Read Talaud ROMA 9 Bible Online

ROMA 9 - Talaud bible

ROMA 9

¹Apa apan sarun iwisara'u indi atonna ana waugu i ya'u tatahuananni Kristus. I ya'u tawe mamahia. Naungku apan aehetannu Ghaṛṛahon Duata mannohassa si ya'u lai manungku wisara'u indi atonna.

²I ya'u tumanite massusa wuṛṛu naungku uatataṛṛanga sansara

³ana waugu manga tuṛṛangnga sambalahangku. Ana waugu ete si mangitou, i ya'u sassane mal᷊uassa wontohannu Ruata wuṛṛu iapaatal᷊ei wuassi Kristus.

⁴Ete i mangitou udde walahanna apan nipile wuṛṛu Ruata nanga'u si mangitou maola'a al᷊aṛṛanang-Nge sassane, lapiddu napaal᷊iatta'u taṛṛino-Ne si mangitou. I Tou na'ola'a paaire si mangitou wuṛṛu nangonggolu titan agama si mangitou. Ruata namasingkata si mangitou ereapa i mangitou ṛinone mattaṛṛamawu wuṛṛu i mangitou suete nanengkamma lai manga paaire-Ne.

⁵Ete i mangitou udde papapulunna wuassu iupungngu al᷊amonan kite. Kristus su olangnge ere sangkatou taumata wuassu walahanni mangitou. I Tou lembon atanggaṛṛanne wuassu sarangkanambone. Paddalote Ruata sarangkal᷊o'engnge! Amin.

⁶I ya'u tawe pandumma mamasingkata manungku paairen Duata tate ipaatta lai; arawe wal᷊ine anambon taumatan Israel udde walahanna apan nipilen Duata.

⁷Wal᷊ine anambon papapulunni Abraham udde maola'a al᷊aṛṛana'u Ruata. Ana waugu Ruata nabbisara si Abraham, “Tumba'u papapulunni Ishak apan isaggo papapulunnu.”

⁸Udde atappasanne manungku papapulunni Abraham apan maola'a al᷊aṛṛana'u Ruata, tumba'u papapulunne apan niasungkangnga ana waugu paaire Ruata; wuṛṛu wal᷊ine anambon papapulunne.

⁹Ana waugu paairen Duata ereindi, “Su tempo apan buatte tinantunna, i Ya'u sarun mabelengnga, wuṛṛu Sara sarun maasomba sangkatou ana'a esakka.”

¹⁰Wuṛṛu indi lai: Ribka mangunsiwen daruan katou ana'a esakka wuassu iamangnga sambau; eteudde Ishak iupungngu al᷊amonang kite.

¹¹Tantal᷊anna ana'a darua udde taambe niasungkangnga, Ruata buatte nanantunnu al᷊aṛṛanang-Nge apan nipile manansunna. Pamamile Ruata udde tawe uaantimma apa apan wotongnge olaannu taumata, arawe uaantimma wawaggo Duata sassane. Ana waugu su tempo ana'i Ribka daruan katou esakka udde taambe maaola'a manara mapia ara'e lal᷊eo,

¹²Ruata buatte namasingkata si Ribka, “Iaangnge sarun mangimbe tuarine.”

¹³Sulal᷊ummu Wuke Susi uawoṛṛetta manungku Ruata namasingkata ereindi, “Yakub arangnguang-Ku, arawe Esau ipaadiri-U.”

¹⁴Apa panginsueannu ṛingiṛṛanni ite orassa indi? Manungku Ruata udde tawe matul᷊ida? Atonna Ruata udde matul᷊ida!

¹⁵Ana waugu Ruata nabbisara si Musa, “I Ya'u sarun mapaal᷊iatta'u al᷊amatta su taumata apan i Ya'u maapulu mangal᷊amatta, i Ya'u sarun mapaal᷊iatta'u darangngu-U su taumata arangnguang-Ku.”

¹⁶Nariaddi, Ruata nakkawessa udde wal᷊inewe ana waugu su apulun taumata ara'e su pamamanaran taumata, ewe'e su apapia naungngu Ruata su taumata apan buatte nipile-Ne udde.

¹⁷Ana waugu sulal᷊ummu Wuke Susi uawoṛṛetta, “Ruata nabbisara su Ratu Mesir, ‘I Ya'u ma'ola'a si'o ratu ana waugu sambau pandumanna indi, eteudde tadea'u ringannu ririnu i Ya'u mapaal᷊iatta'u araratuang-Ku wuṛṛu ma'ola'a arang-Ku asingkatannu lal᷊oṛṛon runia.’ ”

¹⁸Nariaddi Ruata mandangngu sangkatou, amungkangngu Ruata maapulu aroddi. Ruata mammalan sangkatou taumata mal᷊awangnga, amungkangngu Ruata maapulu aroddi lai.

¹⁹Ne, tuṛṛangnga sarun mabbisara si ya'u, “Amungkangngu aroddi anio Ruata ta'e mapaasal᷊an taumata? Wal᷊ine tawe saran sangkatou wotongnge maapaningadu apulun Duata?”

²⁰Arawe, tuṛṛangnga! Tuṛṛangnga tumba'u sangkatou taumata. Wuṛṛu tuṛṛangnga tawe waṛṛani sumimbakka Ruata! Wotongngewe tampan bunga maiwal᷊o, isai taumata na'ola'a si tou, “Anio i'o na'ola'a si ya'u arendi?”

²¹Wal᷊inewe taumata apan na'ola'a tampa m bunga udde na'ola'a leta'a udde walate apulun naungngi tou? Wuassu sangkompenga leta'a taumata udde nallanginnu tampan bunga udde darua hatine; sambau mapia wuṛṛu sambau lai tawe tumaniten mapia.

²²Aroddi lai apa apan buatte niola'u Ruata. I Tou maapulu mapaasabangngu naung-Nge lal᷊eo wuṛṛu mapaal᷊iatta'u taṛṛino-Ne. Arawe i Tou masabbare su saruanni mangitou apan sarun iṛṛuumanna ana waugu napaasa'un Tou.

²³Ruata lai maapulu mapaal᷊iatta'a si ite al᷊al᷊uassa apan nasuungnga apan nionggola si ite taumata arangnguan-Ne. I ite buatte nisaddianni Tou manengkamma al᷊al᷊uassa udde.

²⁴Ete i ite apan buatte niwaggoan-Ne, wal᷊ine tumba'u wuassu walahannu Yahudi, arawe lai wuassu manga walahanna waine.

²⁵Ana waugu sulal᷊ummu wuken Nabi Hosea, Ruata nabbisara, “Manga taumata apan wal᷊ine walahanna-Ku, sarun isaggo ‘Walahanna-Ku’. Walahanna apan ipaadiri-U, sarun isaggo-U ‘Arangnguang-Ku’.

²⁶Wuṛṛu su tampa udde iapaasingkata su taumata ‘I yamiu wal᷊ine al᷊aṛṛana-U,’ isudde manga taumata sarun isaggo al᷊aṛṛana'u Ruata apan wiakka.”

²⁷Nabi Yesaya nabbisara ringannu maṛṛagissa su ola'u walahannu Israel, “Salaiwe reengannu walahannu Israel anambone ere anne su tahal᷊oangnga, tumba'u matul᷊ungnga apan masal᷊amatta;

²⁸ana waugu Mawu tate mal᷊annu lai mandantan ṛuumanna su lal᷊oṛṛon runia.”

²⁹Yesaya nabbisara arendi lai, “Unnu wisara Ruata Lembon Mataṛṛino tawe nanantangngu papapulunna si ite, i ite naola'e ere Sodom wuṛṛu Gomora.”

³⁰Nariaddi, audusanne iwisara arendi: Manga walahanna waine apan wal᷊ine Yahudi tawe madea'a tadea'u paa'aukki mangitou ringannu Ruata maola'a apia. Arawe ana waugu i mangitou mangngimanna, ne Ruata na'ola'a paa'aukki mangitou ringanni Tou naola'a apia.

³¹Arawe manga taumatan Yahudi sidutu madea'a tumuṛṛutta tita, tadea'u paa'aukki mangitou ringannu Ruata masasangkapia apia. Arawe i mangitou tawe naasomba hessine.

³²Anio i mangitou tawe naasomba hessine? Ana waugu i mangitou na'ola'a udde ringannu tawe mangngimanna Ruata, ewe'e su lal᷊anni mangitou sassane. Ne i mangitou nema'a natara su “Watu Atataranna”.

³³Su ola'u watu udde sulal᷊ummu Wuke Susi uawoṛṛetta arendi, “Paanaunge indi: Su Sion buatte Ta'u niaddo sambau watu apan sarun atarannu taumata; eteudde sambau watu wahewa apan sarun mangema'u taumata. Arawe taumata apan mangngimanna si Tou tawe sumassilla.”