Read Talaud 1 KORINTUS 15 Bible Online

1 KORINTUS 15 - Talaud bible

1 KORINTUS 15

¹Wuṛṛu orassa indi, manga tuṛṛangnga, i ya'u maapulu i yamiu mannaungnga apia Watti'u Al᷊al᷊uassa wuassu Ruata apan dorone ta'u niapaasingkata si yamiu. I yamiu mannengkamma, wuṛṛu mangngimanna si Kristus ana waugu Watti'u Al᷊al᷊uassa udde.

²Amungkangngu i yamiu uaagassa atonna su watti'a apan iwabbatti'u udde, ne Watti'u Al᷊al᷊uassa udde manal᷊amatta si yamiu; tabene'e amungkangngu i yamiu mangngimanna ringannu tawe pasasunna.

³Apa apan buatte ta'u niwal᷊o si yamiu eteudde apan buatte ta'u nisengkamma lai. Ahunanne eteudde, ere uawoṛṛetta sulal᷊ummu Wuke Susi, ya'u mabbatti'a si yamiu manungku Mawu Yesus nate ana waugu manga rosan kite;

⁴manungku i Tou nilabingnga, arawe wua'udde nabbiakka apia su allo atallune. Udde lai uawoṛṛetta sulal᷊ummu Wuke Susi.

⁵I ya'u namasingkata lai si yamiu manungku Kristus apan buatte niapaawiakka apia udde nattingka pasilon batangan-Ne lai si Petrus, wua'udde su mapul᷊o dua rasul.

⁶Wua'udde i Tou naipasilon batangan-Ne lai su sire lima ṛasutta mallal᷊aṛṛenggen-Ne sangkaṛṛindo'a. Anamboanne wuassu manga taumata udde ta'e wiakka orassa indi, tumba'u sire piran katou apan natete.

⁷Wua'udde Kristus naipasilon batangan-Ne lai si Yakobus wuṛṛu wua'udde su anambon manga rasul.

⁸Panginsueanne atonna i Tou naipasilon batangan-Ne si ya'u lai — ya'u ere ana'a adio'a apan wakku niasungkanga taambe su tempone!

⁹Eteudde i ya'u rasullu Mawu apan awawoanne. I ya'u tawe su tampane isaggo rasul, ana waugu ete i ya'u apan suete nanansara jamaattu Ruata.

¹⁰Arawe ana waugu al᷊amattu Ruata, i ya'u naola'a lai ere olangnge i ya'u orassa indi. Wuṛṛu talawe tawe gunane Ruata nangampunga si ya'u. Ewe'e ete i ya'u mammanara maṛṛimadda wuassu anambo manga rasul waine. Arawe udde ṛinone wal᷊ine ya'u mattinsahadda, udde sahaddu Ruata apan marangngu si ya'u wuṛṛu mammanara suadio'a ringangku.

¹¹Nariaddi, salaiwe wuassi sai yamiu nanengkamma Watti'u Al᷊al᷊uassa udde — apa udde wuassia'u ara'e wuassu manga rasul waine — udde tawe maola'a hatto. Apianne eteudde i yamiu mabbatti'u Watti'u Al᷊al᷊uassa udde wuṛṛu i yamiu mangngimanna.

¹²Amungkangngu iwabbatti'i yami eteudde manungku Kristus buatte niapaawiakka wuassu papate, anio pia wuassu wallatti yamiu mabbisara manungku taumata nate tawe iapaawiakka apia?

¹³Amungkangngu atonna taumata nate tawe iapaawiakka apia, udde atappasanne Kristus lai tawe niapaawiakka apia wuassu papate.

¹⁴Wuṛṛu amungkangngu Kristus tawe niapaawiakka apia wuassu papate, ne tawe gunane i yami mabbatti'u manga apa apan tawe gunane lai su pangangimanni yamiu, ana waugu pangangimanni yamiu udde tawe pinangiananne apa-apa.

¹⁵Nangillembo wua isudde, nasemakke manungku i yamiu mangngawusu su ola'u Ruata, ana waugu i yami mabbatti'a manungku Ruata buatte napaawiakki Kristus wuassu papate, wutte'e Ruata tawe napaawiakki tou apia — amungkangngu atonna taumata nate tawe iapaawiakka apia!

¹⁶Ana waugu amungkangngu taumata nate tawe iapaawiakka apia, ne Kristus lai tawe niapaawiakka wuassu papate.

¹⁷Wuṛṛu amungkangngu Kristus tawe niapaawiakka apia, ne pangangimannu tumba'u wal᷊iawa tawe gunane; udde atappasanne i yamiu ta'e sulal᷊ummu paddarosa wuṛṛu tawe antimma mapia saran kadio'a.

¹⁸Udde atappasanne lai manungku manga taumatan Saṛṛani apan natete, udde tawe antimma lai.

¹⁹Amungkangngu antimmi ite si Kristus tumba'u nattaalla su wiakki ite sulal᷊ummu runia indi, ne wuassu anambon walahannu taumata sulal᷊ummu runia indi, ete i ite aral᷊eoanne!

²⁰Arawe nasemakke Kristus buatte niapaawiakka apia wuassu papate. Indi maola'a wataṛṛune manungku manga taumata apan natete sarun mabbiakka apia.

²¹Ana waugu papate sinumutta sulal᷊ummu runia wuassu sangkatou taumata, aroddi lai mabbiakka apia wuassu papate nionggola su taumata ana waugu sangkatou taumata lai.

²²Su ereapa anambon taumata nate ana waugu nareengnga su sambau ringanni Adam, aroddi lai sarangkanambone sarun iapaawiakka, ana waugu nareengnga su sambau ringanni Kristus.

²³Arawe sangkatou-sangkatou sarun iapaawiakka tumuṛṛuttu wageangnge: Paarorone Kristus, wua'udde napawe su tempo i Tou rumanta apia, manansunna wageangngu manga taumata apan nareengnga tatahuananni Kristus.

²⁴Wua'udde mariaddite Kiamatta. Su tempo udde Kristus sarun mangagassa al᷊awo'u araratuanna, al᷊awo'u taṛṛino, wuṛṛu al᷊awo'u atatohassa; wua'udde i Tou sarun manantillu taṛṛino-Ne ere sangkatou ratu, su Ruata Iamangngi ite.

²⁵Kristus ṛinone sidutu uaparenta ma'oman sara Ruata ma'ola'a seetti Kristus massuṛṛubawa si Kristus.

²⁶Seetta panginsueanne apan sarun iapasuṛṛubawa eteudde papate.

²⁷Sulal᷊ummu Wuke Susi uawoṛṛetta arendi, “Ruata suete na'ola'a al᷊awo'a su runia indi massuṛṛubawa si Tou.” Nasemakke manungku pandumannu wisara “al᷊awo'a” udde tawe nasutta Ruata sassane, apan na'ola'a al᷊awo'a masuṛṛubawa si Kristus.

²⁸Arawe napawe sarangkanambone masuṛṛubawa su al᷊ungngu parentan Kristus, ne i Tou sassane, eteudde Ana'u Ruata, sarun massuṛṛubawan batangan-Ne su Ruata apan suete na'ola'a ul᷊ilimpati'uppa masuṛṛubawa si Tou. Ne Ruata lai sarun mamarenta sarangkanambone.

²⁹Amungkangngu taumata nate tawe iapaawiakka apia, anio pia taumata sassaṛṛanianna hunan taumata nate? Apa hunane i mangitou ma'ola'a olangnge udde? Amungkangngu atonna taumata nate tate iapaawiakka apia lai, apa hunane i mangitou ma'ola'a olangnge udde?

³⁰Wuṛṛu apa lai hunane i yami sumaruanna silaka su al᷊awo'u tempo?

³¹Manga tuṛṛangnga! Miallo-miallo i ya'u uatataṛṛanga asasusa, ana waugu i ya'u lulluassu pabbiaṛṛani yamiu, ana waugu i yamiu nangimante si Kristus Yesus, Mawung kite.

³²Amungkangngu udde tumba'u wuassu taumata sassane, apa auntunganne si ya'u mammanara naal᷊ihida ere uasaruanna winatangnga waṛṛani su soa indi, su Efesus? Amungkangngu atonna taumata nate tate iapaawiakka apia, ei, mappianne i ite tumuṛṛutta sasanato'a indi: “Wette i ite umanna wuṛṛu ma'inumma wuṛṛu lumuassa, ana waugu tiṛṛabi lai i ite sarun mate.”

³³Arie awahianna! Pagahahawe apan lal᷊eo, mandal᷊eo pallal᷊agu mapia.

³⁴Atimpu'ote orassa indi, wuṛṛu ariete lai ma'ola'a rosa. I yamiu ṛinone masili, manungku su wallatti yamiu piaddu taambe naaillal᷊a Ruata.

³⁵Asinungka piaddu maiwal᷊o, “Ereapa taumata nate iapaawiakka apia? Wadangnga ereapa apan nionggola si mangitou, napawe i mangitou niapaawiakka apia?”

³⁶Woddo atonna! Amungkangngu i yamiu massuannu wualanna sulal᷊ummu leta'a, wualanna udde tawe tumuwo, amungkangngu wualanna udde tawe mate asuene.

³⁷Wuṛṛu wualanna apan nisuannu su leta'a udde — asinungka wualannu gandumma ara'e wualanna waine — eteudde tumba'u watun bualanna udde sassane, wal᷊ine al᷊awo'u sasuanne apan sarun tumuwo udde.

³⁸Ruata sassane sarun mangonggola su wualanna udde saṛṛene apan tumuṛṛuttu aellegi Tou mapiate su sasuanna udde. Su al᷊awo'u wualanna, Ruata nangonggolu saṛṛe su sasuanna sambau-sambau.

³⁹Wadangngu manga inolaannu Ruata apan pia niawane, tawe sarangkanambone uasul᷊ungnga. Taumata uatahuanna wadangnga uasul᷊ungnga, manga winatangnga pia lai wadangnge paṛṛalane; manga manu'u winalanganna lai paṛṛalane ola'u wadangnge, wuṛṛu manga inassa lai paṛṛalane lai ola'u wadangnge.

⁴⁰Aroddi lai manga sarannapa su langitta wuṛṛu manga sarannapa su runia. Sarannapa su langitta sambau-sambau pia araṛṛamagge sassane, wuṛṛu manga sarannapa su runia aroddi lai.

⁴¹Araṛṛamaggu matannallo uapapaṛṛalan araṛṛamaggu wul᷊anna. Manga anumpitanna lai pia araṛṛamagge sassane. Ewe'e manga anumpitanna udde lai sambau-sambau uapapaṛṛala araṛṛamagge.

⁴²Aroddi lai olangnge ringannu taumata nate apan sarun iapaawiakka apia. Wadangnga apan nilabingnga eteudde wadangnga apan wotongnge maṛṛenessa, arawe wadangnga apan iapaawiakka apia, eteudde wadangnga apan tawe mawukku'a.

⁴³Su tempo wadangnga udde nilabingnga, wadangnga udde lal᷊eo wuṛṛu lome, arawe su tempo i tou iapaawiakka apia, eteudde i tou wadangnga apan mapia wuṛṛu matohassa.

⁴⁴Su tempo nilabingnga, wadangnga udde wuassu runia; arawe napawe nabbiakke apia, ne wadangnga udde wadangnga apan nionggolu Ghaṛṛahon Duata. Pia wadangnga wuassu runia, pia lai wadangnga wuassu Ruata.

⁴⁵Sulal᷊ummu Wuke Susi uawoṛṛetta arendi, “Taumata paarorone eteudde Adam, naola'a riadianna apan wiakka,” arawe Adam panginsueanne eteudde Ghaṛṛaho apan mangngonggolu wiakka.

⁴⁶Apan nirumanta paarorone eteudde ola'u wadangnga, wal᷊ine ola'u ghaṛṛaho. Ghaṛṛaho nirumanta sal᷊immurine.

⁴⁷Adam paarorone niola'a wuassu leta'a, arawe Adam aruane nirumanta wuassu surga.

⁴⁸Manga taumatan runia indi naal᷊ihida Adam paarorone, apan niola'a wuassu leta'a, arawe manga taumatan surga eteudde ere i Tou apan nirumanta wuassu surga.

⁴⁹Su ereapa i ite orassa indi eteudde naal᷊ihida si Adam apan niola'a wuassu leta'a, ne i ite sarun mattingkaola'a ere i Tou apan nirumanta wuassu surga udde.

⁵⁰Pandumangku, manga tuṛṛangnga, eteudde: wadangnga apan niola'a wuassu ṛaṛṛa wuṛṛu ṛemessa, tawe maasutta su Runia Wakkun Duata; wuṛṛu wadangnga apan wotongnge mate tawe mattatana'a sarangkal᷊o'engnge.

⁵¹Paatutuṛṛe addapingnga indi: Tawe sarangkanambone i ite sarun mate, arawe i ite sarangkanambone sarun wal᷊uanna.

⁵²Olangnge udde sarun mariaddi mamaṛṛoro sulal᷊ummu sangkaṛṛondapu mata, su tempo trompeta iapatuntingikka panginsueanne. Ana waugu su tempo niaringikka tingikku trompeta udde, manga taumata nate sarun iapaawiakka apia ringannu wadangnga apan tate mate, wuṛṛu i ite sarangkanambone sarun wal᷊uanna.

⁵³Wadangngi ite apan wotongnge mate indi ṛinone hantiannu wadangnga apan tawe, wuṛṛu wadangnga wuassu runia sarun hantiannu wadangnga wuassu su surga.

⁵⁴Amungkangngu wadangnga apan wotongnge mate buatte nihantiannu wadangnga apan tawe mate, wuṛṛu wadangnga wuassu runia, buatte nihantiannu wadangnga wuassu surga, su tempo udde matipusse apa apan uawoṛṛetta sulal᷊ummu Wuke Susi, “Papate buatte nial᷊iuanna; auntunganna nia'omante!”

⁵⁵“Ei papate, suapa auntungannu? Ei papate, suapa taṛṛinonu?”

⁵⁶Taṛṛinon papate eteudde rosa, wuṛṛu rosa mappaamattu apulune sulal᷊ummu titan agama.

⁵⁷Arawe aadiangkamanna su Ruata; i Tou nangonggolu auntunganna sulal᷊ummi Yesus Kristus Mawun kite.

⁵⁸Ana waugu udde, manga tuṛṛangnga apan arangnguanna, ṛinone i yamiu matohassa wuṛṛu sidutu mangngimanna. Pammanarate sidutu su Mawu ringannu atonna-tonna, ana waugu i yamiu masingkatta manungku sarangkanambone apan mammanaranni yamiu udde su Mawu, tawe maholo'a.