Read Talaud ROMA 2 Bible Online

ROMA 2 - Talaud bible

ROMA 2

¹Ana waugu udde, manga tuṛṛangnga, isai i'o tuṛṛangnga, na'oman sara i'o tuṛṛangnga maapulu mapaasal᷊an taumata waine? Tuṛṛangnga tawe ahidda ipallindumma ririnu. Ana waugu amungkangngu i'o mapaasal᷊an taumata waine, sumbal᷊i tuṛṛangnga sassane ma'ola'a ere inolaanni mangitou, ne tuṛṛangnga naṛṛuumannu watangannu sassane lai.

²I ite masingkata manungku amungkangngu Ruata maṛṛuumannu manga taumata apan inolaanne ereudde, apan niola'u Ruata udde tawe sal᷊ane.

³Arawe i yamiu, manga tuṛṛangnga, ma'ola'a sassane lai manga inolaanna apan ipangngansilli yamiu su manga taumata waine! Wuṛṛu su ṛingiddi yamiu, i yamiu wotongnge mal᷊iudda wuassu ṛuumannu Duata?

⁴Ara'e i yamiu mangngadio'a darangngu Duata wuṛṛu ahewallu naung-Nge see asasabare-Ne apan aroddi ahewalle? I yamiu masingkatta manungku Ruata mapaal᷊iatta'u apapia naung-Nge ana waugu i Tou maapulu tadea'u i yamiu mawal᷊u wuassu manga rosanu.

⁵Arawe puan kamiu maattika wuṛṛu maddiri mawal᷊u. Ana waugu udde ete i yamiu sassane apan ma'ola'a ṛuumannu aatambanna awakkane su Allon Kiamatta, napawe Ruata mapaal᷊iatta'u asasa'u-Ne ringannu ṛuumanna apan su ṛinone.

⁶Ana waugu Ruata sarun mabal᷊issa anambon taumata uassul᷊ungngu inolaanne.

⁷Ruata mangonggolu wiakka tutune wuṛṛu saran mal᷊annu-l᷊annu si mangitou apan sidutu ma'ola'a apapia tadea'u maasomba apan awantuhanne, wuṛṛu apan aaddatanna wuṛṛu apan sarun uatialu.

⁸Arawe manga taumata apan tumba'u maṛṛingiddu ririne sassane wuṛṛu maddiri tumuṛṛutta Ruata, ewe'e tuttuṛṛutta al᷊al᷊eo, manga taumata udde lembon aasa'uannu Ruata.

⁹Suapan taumata apan maapulu ma'ola'a al᷊al᷊eo sarun masansara wuṛṛu matataṛṛangnga; paarorone taumatan Yahudi, wuṛṛu lai manga walahanna waine.

¹⁰Arawe anambon taumata apan maapulu ma'ola'a apapia sarun onggol᷊annu Ruata awawantuga wuṛṛu aaddata see al᷊al᷊uassa; paarorone su taumatan Yahudi, aroddi lai manga walahanna waine.

¹¹Ana waugu Ruata ma'ellega anambon taumata udde nassul᷊ungnga.

¹²Manga taumatam walahanna waine marosa ana waugu waggan titan agaman taumatan Yahudi. Nariaddi i mangitou iṛṛuumanna su liuddu atoranna udde. Arawe manga taumatan Yahudi apan marosa buatte naasingkatta udde; ana waugu udde i mangitou sarun parikisanna tumuṛṛuttu tita udde.

¹³Ana waugu taumata mabelengnga apia ringannu Ruata, wal᷊ine ana waugu taumata udde buatte naasingkata titan agama Yahudi, ewe'e ana waugu i tou tuttuṛṛutta apa apan uawoṛṛetta sulal᷊ummu tita udde.

¹⁴Manga taumatan walahanna waine waggan titan agama Yahudi. Arawe amungkangngu i mangitou wuassu apulun mangitou sassane tuttuṛṛutta parentan tita udde, ete naungngi mangitou sassane mangngatokki mangitou, salaiwe i mangitou tawe maaillal᷊a titan agama Yahudi.

¹⁵Pallal᷊agu mangitou napaal᷊iatta'a manungku apa apan buatte nirolokku tita udde uawoṛṛetta su naungngi mangitou. Lal᷊ummu naungngi mangitou lai mapaal᷊iatta'u olangnge udde, ana waugu i mangitou sassane taṛṛa assa iapaasal᷊a wuṛṛu iapaaṛṛinon ṛingiddi mangitou.

¹⁶Ete aroddi sarun mariaddi su allo apan suete tinantunna udde. Su allo udde — tumuṛṛuttu Watti'u Al᷊al᷊uassa apan ta'u niwatti'a — Ruata sulal᷊ummi Yesus Kristus, sarun mamarikissa al᷊awo'u addapingngu naungnga wuṛṛu ṛingiddu anambon taumata.

¹⁷Arawe orassa indi ereapa su manga tuṛṛangnga sassane? Tuṛṛangnga mangnga'u ririnu taumatan Yahudi. Tuṛṛangnga mangke tuttuṛṛutta titan agama Yahudi wuṛṛu tuṛṛangnga lulluassa ana waugu paa'aukku tuṛṛangnga ringannu Ruata.

¹⁸Tuṛṛangnga naasomba manga tatantiro wuassu tita udde, na'oman sara i'o masingkatu pandummu Ruata wuṛṛu masingkata mamile suapa apianne.

¹⁹I'o mangngimanna manungku ete i'o tuṛṛangnga piaṛṛa'u taumata wuta wuṛṛu asasemakki mangitou apan uatana'a sulal᷊ummu ararandumma;

²⁰tuṛṛangnga mangngaṛṛa'a taumata apan tawe addane, wuṛṛu mannantiro manga taumata woddo. I yamiu mangngantimma manungku sulal᷊ummu titan agama Yahudi tuṛṛangnga maasomba al᷊awo'u asingkata wuṛṛu al᷊aṛṛa'a apan atonna.

²¹Tuṛṛangnga mangngaṛṛa'a taumata waine; ei anio tuṛṛangnga tawe maa'aṛṛa'a watangannu sassane? I'o mangngaṛṛa'a taumata tadea'u arie panna'o, arawe i'o sassane manna'o!

²²I'o mangngaṛṛa'a taumata tadea'u arie sumandaga, arawe i'o sassane sussandaga! I'o maddantinnu pasasubba paal᷊uanna, arawe i'o sassane mangngal᷊appa sarannapa wuassu wal᷊en paal᷊uanna.

²³I'o mammunga manungku i'o uatahuanna titan Musa, arawe i'o sassane mangngadio'a Ruata ringannu tawe tumuṛṛutta tita-Ne.

²⁴Sulal᷊ummu Wuke Susi uawoṛṛetta arendi, “Ana waugu i yamiu, manga taumatan Yahudi, arannu Ruata nial᷊uandahanna su wallattu walahanna waine.”

²⁵Amungkangngu i'o matuṛṛutta titan agama Yahudi, ne i'o apan buatte nissunatta udde pia gunane lai. Arawe amungkangngu i'o tawe ninumaramma tuttuṛṛutta manga inolaanna apan iradolokka sulal᷊ummu tita udde ne sunatta udde tawe gunane saran kadio'a.

²⁶Arawe amungkangngu sangkatou wal᷊ine Yahudi tawe nissunatta, tuttuṛṛutta titan agama Yahudi, wal᷊inewe Ruata buatte namal᷊in tou maola'a taumata apan suete nissunatta?

²⁷Wuṛṛu manga taumata apan tawe nissunatta udde sarun mappaasal᷊an kamiu taumatan Yahudi, ana waugu i'o uatahuanna titan agama Yahudi wuṛṛu i'o nissunatta, arawe i'o lullawanna tita udde. I mangitou tawe nissunatta, arawe ete i mangitou apan tuttuṛṛutta titan agama Yahudi.

²⁸Ana waugu taumatan Yahudi tutune wal᷊inewe taumata tumba'u aranne taumatan Yahudi; wuṛṛu taumata apan atonna-tonna nissunatta, wal᷊inewe taumata apan nissunatta tumba'u su wadangnga.

²⁹Arawe sangkatou Yahudi apan tutune eteudde taumata apan naungnge naungngu Yahudi; wuṛṛu sunatta apan tutune eteudde sunatta su naungnga apan mammanarannu Ghaṛṛahon Duata, wal᷊inewe niwoṛṛetta sulal᷊ummu wuke. Taumata ereudde, mannengkamma daralo wuassu Ruata, wal᷊ine wuassu taumata.