Read Talaud 1 KORINTUS 10 Bible Online

1 KORINTUS 10 - Talaud bible

1 KORINTUS 10

¹Manga tuṛṛangnga! Ṛinone tuṛṛangnga mannaungnga apa apan buatte nariaddi su iupungngu al᷊amonan kite su tempo i mangitou uatantalongnga si Musa. I mangitou sarangkanambone nial᷊indumannu winabbawa wuṛṛu ringannu sal᷊amatta tinumumbe su Tahal᷊oangnga Maṛṛamu.

²Tadea'u maola'a mallal᷊aṛṛenggenni Musa, i mangitou sarangkanambone nissaṛṛani sulal᷊ummu winabbawa wuṛṛu sulal᷊ummu tahal᷊oangnga udde.

³I mangitou sarangkanambone u'anna annu ghaṛṛahon pangangimanna apan uasul᷊ungnga,

⁴wuṛṛu ma'inumma ua'en Ghaṛṛahon pangangimanna apan uasul᷊ungnga. I mangitou sarangkanambone ma'inumma wuassu wowon batu Ghaṛṛahon pangangimanna apan ual᷊u'adda si mangitou; wowon batu eteudde Kristus sassane.

⁵Salaiwe aroddi, Ruata tawe mal᷊uassa wuassu anamboanne su wallatti mangitou, ana waugu udde manga winal᷊unanni mangitou uatal᷊eṛṛongnga su wadda'a.

⁶Sarangkanambone udde maola'a tul᷊adda si ite, iapaanaungnga si ite tadea'u tawe numemma manga inolaanna apan lal᷊eo ere i mangitou.

⁷Wuṛṛu tadea'u i ite lai tawe massubba paal᷊uanna ere lai a'olaannu sangkawageanganna wuassi mangitou. Sulal᷊ummu Wuke Susi uawoṛṛetta, “Ne walahanna udde mannattake u'anna wuṛṛu ma'inumma, wuṛṛu massal᷊aingnga ipassubba paal᷊uanna.”

⁸I ite tawe wotongnge ma'ola'a manga inolaanna sussandaga udde ere buatte niola'u sangkawageanganna wuassi mangitou. Ana waugu ruan pul᷊o tallu su ṛiwune taumata wuassi mangitou nate sulal᷊ummu allo massallo ana waugu ma'inolaanna ere udde.

⁹I ite tawe wotongnge maannamma Mawu ere buatte niola'u sangkawageanganna wuassi mangitou rorone, na'oman sara i mangitou nate nipul᷊issu atoana mawisa.

¹⁰I ite tawe wotongnge lai sumungkuta, ere buatte niola'u sangkawageanganna wuassi mangitou rorone, na'oman sara i mangitou nipaten Mala'ekattu Papate.

¹¹Sarangkanambone udde mariaddi si mangitou, maola'a tul᷊ada su manga taumata waine. Wuṛṛu sarangkanambone udde uawoṛṛetta lai, maola'a pananaunganna si ite. Ana waugu i ite orassa indi mabbiakka su tempo panginsueanne.

¹²Taumata apan massunna watanganne uarisikka matohassa, ṛinone paatehamma; arie i tou ma'oman sara maṛṛa'a.

¹³Al᷊awo'u wawono'a apan niasombanganni yamiu, eteudde wawono'a apan masokkate niapendamannu taumata. Arawe Ruata sidutu uaaggasa paaire-Ne. I tou maddiri mamalanu wono'anna nangillembo wuassu pangangimanni yamiu. Su tempo i yamiu nia'omannu wawono'a, i Tou sarun mamantingiddu lal᷊anna si yamiu tadea'u maola'a matohassa wuṛṛu i yamiu wotongnge maataṛṛangnga.

¹⁴Ana waugu udde, manga tuṛṛangnga apan arangnguanna, ṛinone i yamiu maddantinu pasassubba paal᷊uanna.

¹⁵I ya'u mabbisara si yamiu ere su manga taumata pande. Ṛinone i yamiu maṛṛingidda sassane wisara'u indi.

¹⁶Su tempo i ite ma'inumma anggore ringannu maadiangkamanna su Ruata, wal᷊inewe udde mapaal᷊iatta'a manungku i ite uaaukka ringanni Kristus sulal᷊ummu papate-Ne? Wuṛṛu su tempo i ite mattahia roti annananna suadio'a, wal᷊inewe udde mapaal᷊iatta'a manungku i ite uaaukka sulal᷊ummu wadangngi Kristus?

¹⁷Ana waugu tumba'u pia sambau roti, wuṛṛu i ite sarangkanambone u'anna roti sambau udde lai, ne i ite apan manambo indi naal᷊ihidda wadangnga sambau.

¹⁸Ore panutukka manga taumatan Yahudi. I mangitou apan u'anna anna uarandangnga su tampan pangadoannu sasamba, eteudde manga taumata apan uaaukka ringannu tampa udde.

¹⁹Apa pandumangku su olangnge udde? Paal᷊uanna ara'e lai anna apan ipassubba paal᷊uanna udde tawe gunane saran kadio'a.

²⁰Apa apan niaddo su tampan sasamba ipasubba paal᷊uanna, tawe ipasubba Ruata, ewe'e ia'onggolla su manga ghaṛṛaho lal᷊eo. Wuṛṛu i ya'u maddiri yamiu uaaukka ringannu ghaṛṛaho lal᷊eo.

²¹I yamiu tawe wotongnge ma'inumma wuassu tampa pa'inumannu Mawu, wuṛṛu wuassu tampa pa'inumannu ghaṛṛaho lal᷊eo lai. Yamiu tawe wotongnge umanna su medda Mawu, wuṛṛu wuassu medda ghaṛṛaho lal᷊eo lai.

²²Ara'e i ite maapulu Mawu naung-Nge mal᷊al᷊eo? Apa i ite mattohasanna wuassu Mawu?

²³Unnu taumata, “I ite wotongnge ma'ola'a al᷊awo'u apa ipaapulun kite.” Atonna! Arawe tawe anambon apa ipaapulun kite udde pia gunane. “I ite wotongnge ma'ola'a walate naungngi ite” — arawe tawe sarangkanambone ipaapulun kite udde maatamba pabbiaṛṛani ite.

²⁴Arie pia sangkatou taumata maddea'a asasuungngu ririne sassane. Suapan taumata sarun maddea'a hausannu taumata waine.

²⁵I yamiu wotongnge umanna al᷊awo'u apa apan iwabal᷊u'a su pasakku ṛemessa. Ariete panutukka asuene, salaiwe pia manga apendamma maddiri sulal᷊ummu naungngu.

²⁶Ana waugu sulal᷊ummu Wuke Susi uawoṛṛetta, “Runia indi ringannu anambon lal᷊oṛṛone udde tatahuanannu.”

²⁷Amungkangngu i yamiu waggoannu sangkatou wal᷊ine taumatan Saṛṛani umanna, wuṛṛu i yamiu umitu'a wawal᷊o udde, ante apa apan niimbe si'o. Ariete panutukka wuassuapa darantane anna udde, tadea'u tawe manga apendamma maddiri wuassu lal᷊ummu naungngu.

²⁸Arawe amungkangngu piaddu mabbisara si yamiu, “Anna indi suete pinasubba paal᷊uanna,” arie umanna anna udde, ana waugu mapaasuungngu apulun taumata udde wuṛṛu ana waugu tingikku naungnga.

²⁹Pandumangku wal᷊ine tingikka wuassu lal᷊ummu naungngu, arawe tingikku lal᷊ummu naungngu taumata udde. Asinungka piaddu maiwal᷊o, “Ei anio apulu'u pia taumata maningadda?

³⁰Amungkangngu i ya'u sarun umanna anna ringannu maadiangkamanna su Ruata, anio taumata sarun mapaasal᷊a'u wuassu anna udde, salaiwe i ya'u buatte naadiangkamanna su Ruata ana waugu anna udde?”

³¹Al᷊awo'u apa apan a'olaanni yamiu — tuṛṛangnga umanna ara'e tuṛṛangnga ma'inumma — ola'e sarangkanambone udde ipamantuga Ruata.

³²Pabbiakke aroddi olangnge ma'oman sara tuṛṛangnga tawe ma'ola'a taumata waine ma'ola'a rosa; apa i mangitou taumatan Yahudi ara'e taumata wal᷊ine Yahudi, ara'e lai jamaattu Ruata.

³³Pabbiakke ere i ya'u. I ya'u maddea'a mapaal᷊uassu naungngu anambon taumata wuassu al᷊awo'u inolaanna, ringannu tawe pandumanne mapaal᷊uassu riri'u sassane. Tudda'u eteudde tumba'u tadea'u i mangitou sarangkanambone wotongnge masal᷊amatta.