Read Talaud ROMA 8 Bible Online

ROMA 8 - Talaud bible

ROMA 8

¹Orassa indi tate lai ṛuumanna si mangitou apan mabbiakka su sambau ringannu Mawu Yesus.

²Ana waugu titan Ghaṛṛahon Duata apan na'ola'a si ite mabbiakka su sambau ringannu Mawu Yesus Kristus apan suete napaal᷊iu'u wuassu tita apan maarosa wuṛṛu maa'ate.

³Apa apan tawe ia'ola'u titan agama, ana waugu i ite taumata lome, udde buatte niola'u Ruata. Ruata napaaraun rosa wuassu pallal᷊agun taumata ringannu nandolokku anang-Nge sassane, apan nirumanta ere sangkatou taumata apan marosa, ana waugu manubussa rosa.

⁴Ruata na'ola'a udde tadea'u apulu-Ne apan niapaal᷊iatta'a sulal᷊ummu titan agama Yahudi udde wotongnge olaanna sulal᷊ummu wadangngi ite apan mabbiakka tuttuṛṛutta Ghaṛṛahon Duata wuṛṛu wal᷊ine tuttuṛṛutta pallal᷊agun taumata.

⁵Manga taumata apan mabbiakka tuttuṛṛutta pallal᷊agun taumata, sidutu maṛṛingidda apa apan ipaapulun pallal᷊agun taumata. Arawe manga taumata apan mabbiakka tuttuṛṛutta Ghaṛṛahon Duata sidutu maṛṛingiddu apa apan ipaapulun Duata.

⁶Amungkangngu ṛingirannu paparentannu pallal᷊agun taumata, ne sombangnge udde papate. Arawe amungkangngu ṛingirannu paparentannu Ghaṛṛahon Duata, ne sombangnge eteudde mabbiakka su paddarame ringannu Ruata.

⁷Taumata apan ṛingiṛṛanne paparentannu pallal᷊agun taumata, taumata udde uasaseettu Ruata, ana waugu taumata udde maddiri tumuṛṛutta titan Duata; wuṛṛu atonna i tou tawe maatuṛṛutta apulun Duata.

⁸Manga taumata apan mabbiakka tuttuṛṛutta pallal᷊agun taumata, tawe maal᷊uassa naungngu Ruata.

⁹Arawe i yamiu tawe mabbiakka tuttuṛṛutta apulun taumata. I yamiu mabbiakka tuttuṛṛutta Ghaṛṛahon Duata — amungkangngu atonna-tonna Ghaṛṛahon Duata uaparenta sulal᷊ummu watanganni yamiu. Taumata apan tawe uatahuanna Ghaṛṛahon Kristus, taumata udde wal᷊ine tatahuananni Kristus.

¹⁰Arawe amungkangngu Kristus mabbiakka sulal᷊ummu ririnu, ne salaiwe wadangngu mate ana waugu rosa, arawe Ghaṛṛahon Duata sidutu mangngonggolu wiakka si yamiu, ana waugu paa'aukki yamiu ringannu Ruata mapiate.

¹¹Amungkangngu Ghaṛṛahon Duata apan napaawiakki Kristus wuassu papate, mabbiakka sulal᷊ummu ririnu, ne i Tou apan napaawiakki Kristus wuassu papate udde, mapaawiakku ririnu lai apan wotongnge mate udde. I Tou na'ola'a udde ringannu Ghaṛṛaho-Ne apan mabbiakka sulal᷊ummu ririnu.

¹²Ana waugu udde, manga tuṛṛangnga, i ite pia manara mandiaga; arawe wal᷊ine manara su paa'apulun pallal᷊agun taumata; i ite tawe wotongnge mabbiakka tumuṛṛuttu apulune.

¹³Amungkangngu i yamiu mabbiakka tuttuṛṛutta apulun taumata, i yamiu sarun mate; arawe amungkangngu ringannu taṛṛinon Ghaṛṛahon Duata, i yamiu lapiddu mamallossu manga pallal᷊agunu apan marosa, ne i yamiu sarun mabbiakka.

¹⁴Manga taumata apan aehetannu Ghaṛṛahon Duata, i mangitou udde al᷊aṛṛana'u Duata.

¹⁵Ana waugu Ghaṛṛaho apan buatte nionggolu Ruata si yamiu, tawe ma'ola'a si yamiu allangnga, ma'oman sara i yamiu mabbiakka sulal᷊ummu atata'utta. Arawe Ghaṛṛahon Duata udde nandiaddi si yamiu maola'a al᷊aṛṛana'u Ruata. Wuṛṛu ringannu taṛṛinon Ghaṛṛahon Duata udde, i ite mammago Ruata “Iamangnga, o Iamangku!”

¹⁶Ghaṛṛahon Duata suadio'a ringannu ghaṛṛahon kite napaal᷊iatta'a ete i ite udde al᷊aṛṛana'u Ruata.

¹⁷Ne, amungkangngu ete i ite al᷊aṛṛana'u Ruata, ne i ite lai mananahuanna wurru sarun manengkamma manga al᷊amatta apan buatte nissaddian Duata su manga al᷊aṛṛanang-Nge. I ite sarun manengkamma suadio'a ringanni Kristus apa apan buatte nissaddian Duata si Tou; ana waugu amungkangngu i ite uatataṛṛanga su sambau ringanni Kristus, i ite sarun wantuhanna lai su sambau ringanni Kristus.

¹⁸Anambon asasusa apan aapendamanni ite orassa indi, tumuṛṛuttu addapa'u, tawe iasul᷊ungnga saran kadio'a ringannu awawantuga apan sarun iapaal᷊iatta'a si ite.

¹⁹Ahewallu pati'uppu runia uaraṛṛado ringannu ṛintulu tempone Ruata mapaal᷊iatta'u al᷊aṛṛanang-Nge.

²⁰Ana waugu pati'uppu runia niwalate mawinasa, wal᷊ine ana waugu apulune sassane, arawe ana waugu Ruata namalaten tou aroddi. Salaiwe aroddi pia lai antimma arendi:

²¹manungku su sambau tempo pati'uppu runia sarun iapaal᷊iu wuassu taṛṛino apan maawinasa wuṛṛu sarun mawal᷊i sumutta su al᷊al᷊uassa wuṛṛu wantuhanna su sambau ringannu al᷊aṛṛana'u Ruata.

²²I ite masingkata manungku sara orassa indi ahewallu pati'uppu runia sussal᷊ande ana waugu asasusa, naal᷊ihida ere sangkatou inangnga uatataṛṛanga su tempo mangunsiwe.

²³Wuṛṛu wal᷊ine tumba'u pati'uppu runia sassane sussal᷊ande; i ite sassane lai sussal᷊ande sulal᷊ummu naungngi ite. I ite buatte nanengkamma Ghaṛṛahon Duata, aonggolu Ruata apan paarorone, arawe i ite lai ta'e uaraṛṛado Ruata mapaal᷊iun kite wuassu sarangkanambone, wuṛṛu manga'u si ite maola'a al᷊aṛṛanang-Nge.

²⁴Ana waugu ringannu mangngantimma, i ite sarun masal᷊amatta. Arawe amungkangngu apa apan aantimanni ite suete niasiloanni ite, ne udde wal᷊ine lai antimma. Ana waugu isai lai mangantimma apa apan buatte niasiloanne?

²⁵Arawe amungkangngu i ite mangngantimma apa apan taambe niasiloanni ite, ne i ite ṛinone uaraṛṛado ringannu asasabare.

²⁶Aroddi lai Ghaṛṛahon Duata nirumanta mantul᷊ungngi ite amungkangngu i ite lome. Ana waugu i ite wagga ereapa ṛinone i ite umal᷊iomanna; Ghaṛṛaho udde sassane sumaruanna Ruata sumal᷊ande hunan kite ringannu ahewallu ṛintulu, na'oman sara tawe iawisara.

²⁷Ne Ruata, apan masingkatu lal᷊oṛṛo naungngu taumata, maasunna apulun Ghaṛṛaho udde; ana waugu Ghaṛṛaho udde sussal᷊ande Ruata hunan al᷊aṛṛana'u Ruata wuṛṛu nassul᷊ungngu apulun Duata.

²⁸I ite masingkata manungku Ruata mangngatokku al᷊awo'u inolaanna indi, na'oman sara mabbua mapia hunane su manga taumata apan marangngu si Tou wuṛṛu apan niwagoan-Ne ringannu apulu-Ne sassane.

²⁹I mangitou lai suete nipilen Duata, wuṛṛu buatte nitantuna lai wuassu paarorone maola'a massul᷊ungngu Anang-Nge, eteudde Yesus Kristus. Ringannu aroddi Anang-Nge naola'a paarorone su wallattu anambon manga tuṛṛangnga.

³⁰Ete aroddi Ruata namaggo si mangitou apan buatte nipile paarorone; wuṛṛu i mangitou apan niwagoanne udde, niwala maaukka apia ringanni Tou. Wuṛṛu i mangitou apan niwala apia maaukka ringannu Ruata, nanganu wageangnge sulal᷊ummu awawantugu Ruata sassane.

³¹Apa apan wotongnge iwisara orassa indi su ola'u sarangkanambone udde? Amungkangngu Ruata uasamba'a si ite, isai wotongnge lumawangnga si ite?

³²Anang-Nge sassane tawe niakkan-Ne, ewe'e tinantilli Tou hunane si ite sarangkanambone, ṛatade i Tou tawe mangonggolu al᷊awo'u hausanna waine si ite?

³³Isai wotongnge mapaasal᷊an kite taumata apan buatte nipile Duata, amungkangngu Ruata sassane napaal᷊iatta'a manungku i ite tawe sal᷊ane?

³⁴Apa pia taumata apan mapaasal᷊an kite? Kristus Yesus sarun manamba'a si ite. Ete i Tou apan buatte nate, ara'e ete i Tou apan buatte nabbiakka apia wuassu papate wuṛṛu tampane ringannu Ruata, isudde i Tou mammarenta.

³⁵Apa pia taumata apan wotongnge maningaddi Kristus umakkanni ite? Wotongngewe asasusa maasingaddi Tou, ara'e asasahadda, ara'e pananansara, ara'e araṛṛutumma, ara'e paa'asiangnga, ara'e asasilaka, ara'e papate?

³⁶Sulal᷊ummu Wuke Susi uawoṛṛetta arendi, “Su al᷊o'engngu allo i yami mabbiakka uasaruanna papate ana waugu I'o Mawu. I yami niola'a naal᷊ihida ere domba apan ṛatante.”

³⁷Tawe! Ewe'e sulal᷊ummu sarangkanambone udde i ite naasomba auntunganna apan nasuungnga ana waugu i Tou apan niumakkani ite!

³⁸Ana waugu i ya'u mangngimanna atonna, manungku su ahewallu runia, mawae ete papate aroddi lai sulal᷊ummu mabbiakka, mawae ete mala'ekatta aroddi lai tembonannu runia, mawae ete papata'utta tempo indi aroddi lai su tempo addantane, ara'e manga taṛṛino apan waine;

³⁹mawae ete manga inolaanna su langitta, ara'e su wowon runia ara'e saranapa lai waine, sarangkanambone udde tawe wotongnge maasingaddu aakkannu Ruata si ite, ere buatte niapaasingkati Tou su pabbiaṛṛani Kristus Yesus Mawun kite.