Read Talaud 1 KORINTUS 9 Bible Online

1 KORINTUS 9 - Talaud bible

1 KORINTUS 9

¹Wal᷊inewe i ya'u taumata uapallose? Wal᷊inewe ya'u sangkatou rasul? Apa i ya'u taambe naasilo Mawu Yesus, Mawun kite? Apa i yamiu wal᷊inewe ina'ul᷊en manara'u su Mawu?

²Amungkangngu lai manga taumata waine maddiri manga'u si ya'u sangkatou rasul, adiongke i yamiu mangnga'u udde! Ana waugu wiakku ere sangkatou taumatan Saṛṛani maola'a tatiala manungku i ya'u sangkatou rasul.

³Amungkangngu pia taumata mapaasal᷊a'u, i ya'u sarun sumimbakka arendi:

⁴Apa i ya'u tawe wotongnge manengkamma anna wuṛṛu ua'e ana waugu manara'u?

⁵Apa i ya'u tawe wotongnge mangapiddu sangkatou awingnga taumatan Saṛṛani ringangku sulal᷊ummu amatangku, ere lai niola'u manga tuṛṛangngu Mawu Yesus wuṛṛu manga rasul waine, nasutta lai Petrus?

⁶Ara'e tumba'u Barnabas wuṛṛu ya'u sassane iradolokka iaparea'a wiakka sassane?

⁷Taweddu sangkatou tantara apan ṛinone madea'a pabbawiakke sassane sulal᷊ummu amul᷊annu tantara udde! Tawe mabbawailla apan massuannu anggore su waille see tawe umanna wuan anggore wuassu waille udde! Tawe mandariaga apan mappadul᷊i domba, see tawe ma'inumma susu wuassu manga dombane udde!

⁸I ya'u namasingkatu olangnge udde wal᷊ine tumba'u pinangiananne apan inanaramanna su pabbiaṛṛanna miallo-miallo, arawe ana waugu Wuke Susi namasingkata lai su olangnge udde.

⁹Sulal᷊ummu Wuke Musa uawoṛṛetta, “Sapi apan tantal᷊anna maṛṛinda gandumma ana see matontonga watune wuassu raene, arie paṛṛapinge moṛṛongnge.” Apa tumba'u sapi apan pappadul᷊ianannu Ruata?

¹⁰Ara'e udde pandumanne si ite? Atonna udde niwoṛṛetta si ite. Ana waugu taumata apan mammanara waille wuṛṛu taumata apan mammaresi ammene, su ṛinone mammanara ringannu mangngantimma maasengkama sangkawageanganna wuassu hessin manarane.

¹¹I yami suete nangasi'u wualannu Ghaṛṛaho sulal᷊ummu pabbiaṛṛannu. Ne amungkangngu i yami mangitingnga manga al᷊amattu runia wuassi yamiu, apa udde atappasanne manungku i yami madorongnga tumaniten manambo wuassi yamiu?

¹²Amungkangngu manga taumata wotongnge mangantimma indi wuassi yamiu, wal᷊inewe yami lai lembon pia taṛṛino wuassi mangitou? Arawe i ya'u taambe nappaattu taṛṛino udde. Arawe i ya'u lembo maapulu maningkul᷊u sarangkanambone udde, wuassu i ya'u mapaal᷊aputu manga inolaanna apan mannal᷊are manara mamasingkatu Watti'u Al᷊al᷊uassa su ola'i Kristus.

¹³Tuṛṛangnga lai masingkate manungku taumata apan mammanara su Wal᷊en Ruata mannengkamma wiakki mangitou wuassu Wal᷊en Duata. Wuṛṛu manga taumata apan mammadul᷊i tampan sasamba, maasomba sambageanganna wuassu sasamba apan niola'a sasamba isudde.

¹⁴Aroddi lai Mawu buatte nanantunna manungku taumata apan mabbatti'u Watti'u Al᷊al᷊uassa udde ṛinone maasomba pabbawiakke wuassu manarane udde.

¹⁵Arawe taambe saran paassa i ya'u nappaattu manga taṛṛino udde. Wuṛṛu i ya'u namoṛṛettu suratta indi wal᷊inewe lai ringannu pandumanna tadea'u manga taṛṛino udde olaanna orassa indi si ya'u. Mappianne i ya'u mate, sul᷊ungnge'e i ya'u awul᷊iannu inolaanna apan ilallala'u udde.

¹⁶Ana waugu amungkangngu udde tumba'u su ola'u mabbatti'u Watti'u Al᷊al᷊uassa wuassu Ruata, ne i ya'u tawe maapamunga, ana waugu Ruata buatte namarenta si ya'u iapamanara. Nasilakate i ya'u, amungkangngu i ya'u tawe nabbatti'u Watti'u Al᷊al᷊uassa udde!

¹⁷Unnu wisara i ya'u mappaamattu manara udde wuassu apulu'u sassane, ne i ya'u wotongnge mangantima lal᷊antake. Arawe i ya'u mamasingkattu Watti'u Al᷊al᷊uassa udde ana waugu udde manara'u. I ya'u nirolokku Ruata iapa'ola'a manara udde.

¹⁸Amungkangngu aroddi, apa bawaekke si ya'u? Indi bawaekke: manungku i ya'u wotongnge mamasingkatu Watti'u Al᷊al᷊uassa udde ringannu tawe mamakkata saran sangkatou iapasumbala si ya'u, ana waugu i ya'u maddiri madorongnga bawaekke su ola'u i ya'u mabbatti'u Watti'u Al᷊al᷊uassa udde.

¹⁹I ya'u indi wal᷊inewe allangngi sai-sai; i ya'u uapallosa. Salaiwe aroddi, ya'u suete na'ola'a watangangku indi maola'a allangngu anambon taumata. I ya'u na'ola'a udde tadea'u i ya'u wotongnge mapaasal᷊amattu anambon taumata sulal᷊ummi Kristus.

²⁰Su saruannu taumatan Yahudi, ya'u naola'a ere taumatan Yahudi tadea'u i ya'u wotongnge mapaasal᷊amattu taumatan Yahudi hunane si Kristus. Su saruannu manga taumata apan mabbiakka tuttuṛṛutta tita Musa, i ya'u naola'a ere i ya'u lai tuttuṛṛutta tita udde, salaiwe i ya'u ṛinone tawe aiitannu tita udde. I ya'u na'ola'a udde tadea'u i ya'u wotongnge mamol᷊engnga si mangitou maola'a mallal᷊aṛṛenggenni Kristus.

²¹Su saruannu taumata wal᷊ine Yahudi, ya'u mattingkaola'a naal᷊ihida taumata wal᷊ine Yahudi, apan mabbiakka su liuddu titan Musa. I ya'u na'ola'a udde tadea'u i ya'u wotongnge maawol᷊engnga si mangitou maola'a mallal᷊aṛṛenggenni Kristus. Arawe udde tawe'e manungku i ya'u tawe tumuṛṛutta manga parentan Duata; arawe i ya'u sidutu iappiaṛṛa'u manga parenta wuassi Kristus.

²²Su pattangngannu manga taumata apan pangangimanne lome, i ya'u lai mattiangkaola'a ere sangkatou apan pangangimanne lome tadea'u i ya'u wotongnge maawol᷊engnga si mangitou maola'a mallal᷊aṛṛenggenni Kristus. Aunne, i ya'u ma'ola'a sarangkanambone hunane su anambon taumata tadea'u ringannu lal᷊anne salaiwe ereapa lai ya'u wotongnge manal᷊amatta sangkawageanganna wuassi mangitou.

²³Sarangkanambone udde ta'u niola'a hunan Watti'u Al᷊al᷊uassa wuassu Ruata, tadea'u i ya'u lai al᷊amatanna.

²⁴Tuṛṛangnga lai masingkatta manungku sulal᷊ummu tandinganna anambon matatalumma tuttal᷊angnga, arawe tumba'u sangkatou manengkamma lal᷊antake. Ana waugu udde tal᷊angke aroddi apiane, ma'oman sara i'o maasengkamma lal᷊antake.

²⁵Suapan taumata apan sulal᷊ummu latihanna, uatataṛṛanga al᷊awo'u apulu. I tou na'ola'a udde ana waugu i tou maapulu eleannu wunga tatiala na'untungnga, eteudde wunga apan mal᷊ihakka tumolangnga. Arawe i ite indi uatataṛṛanga sulal᷊ummu al᷊awo'u apulu, ana waugu i ite maapulu eleannu wunga apan tawe tumolangnga.

²⁶Ana waugu udde i ya'u tuttal᷊angnga ringannu tudda apan natantunna. Ere su tandingannu uaa'o'a, i ya'u tawe walate ao'ane.

²⁷I ya'u namalan wadangku aṛṛaanna ringannu matohassa ma'oman sara i ya'u wotongnge maasingkatta atonna. I ya'u ma'ola'a aroddi, ana waugu i ya'u maddiri ma'oman sara mariaddi manungku napawe i ya'u mangahe taumata waine mattandinganna i ya'u sassane tawe niwal᷊i ara'e nito'e.