Read Talaud 1 KORINTUS 12 Bible Online

1 KORINTUS 12 - Talaud bible

1 KORINTUS 12

¹Orassa indi su ola'u manga al᷊amatta apan nionggolu Ghaṛṛahon Duata. Su olangnge udde, i ya'u maapulu i yamiu maasingkata apa apan su ṛinone.

²Paanaunge manungku su tempo i yamiu taambe naaillal᷊a Mawu, i yamiu niawono'anna massubba paal᷊uanna apan mou.

³I yamiu ṛinone maasingkata, manungku taumata apan aehetannu Ghaṛṛahon Duata tawe maapabbisara, “Niawontohante Mawu Yesus!” Aroddi lai tawe saran sangkatou wotongnge mabbisara, “Tumba'u Mawu Yesus udde Mawu!” amungkangngu taumata udde tawe aehetannu Ghaṛṛahon Duata.

⁴Pia manambo hatin al᷊amatta wuassu Ghaṛṛahon Duata, arawe sarangkanambone nionggolu Ghaṛṛaho apan sambau.

⁵Pia manambo lai hatin manara ipangimbe Mawu, arawe Mawu apan a'imbeanna udde, Mawu tinggassa lai!

⁶Piaddu uapapaṛṛala lai su ola'u mammanara manara Mawu, arawe apan nangonggolu atatohassa ipammanara su al᷊awo'u taumata, eteudde Mawu tinggassa lai.

⁷Su apapian kite sarangkanambone, Ghaṛṛahon Duata mammanara su taumata sambau-sambau.

⁸Su sangkatou taumata, Ghaṛṛaho udde mangngonggolu apande ipabbisara ringannu saṛṛaungnga. Su taumata waine Ghaṛṛaho apan uasul᷊ungnga udde mangngonggolu apande ipanal᷊a'a su ola'u Ruata.

⁹Ghaṛṛaho apan sambau udde lai mangonggola su sangkatou taumata, apande apan nangillembo ipangimanna si Kristus; arawe su taumata waine Ghaṛṛaho udde mangngonggolu taṛṛino ipangngapia taumata.

¹⁰Su sangkatou nionggol᷊annu taṛṛino ipa'ola'a al᷊aṛṛindu'a wuṛṛu su waine nionggol᷊annu al᷊amatta ipabbatti'u al᷊awo'u pandumannu Ruata. Wuṛṛu su waine lai Ghaṛṛaho udde nangonggolu apande ipamile suapa al᷊amatta wuassu Ghaṛṛahon Duata wuṛṛu suapa apan wal᷊ine. Piaddu nionggol᷊annu apande ipabbisara ringannu al᷊awo'u sasinaukka apan maaṛṛindu'a, wuṛṛu piaddu lai nionggol᷊annu apande ipanal᷊a'a atappasannu manga sasinaukka udde.

¹¹Sarangkanambone udde mammanarannu Ghaṛṛaho apan sambau udde lai; sangkatou-sangkatou nionggol᷊annu al᷊amatta uapapaṛṛala tumuṛṛuttu apulun Ghaṛṛaho udde sassane.

¹²Eteudde Kristus naola'a wadangngu taumata; wadangnga udde sambau, arawe naola'a wuassu manambo wageangnge. Anambon wageangnge udde, salaiwe manambo, naola'a wadangnga sambau.

¹³Aroddi lai i ite sarangkanambone, mawae taumatan Yahudi, see lai taumata wal᷊ine Yahudi, manga allangnga, ara'e manga taumata napallose; i ite sarangkanambone buatte nissaṛṛanin Ghaṛṛaho apan uasul᷊ungnga udde. I ite lai sarangkanambone sarun maapendama Ghaṛṛaho apan sambau udde ringannu tawe urangnge.

¹⁴Ana waugu wadangnga udde sassane tawe tumba'u naola'a wuassu wageangnga sambau arawe wuassu wageangnge manambo.

¹⁵Amungkangu ledda mabbisara, “I ya'u wal᷊ine lima, ana waugu udde i ya'u wal᷊ine wageangngu wadangnga,” udde tawe atapasanne manungku ledda udde wal᷊ine wageangngu wadangnga.

¹⁶Wuṛṛu amungkangngu tal᷊inga mabbisara, “Ana waugu i ya'u wal᷊ine mata, ne i ya'u wal᷊ine wageangngu wadangnga,” udde lai tawe atappasanne manungku tal᷊inga udde wal᷊ine wuassu wageangngu wadangnga.

¹⁷Unnu wisara ahewallu wadangnga udde tumba'u mata sassane, ereapa wadangnga udde wotongnge maaringikka? Ara'e ahewallu wadangnga udde tumba'u naola'a tal᷊inga, ereapa wadangnga udde wotongnge manimbua?

¹⁸I ite naasilo manungku Ruata apan buatte nangaddon manga wageangnge udde su wadangnga. Sambau-sambau niaddon Duata su tampane tumuṛṛuttu apulu-Ne.

¹⁹Amungkangngu sarangkanambone tumba'u wageangnge sambau, suapa apan isassago wadangnga?

²⁰Nariaddi atonna manambo wageangnge, arawe wadangnga tumba'u sambau.

²¹Ana waugu udde, mata tawe wotongnge mabbisara su lima, “I ya'u maddirinu!” ara'e pua mabbisara ledda, “I ya'u maddirinu!”

²²Ewe'e manga wageangngu wadangnga apan sassunanna lome udde, mangke pappandumanni ite;

²³wuṛṛu manga wageangnge apan sassunnanni ite tawe aregane, eteudde manga wageangnge apan lembo manambo iaaregan kite. Manga wageangngu wadangnga apan aasiloanna tawe maṛṛamaga udde lembon iaaregan kite.

²⁴Manga wageangngu wadangnga apan aasiloanna mapiate maddirite iaregan kite. Ruata buatte nangatokku wadangngi ite aroddi olangnge, na'oman sara wageangnge apan tawe tumaniten maarega, lembo manambo iaarega.

²⁵Ringannu aroddi wadangnga udde tawe natahia; sambau sambau wageangnga, mangngarega wageangnge waine.

²⁶Amungkangngu wageangnge sambau uapendama radda'a, anambon wageangnge waine maradda'a lai; amungkangngu wageangnge sambau raloanna, anambon wageangnge waine lulluassa suadio'a.

²⁷Tuṛṛangnga sarangkanambone apan suadio'a, eteudde wadangngi Kristus wuṛṛu i yamiu sambau-sambau lai eteudde wageangnge wuassu wadangnga udde.

²⁸Aroddi lai sulal᷊ummu jamaatta, Ruata buatte nangatokku tampan al᷊awo'u taumata: Paarorone manga rasul; aruane manga nabi, atallune manga huru, see i mangitou apan ma'ola'a al᷊aṛṛindu'a, wua'udde i mangitou apan nionggol᷊annu al᷊amatta mapaapian taumata waine, ara'e ma'ola'a mamamiaṛṛa'a, ara'e lai iapaawisara ringannu al᷊awo'u sasinaukka apan maaṛṛindu'a.

²⁹I mangitou udde wal᷊ine sarangkanambone rasul, ara'e nabi, ara'e lai huru. Tawe sarangkanambone pia taṛṛino ipa'ola'a al᷊aṛṛindu'a,

³⁰ara'e mapaapian taumata, ara'e mabbisara ringannu al᷊awo'u sasinaukka apan maaṛṛindu'a, ara'e mannappasu manga sasinaukka udde.

³¹Ana waugu udde, ṛinone i yamiu mammanara atonna-tonna ana see maasomba al᷊amatta apan lembon apianne. Arawe manansunna indi ya'u mangaṛṛa'a si yamiu lal᷊anna apan apianne.