Read Talaud 1 KORINTUS 8 Bible Online

1 KORINTUS 8 - Talaud bible

1 KORINTUS 8

¹Orassa indi su ola'u anna apan nionggola maola'a sasamba su paal᷊uanna. Atonna ere unnu wisaran taumata, “I ite sarangkanambone pandete.” Arawe apapande ma'ola'a taumata mabbal᷊i mawunga, arawe paa'akkana mangngapia taumata.

²Taumata apan massunna manungku i tou masingkattu sarangkanambone, su ṛinone i tou taambe naasingkata sara al᷊al᷊umanne.

³Arawe taumata apan atonna-tonna marangngu Ruata, i tou asingkatannu Ruata.

⁴Su ola'u hatto u'anna anna apan buatte nionggola sasamba su paal᷊uanna, i ite masingkata manungku paal᷊uanna udde ere ola'u sambau apan tawe baddi'a. Wuṛṛu i ite masingkata lai manungku Ruata tumba'u sambau; tawe bal᷊ine.

⁵Atonna manambo lai apa apan isassago monganna, wuṛṛu mawu, mawae udde ete su langitta, ara'e lai su wowon dunia.

⁶Arawe si ite, Ruata tumba'u tinggassa. I tou Iamangnga apan nandiaddi sarangkanambone. Ete hunane si Tou i ite mabbiakka. Wuṛṛu Mawu tumba'u sambau lai, eteudde Yesus Kristus. Sulal᷊ummi Tou sarangkanambone niriaddi, wuṛṛu ana waugu ete i Tou i ite wiakka.

⁷Salaiwe aroddi, tawe anambon taumata masingkatu olangnge udde. Piaddu taumata paarorone wiasane massubba paal᷊uanna. Nariaddi, ana waugu udde na'oman sara orassa indi lai i mangitou ta'e uapendama manungku anna, apan buatte pinasubba paal᷊uanna, eteudde annu paal᷊uanna. Ne amungkangngu i mangitou umanna anna udde, i mangitou uapendama udde rosa; ana waugu pangangimanni mangitou ta'e lome.

⁸Su ṛinone anna sassane tawe maaola'a paa'aukki ite ringannu Ruata maola'a lembon mapia. Amungkangngu i ite umanna anna udde, i ite tawe maasomba auntunganna apa-apa. Aroddi lai amungkangngu i ite tawe umanna anna udde, i ite lai tawe marugi saran kadio'a.

⁹Arawe paatehamma, arie ma'oman sara mariaddi manungku taumata waine maola'a marosa — ana waugu pangangimanne ta'e lome — ana waugu i'o walate apulu ma'inolaanna sarangkanambone.

¹⁰Pandumangku arendi: Unnu wisara i'o, pia pangangimanna apan matohassa, tantal᷊anna u'anna su tampam paal᷊uanna. Wua'udde pia sangkatou naasilo si'o ua'ianna u'anna isudde. Amungkangngu pangangimannu taumata udde lome, wal᷊ine udde maawaṛṛani taumata udde umanna anna apan buatte pinasubba paal᷊uanna udde?

¹¹Wuṛṛu ana waugu udde, ne pangangimannu naaola'a taumata pangangimanne lome udde umal᷊iwu. Sumbal᷊i Kristus nate hunane su taumata udde lai.

¹²Wuṛṛu amungkangngu i'o ma'ola'a pasasal᷊a ereudde su saruannu manga tuṛṛangnga apan Saṛṛani — eteudde i'o nanggohakku pangangimanni mangitou apan lome — ne i'o narosa su saruanni Kristus.

¹³Ana waugu udde, amungkangngu anna maaola'a si'o marosa, ne ya'u tate uminassa ṛemessa lai. Ana waugu aṛṛengenne tuṛṛangku marosa ana waugu i ya'u.