Read Talaud 1 KORINTUS 4 Bible Online

1 KORINTUS 4 - Talaud bible

1 KORINTUS 4

¹Ellehete i yami indi mangangimben Kristus, apan uapasanna manara mabbatti'u manga pandumannu Ruata apan taambe niasingkatannu runia.

²Paarorone apan ṛaddeaanna wuassu mangangimbe aroddi, eteudde manungku i tou matuṛṛuta mawune.

³Mawala si ya'u tawe maola'a hatto si yamiu — ara'e isai lai — apan maṛṛingidda su ola'u watangangku sassane. Ewe'e apa apan ta'u iraṛṛingidda su ola'u watangangku sassane tawe maola'a hatto.

⁴I ya'u tawe maapendama nassal᷊a sulal᷊ummu manga hatto, arawe udde wal᷊ine tatialane manungku i ya'u naṛṛinote. Mawu sassane manantungku i ya'u nassal᷊a ara'e tawe.

⁵Ana waugu udde, amungkangu taambe tempone, arie i yamiu mal᷊iha-l᷊ihakka manantunna manungku sangkatou nassal᷊a ara'e tawe. Paṛṛadote Ruata rumanta. Ete i Tou sarun mamu'a al᷊awo'u addapingnga apan uawuni sulal᷊ummu ararandumma. Ete i Tou apan mamongkakku anambon pandumanna apan uawuni sulal᷊ummu naungngu taumata. Su tempo udde suapan taumata wakkute udde maasengkamma daralo wuassu Ruata apan wotongnge sengkamanni tou.

⁶Manga tuṛṛangnga! Tadea'u mahuna manaranu, i ya'u buatte nappaattu sarangkanambone udde si Apolos wuṛṛu su riri'u sassane. Pandumanne tadea'u wuassu tatul᷊adan kami udde i yamiu wotongnge mangurumma apa atappasannu sasanato'a, “Pangagase su atoranna apan piate.” Ringannu aroddi tawe saran sangkatou wuassi yamiu wotongnge mapaatelengngu sangkatou taumata, see mangngadio'a taumata waine.

⁷Isai apan na'ola'a si'o nangillembo wuassu taumata waine? Wal᷊inewe sarangkanambone sinengkammu wuassu Ruata? Nariaddi, anio i'o mapaatelengngu watangannu, paṛṛimaunnapa apa apan tatahuanannu udde wal᷊ine sambau apan nionggola?

⁸Atonna i yamiu maddirite mappandumma manga sarannapa lai! I yamiu naalate! I yamiu naola'e ratu, wuṛṛu i yami tawe. Apiawe eteapa amungkangngu i yamiu atonna-tonna naola'e ratu, tadea'u i yami wotongnge mamarenta su sambau ringanni yamiu.

⁹Ana waugu tumuṛṛuttu addapa'u, i yami manga rasul, buatte niola'u Ruata ere apa wabbialanna su saruannu taumata wuṛṛu manga mala'ekatta. I yami naal᷊ihida ere taumata lal᷊eo apan niṛṛuumanna na'oman sara mate su saruannu awadaalla wuṛṛu aal᷊uandahannu runia.

¹⁰Ana waugu Kristus, ete i yami indi taumata woddo, wuṛṛu i yamiu taumatan Saṛṛani apan pande! I yami lome, i yamiu matohassa, i yami aal᷊uandahanna, wuṛṛu i yamiu raddaloanna!

¹¹Na'oman sara orassa indi yami uatataṛṛanga lunussa, wuṛṛu ararou; laubbi yami ete indi ual᷊uṛṛe; taumata mangke mannansara si yami; yami tawe tampa atanaanna,

¹²i yami mammanara maṛṛimadda tadea'u maasomba anna. Amungkangngu i yami wontohanna, i yami mabbal᷊issu al᷊amatta; amungkangngu i yami pateanna, i yami masabbare;

¹³amungkangngu taumata ma'umbilangngi yami, yami mabbal᷊issu wisara apan maal᷊uassa. I yami tawe nangillembo wuassu sapaddu runia indi; na'oman sara orassa indi yami ta'e aellehanna ere sapaddu runia.

¹⁴I ya'u namoṛṛettu indi si yamiu, wal᷊inewe pandumanne ipammansili si yamiu, ewe'e ipannantiro si yamiu ere al᷊aṛṛana'u sassane.

¹⁵Ana waugu ete i ya'u naola'a iamangngi yamiu, salaiwe asinungka ere taumatan Saṛṛani, yamiu uatahuante mapul᷊o ṛiwu su atoune huru. Sulal᷊ummu wiakku ere manga taumata apan uaaukka ringanni Kristus, i ya'u naola'a iamangngi yamiu, ana waugu ete i ya'u nangapiddu Watti'u Al᷊al᷊uassa si yamiu su ola'i Kristus.

¹⁶Ana waugu udde i ya'u sumal᷊ande si yamiu tadea'u i yamiu mattanno tulada'u.

¹⁷Ana waugu udde i ya'u buatte nandolokki Timotius ringanni yamiu. Sangkatou mallal᷊aṛṛenggenni Kristus, i tou naal᷊ihida ere ana'u sassane apan arangnguanna. I Tou ana'a apan wotongnge apangimananna. I Tou sarun mapaanaungnga si yamiu su ola'u lal᷊annu pabbiaṛṛanna apan a'olaangku, napawe i ya'u mangngimante si Kristus, eteudde lal᷊annu pabbiaṛṛanna apan iaaṛṛa'a su jamaatta su anambon tampa.

¹⁸Siri pira taumata wuassu wallatti yamiu namungate, ana waugu i mangitou massunna i ya'u tate rumanta ringanni yamiu.

¹⁹Arawe amungkangngu Mawu mamala'u, tate mal᷊annu lai ya'u rumanta ringanni yamiu. Su tempo udde lai ya'u sarun maasilo apa apan a'olaannu taumata mawunga udde; wal᷊ine tumba'u wisara mangitou sassane.

²⁰Ana waugu amungkangngu Ruata mamarenta pabbiaṛṛannu sangkatou taumata, olangnge udde aatialanna wuassu atatohassu pabbiaṛṛannu taumata udde, wal᷊ine ana waugu manga wisarane.

²¹Nariaddi pamilete apa ipaapulun kamiu! Apa i yamiu maapulu i ya'u rumanta mangaṛṛa'a ringannu maṛṛagissa ara'e i ya'u rumanta mangaṛṛa'a ringannu masi'ome wuṛṛu marangngu?