Read Talaud 1 KORINTUS 1 Bible Online

1 KORINTUS 1 - Talaud bible

1 KORINTUS 1

¹Manga tuṛṛangnga jamaattu Ruata su Korintus! Tuṛṛangnga buatte niwaggoannu Ruata maola'a al᷊aṛṛanang-Nge ana waugu tuṛṛangnga tatahuananni Kristus Yesus, su sampunna ringannu anambon taumata su al᷊awo'u tampa apan massubba Mawun kite Yesus Kristus, eteudde Mawu mangitou wuṛṛu Mawun kite lai. I ya'u, Paulus, wuṛṛu tuṛṛangngi ite Sostenes, mangngantimma doronganna Ruata Iamangngi ite wuṛṛu Mawu Yesus Kristus mangonggolu al᷊amatta wuṛṛu paddarame si yamiu. I ya'u namoṛṛettu suratta indi ana waugu i ya'u rasulli Kristus Yesus, apan buatte nitenegu Ruata sassane wuṛṛu wuassu apulu-Ne sassane lai.

⁴I ya'u sidutu maadiangkamanna su Ruata su ola'i yamiu, ana waugu yamiu buatte nanengkamma al᷊amattu Ruata sulal᷊ummi Kristus Yesus.

⁵Ana waugu i yamiu tatahuananten Kristus, ne pabbiaṛṛanu naalate su al᷊awo'u inolaanna. Asingkannu su ola'u al᷊awo'u inolaanna udde tumanite malal᷊umma, wuṛṛu i yamiu masingkata mangaṛṛa'u apapandenu udde.

⁶Udde mapaal᷊iatta'a manungku watti'a su ola'i Kristus aroddite nal᷊inna sulal᷊ummu naungngu,

⁷na'oman sara i yamiu tawe atalannu al᷊amatta, tantal᷊anna i yamiu uaraṛṛado Mawun kite Yesus Kristus rumanta wuṛṛu ellehannu anambon taumata.

⁸Kristus sassane sarun mandiaga si yamiu ma'oman sara pangudusanne; tadea'u su tempo i Tou rumanta apia, i yamiu aratinganna tawe sangkule.

⁹Ruata mangke apangimananna atonna-tonna. Ete i Tou Ruata apan namaggo si yamiu maola'a sambau ringannu Anang-Nge, eteudde Yesus Kristus Mawun kite.

¹⁰Manga tuṛṛangnga! Sulal᷊ummu arannu Mawun kite Yesus Kristus, i ya'u sumal᷊ande tadea'u i yamiu sarangkanambone massampinunutanna; tadea'u arie pia paaul᷊a'ukka su wallatti yamiu.

¹¹Ana waugu, manga taumata wuassu amonanni Kloë nangalae si ya'u manungku pia pattatiakka su wallatti yamiu.

¹²Pandumangku eteudde manungku su wallatti yamiu piaddu mabbisara, “I ya'u tumantalongnga si Paulus,” piaddu lai mabbisara, “I ya'u tumantalongnga si Apolos,” waine lai mabbisara, “I ya'u tumantalongnga si Petrus,” waine lai mabbisara, “I ya'u tumantalongnga si Kristus.”

¹³Mangal᷊ene Kristus natahia! Paulus tawe nate niarussa ana waugu i yamiu! I yamiu lai tawe nissaṛṛani tadea'u maola'a mallal᷊aṛṛenggenni Paulus. Wal᷊inewe aroddi?

¹⁴Aadiangkamanna i ya'u tawe nanaṛṛani saran sangkatou wuassu wallatti yamiu, tumba'u Krispus wuṛṛu Gayus.

¹⁵Arie pia sangkatou mabbisara manungku i ya'u buatte nanaṛṛani si tou see maola'a mallal᷊aṛṛenggengku. (

¹⁶Ore, Stefanus wuṛṛu amonanne, atonna i ya'u nanaṛṛani si mangitou. Arawe su liuddu udde, su anaungku tate lai taumata waine apan nissaṛṛani'u.)

¹⁷Kristus nandolo'u wal᷊ine iapasaṛṛani taumata, ewe'e iapapasingkatu Watti'u Al᷊al᷊uassa wuassu Ruata; wuṛṛu udde lai sarun ta'u olaanna ringannu tawe mappaattu apande mabbisara ere ola'u taumata, tadea'u taṛṛino wuassu papateng Kristus su alu arussa maola'a pia gunane.

¹⁸Ana waugu su taumata apan mattudam papate, watti'a su ola'u papaten Kristus su alu arussa naudde watti'a wahia. Arawe si ite apan buatte niapaasal᷊amattu Ruata, watti'a udde maola'a lal᷊annu Ruata mapaal᷊iatta'u taṛṛino-Ne.

¹⁹Ana waugu sulal᷊ummu Wuke Susi, Ruata nabbisara, “Apapanden taumata pia asingkanne sarun Ta'u isongkakka, wuṛṛu pasasunna manga taumata pia si'ol᷊ane Ta'u iapaawul᷊i.”

²⁰Ne, apa hunane manga taumata pia asingkane udde? Apa hunane i mangitou pia si'ol᷊ane udde? Apa hunane maṛṛaṛṛingiddu runia indi? Ruata buatte napaal᷊iatta'a manungku apapanden runia indi mangke wahia wuṛṛu awusu atonna!

²¹Ana waugu salaiwe ereapa apanden taumata, i tou tawe maaillal᷊a Ruata wuassu apandene sassane. Arawe ana waugu Ruata lembon pande, i Tou wotongnge manal᷊amatta manga taumata apan mangngimanna si Tou wuassu Watti'a apan buatte niapaasingkati yami apan sassunannu runia indi awusu.

²²Taumatan Yahudi madorongnga al᷊aṛṛindu'a maola'a sambau tatiala, wuṛṛu taumatan Yunani tumba'u mappandumma apapanden runia indi.

²³Arawe i ite tumba'u mabbatti'i Kristus apan nate niarussa. Watti'a udde lai mammasendeka naungngu taumatan Yahudi, wuṛṛu sassunannu manga taumata wal᷊ine Yahudi udde awusu. Wuṛṛu taumata apan wal᷊ine Yahudi massunna udde sambau awawoddo.

²⁴Arawe su taumata apan buatte niwagoannu Ruata — mawae ete taumatan Yahudi ara'e wal᷊ine Yahudi — watti'a udde maola'a lal᷊annu Ruata mapaal᷊iatta'u taṛṛino wuṛṛu apande-Ne.

²⁵Ana waugu aellehanna awawoddo su Ruata, arawe eteudde manampal᷊iu wuassu apapanden taumata; wuṛṛu aellehanna lome su Ruata, eteudde matohasanna wuassu atatohassu taumata.

²⁶Manga tuṛṛangnga! Naunge'o ereapa ola'i yamiu su tempo Ruata namaggo si yamiu. Tumba'u adio'a wuassu wallatti yamiu apan pande, ara'e pia taṛṛinone, ara'e pia manarane matanggakka tumuṛṛuttu aellegu taumata.

²⁷Ana waugu atonna Ruata namile taumata apan sassunnannu runia indi woddo, tadea'u manga taumata pande masili. Wuṛṛu Ruata lai namile taumata apan sassunannu runia indi lome, tadea'u manga taumata apan matohassa wuṛṛu waṛṛani, masili.

²⁸Ruata namile apa apan aellehanna mawawo, asiangnga, wuṛṛu lai sassunannu runia indi tawe gunane, tadea'u Ruata maṛṛimunsa'a apa apan aellehannu runia indi apianne.

²⁹Ringannu aroddi tawe saran sangkatou mamungan watanganne su saruannu Ruata.

³⁰Ete Ruata sassane apan ma'ola'a si'o naaukka ringanni Kristus Yesus. Sulal᷊ummi Kristus i ite niola'a pande. Wuṛṛu sulal᷊ummi Tou lai Ruata na'ola'a si ite nassangkapia apia ringanni Tou, i ite niola'a al᷊aṛṛanang-Nge apan apianne, wuṛṛu napaal᷊iun kite wuassu alal᷊eo.

³¹Nariaddi ere uawoṛṛetta sulal᷊ummu Wuke Susi, “Taumata apan maapulu mamarabunga, ṛinone mammunga su inolaannu Mawu.”