Read Talaud 1 KORINTUS 7 Bible Online

1 KORINTUS 7 - Talaud bible

1 KORINTUS 7

¹Orassa indi ya'u maapulu mabbisara su ola'u hatto apan isassagon kamiu sulal᷊ummu surannu. Amungkangngu sangkatou esakka tawe naawingnga, udde mapia.

²Arawe tadea'u tawe awono'anna ma'ola'a al᷊awo'u al᷊al᷊eo, mappianne suapan taumata esakka pia awingnge sassane wuṛṛu suapan taumata wawine pia awingnge lai sassane.

³Awingnge esakka ṛinone manuungngu sumbalane su awingnge wawine, wuṛṛu awingnge wawine ṛinone manuungngu sumbalane ere awingnge wawine su awingnge esakka; sangkatou-sangkatou manipussa sasumbalane sangkatou ringannu waine.

⁴Awingnge wawine tawe maatahuanna wadangnge sassane; apan uatahuanna si tou eteudde awingnge esakka. Aroddi lai awingnge esakka tawe maatahuanna wadangnge sassane; apan maatahuanna si tou eteudde awingnge wawine.

⁵Arie sangkawinganna udde matatal᷊ei sangkatou ringannu waine. Wotonge ewe'e tumba'u tal᷊an kadio'a, sambal᷊iate udde apulun tarua. Ringannu aroddi sangkatou-sangkatou wotongnge umal᷊iomanna ringannu tawe limbane. Arawe wua'udde, ṛinone i yamiu mabawelengnga ere sangkawinganna. Amungkangngu tawe aroddi, yamiu wotongnge awono'annu ghaṛṛaho lal᷊eo, ana waugu i yamiu tawe maataṛṛangnga apulun runia.

⁶I ya'u mabbisara arendi wal᷊ine maola'a sambau darolokka, arawe sambau al᷊aṛṛa'a.

⁷Ṛinone i ya'u lembo maapulu amungkangngu anambon taumata maola'a ere i ya'u. Arawe sangkatou-sangkatou buatte nanengkamma al᷊amatta apan uapapaṛṛala wuassu Ruata. Sangkatou pia al᷊amatta indi, waine lai pia al᷊amatta udde.

⁸Su manga taumata apan taambe naawingnga, wuṛṛu su manga wawine apan niawal᷊uanna, indete al᷊aṛṛa'u; Mappianne i'o sidutu mabbiakka sassane ere i ya'u.

⁹Arawe amungkangngu i'o tawe maaṛṛadannu apulunu, mappianne i'o paawingnga. Ana waugu mappianne i'o maawingnga sul᷊ungngu'e apulunu tawe iaṛṛadanna.

¹⁰Matataṛṛino si mangitou apan buatte naawingnga, ete indi parenta'u: (Su ṛinone wal᷊ine i ya'u apan nangagillu parenta indi, arawe Mawu.) Sangkatou wawine apan buatte naawingnga arie manantangngu awingnge.

¹¹Arawe amungkangngu i tou buatte nanantangnga, i tou ṛinone sidutu tawe maawingnga, ara'e mabelengnga ringannu awingnge. Wuṛṛu sangkatou awingnge esakka tawe wotongnge manindo awingnge wawine.

¹²Si mangitou apan waine lai, al᷊aṛṛa'u ereindi: — indi al᷊aṛṛa'u sassane, wal᷊ine Mawu — amungkangngu sangkatou Saṛṛani maawingngu sangkatou wawine apan tawe mangngimanna si Kristus, wuṛṛu awingnge wawine maapulu mabbiakka ringanni tou, taumata udde tawe wotongnge manindo awingnge wawine udde.

¹³Wuṛṛu amungkangngu sangkatou wawine Saṛṛani pia awingnge sangkatou apan tawe mangngimanna si Kristus, wuṛṛu awingnge esakka maapulu mabbiakka su sambau ringanni tou, ne wawine udde tawe wotongnge manindo awingnge esakka udde.

¹⁴Ana waugu awingnge esakka apan tawe mangngimanna iwal᷊i maola'a reengannu al᷊aṛṛana'u Ruata ana waugu i tou naawingngu wawine apan suete naola'a pussa'an Ruata. Aroddi lai wawine apan tawe mangngimanna, iwal᷊i maola'a pussa'an Duata ana waugu i tou naawingngu wawine apan suete naola'a pussa'a Ruata. Amungkangngu tawe aroddi, al᷊aṛṛana'i mangitou uatatana'a al᷊aṛṛana'u apekka, sumbal᷊i manga al᷊aṛṛana'a udde nireengnga maola'a al᷊aṛṛana'u Ruata.

¹⁵Arawe amungkangngu taumata apan tawe mangngimanna udde manantangngu awingnge wawine ara'e esakka apan Saṛṛani, arie pama'ungnga si tou. Sulal᷊ummu olangnge indi wawine ara'e esakka udde nal᷊iute, ana waugu Ruata maapulu tadea'u i yamiu mabbiakka ringannu uasampinunutanna.

¹⁶Ana waugu i'o sangkatou awingnge wawine — apan nangimante Mawu — ereapa i'o wotongnge maasingkata ringannu atonna manungku i'o tawe maapanal᷊amatta awingngu esakka? Aroddi lai i'o naola'a awingnga esakka Saṛṛani, ereapa i'o naasingkata ringannu atonna manungku i'o tawe maapanal᷊amatta awingngu wawine?

¹⁷Ṛinone sangkatou-sangkatou mangngatokku pabbawiakke tumuṛṛuttu aehettu Mawu ere buatte tinantunnu Ruata si tou su tempo Ruata namaggo si tou see mangngimanna si Tou. Eteudde tita apan ta'u iaaṛṛa'a su al᷊awo'u jamaatta.

¹⁸Nassul᷊ungnga ere amungkangngu sangkatou taumata buatte nissunatta su tempo i tou naasengkamma wawaggo Ruata, ne imbaṛṛangnga taumata udde maddea'a mamappassa manga tatialan sunatta udde. Aroddi lai amungkangngu sangkatou taumata taambe nissunatta su tempo i tou nanengkamma wawaggo Ruata, imbaṛṛangnga taumata udde maisunatta.

¹⁹Ana waugu tuttuṛṛutta titan sunatta ara'e tawe tumuṛṛutta, sarangkanambone tawe gunane. Ahunanne tumba'u tumuṛṛutta manga titan Duata.

²⁰Ṛinone suapan taumata sidutu mabbiakka sulal᷊ummu olangnge ere lai su tempo i tou naasomba wawaggon Ruata.

²¹Amungkangngu su tempo i'o waggoanna, i'o udde sangkatou allangnga, ariewe i'o masusa maṛṛingiddu olangnge udde. Arawe amungkangngu su paassa i'o maasomba tempone mal᷊iu wuassu al᷊awo'u manara, paata'e tempo udde.

²²Ana waugu sangkatou allangnga apan buatte nangimanna Mawu, naola'e taumatan Mawu. Wuṛṛu sangkatou apan napallose apan mangngimante Mawu, naola'e allangngi Kristus.

²³Ruata buatte namalli si'o wuṛṛu nasueten baekke. Ana waugu udde, imbaṛṛangnga i'o manantillu wadangngu maola'a allangngu taumata.

²⁴Nariaddi, manga tuṛṛangnga, naunge, ereapa ola'i yamiu su tempo niwagoanna, ṛinone i'o sidutu mabbiakka ereudde suadio'a ringannu Ruata.

²⁵Orassa indi su ola'u manga taumata apan taambe naawingnga. Su ola'u hatto udde, i ya'u tawe naasengkamma parenta wuassu Mawu. Arawe su manga taumata ana waugu al᷊amattu Mawu wotongnge pangimananna, i ya'u maapulu mangonggolu tatantiro'u.

²⁶Mannaungnga al᷊awo'u asasusa apan mammaṛṛangnga orassa indi, ya'u mammendama mappianne amungkangngu taumata sidutu mabbiakka olangnge naal᷊ihida ere su orassa indi.

²⁷Amungkangngu i'o piate awingnga, arie paṛṛingidda manindo awingngu. Amungkangngu i'o taambe awingngu, ariete padea'a awingnga.

²⁸Arawe amungkangngu i'o maawingnga, udde wal᷊ine rosa. Aroddi lai amungkangngu sangkatou maṛṛuala maawingnga, udde tawe manungku i tou marosa. Tumba'u i mangitou apan maawingnga, udde sumaruanna anambon asasusa. Wuṛṛu i ya'u maapulu i yamiu mal᷊iu wuassu manga asasusa udde.

²⁹Pandumangku arendi, manga tuṛṛangnga: I ite tate tempone lai manambo. Manattaka orassa indi, suapan taumata apan piate awingnge, ṛinone i tou mabbiakka naal᷊ihida ere tawe awingnga;

³⁰taumata apan lulluai, pabbiakke pailal᷊ihidda ere i tou tawe asasusa naungnga; taumata apan lullage, pailal᷊ihidda ere tawe lulluassa; taumata apan buatte namalli, pailal᷊ihidda ere i tou tawe uatahuanna apa-apa;

³¹wuṛṛu manga taumata uamanara sulal᷊ummu manaran runia, ṛinone mabbiakka pailal᷊ihidda ere i tou tawe limbatannu manara udde. Ana waugu tate mal᷊annu lai runia indi, sulal᷊ummu olangnge ere orassa indi sarun mawul᷊i!

³²I ya'u maapulu tadea'u tuṛṛangnga mal᷊iu wuassu asasusa. Taumata apan tawe awingnge sarun manidutun ṛingiṛṛanne su inolaannu Mawu, ana waugu i tou maapulu malluassa Mawu.

³³Arawe taumata apan piate awingnge sarun maṛṛingidda manambo su ola'u runia indi, ana waugu i tou maapulu malluassa naungngu awingnge;

³⁴apanganne ṛingiṛṛanne natahia. Sangkatou wawine apan tawe awingnge, ara'e sangkatou maṛṛuala, sarun maṛṛingidda manambo su ola'u Mawu, ana waugu i tou maapulu tadea'u wadangnge sarangkanambone maola'a pussa'an Duata. Arawe sangkatou wawine apan piate awingnge, manidutun ṛingiṛṛanne su ola'u paddarunia indi, ana waugu i tou maapulu malluassa naungngu awingnge.

³⁵I ya'u namoṛṛettu sarangkanambone indi hunane su apapianu sassane, wal᷊ine ringannu pandumma maningaddu indi wuṛṛu maningaddu udde. Ipaapulu'u tumba'u tadea'u tuṛṛangnga ma'ola'a apapia wuṛṛu apan su ṛinone, tadea'u i'o wotongnge manidutun ṛingiṛṛannu su Mawu.

³⁶Amungkangngu sangkatou mamendama tawe mapaamattu apa apan su ṛinone su saruannu tunangane, amungkangngu i tou tawe maaṛṛadannu apulun dunia, wuṛṛu i tou mammendama maapulute maawingngu maṛṛuala udde, wala'e i tou ma'ola'a apa apan pappendamanne mapia. I tou tawe marosa, amungkangngu itarua maawingnga.

³⁷Arawe amungkangngu sangkatou buatte nakkawessa sulal᷊ummu naungnge tawe maawingnga ringannu tunangane wuṛṛu apulune udde tawe niwata'a, ne inolaanne udde mapia, sambal᷊iate i tou matohassa su apulune udde.

³⁸Apianne eteudde, taumata apan naawingnga, mapia inolaanne, wuṛṛu taumata apan tawe naawingnga, lembon apianne lai inolaanne.

³⁹Sangkatou wawine apan buatte naawingnga tatahuanannu awingnge esakka tumba'u tantal᷊anna awingnge udde wiakka. Arawe amungkangngu awingnge natete, wawine udde wotongngete maawingnga apia ringannu sangkatou esakka apan ipaapulune; sambal᷊iate paa'awingnga udde paa'awingngu taumatan Saṛṛani.

⁴⁰Arawe i tou lembon ma'untunganna amungkangngu tate maawingnga apia. Udde addapa'u sassane, arawe i ya'u mammendama manungku wisara'u udde eteudde ringannu taṛṛino Ghaṛṛahon Duata.