᷊al᷊uassa wuassu Ruata apan ta'u iapaasingkatta su ola'u Yesus Kristus. I ya'u namasingkatu watti'a udde nassul᷊ungngu ere apa apan niapaal᷊iatta'u Ruata; eteudde su ola'u paa'apulun Ruata apan mal᷊annute awaganannu taumata.

²⁶Arawe orassa indi, wuassu darolokku Ruata sassane, pandumanne udde buatte niapaal᷊iatta'a wuṛṛu niapasingkata su anambon walahanna ere suete niwoṛṛettu manga nabi, tadea'u i mangitou sarangkanambone mangngimanna wuṛṛu tumuṛṛutta Ruata.

²⁷Ete i Tou Ruata tinggassa, i Tou lembon apandeanne. Antimanna i Tou wantuhanna sarangkal᷊o'engnge sulal᷊ummu Mawu Yesus Kristus! Amin. Tabea wuassi yami, Paulus, allangngi Kristus Yesus