Read Talaud 2 KORINTUS 1 Bible Online

2 KORINTUS 1 - Talaud bible

2 KORINTUS 1

¹Manga tuṛṛangnga jamaattu Ruata su Korintus wuṛṛu al᷊aṛṛana'u Ruata sarangkanambone su ahewallu leta'u Akhaya. I Ya'u Paulus, rasulli Kristus Yesus, apan nitenega wuassu apulun Duata, suadio'a ringannu tuṛṛangngi ite Timotius,

²mangngantimma doronganna Ruata Iamangngi ite wuṛṛu Mawu Yesus Kristus mangonggolu al᷊amatta wuṛṛu paddarame si yamiu.

³Daralo su Ruata, Iamangngu Mawun kite Yesus Kristus. I Tou Iamangnga lembo mapia naung-Nge, wuṛṛu i Tou Ruata apan mangngonggolu atatohassa su naungngu taumata.

⁴I Tou mannohassa naungngi yami sulal᷊ummu asasusa apan aapendamanni ami, tadea'u ringannu atatohassa apan nisengkammi yami wuassu Ruata udde, i yami lai wotongnge manohassa naungngu taumata nambo sulal᷊ummu asasusa.

⁵Manga asasusa apan niapendamanni Kristus manambote lai aapendamanni yami. Wuṛṛu lai sulal᷊ummi Kristus naungngi yami lembon natohassa.

⁶Amungkangngu i yami uasaruanna asasusa, udde pandumanne ipannohassa naungngu, tadea'u i yamiu masal᷊amatta. Amungkangngu naungngi yami tohasanna, ne i yamiu lai tattohasanna ma'oman sara i yamiu maola'a masabbare sulal᷊ummu manga asasusa ere lai niapendamanni yami.

⁷I yami sidutu mangngimanna wuṛṛu tawe humago'a su ola'i yamiu, ana waugu i yami masingkata manungku i yamiu lai suadio'a uatataṛṛanga ringanni yami. Wuṛṛu ana waugu udde i yamiu lai nitohassa suadio'a ringanni yami.

⁸Manga tuṛṛangnga! I yami maapulu i yamiu lai maasingkata su ola'u asasusa apan niapendamanni ami su leta'u Asia. Asasusa apan papasannananni yami udde tumaniten mawakkata mannasa'i yami ma'oman sara i yami tate antimma mabbiakka apia;

⁹papendamanna ere ola'u suete nitantuna iṛṛuumanna pateanna. Arawe olangnge udde mariaddi tadea'u i yamiu tawe mangngimanna atatohassu wadangngu sassane, ewe'e su Ruata apan mapaawiakku taumata nate.

¹⁰Ete i Tou apan suete nanal᷊amatta si yami wuassu silaka wuṛṛu papate apan wahewa udde. Wuṛṛu ete i Tou sarun manal᷊amatta si yamiu su allo sal᷊immurine, ana waugu ete si Tou i yami mangngantimma.

¹¹I yami mangngimanna manungku ringannu manga aal᷊iomannu hunan kami, Ruata sarun manal᷊amatta si yami lai wuassu papate. Ruata mangonggolu al᷊amatta si yami maola'a sambau sasimbakku anambon aal᷊iomanni yamiu si yami wuṛṛu ana waugu udde, manambo taumata maadiangkamanna su Ruata.

¹²I yami lulluassa, ana waugu lal᷊ummu naungngi yami mangngonggolu antimma si yami manungku wiakki yami su runia indi — nangillembo paa'aukki yami ringanni yamiu — suete niapaamatti yami ringannu naungnga matul᷊idda wuṛṛu waresi. Yami na'ola'a udde, wal᷊ine ringannu apanden taumata, arawe ringannu atatohassa apan nionggolu Ruata.

¹³Apan niwoṛṛetti yami udde si yamiu tumba'u su ola'u inolaanna apan wotongnge iawasa wuṛṛu asunnanni yamiu. Orassa indi yamiu tawe maasunna si yami ringannu atonna, arawe i ya'u mangngantimma i yamiu sarun atonna-tonna maasunna si yami. Ringannu aroddi, su tempo Mawu Yesus rumanta apia, i yamiu sarun lumuassi yami ere lai yami lulluassa ana waugu i yamiu.

¹⁵Ana waugu ete pangangimanna udde i ya'u paarorone maapulu mattembo si yamiu tadea'u i yamiu maasomba al᷊amatta paarua anambone.

¹⁶I ya'u lai pia ira-ira mattembo si yamiu sulal᷊ummu amatangku watukku Makedonia wuṛṛu umotongnga lai apia sulal᷊ummu amatangku mabelengnga, tadea'u i yamiu wotongnge massumbala si ya'u manassu amatangku watukku Yudea.

¹⁷Arawe i ya'u buatte namal᷊u ṛiinna udde; ei, apa udde mapaal᷊iatta'a manungku naungku tawe matatana'a? Su tempo naṛṛiinna, apa i ya'u naṛṛiinna tumuṛṛuttu apulu'u sassane, tanal᷊anna'a addio'a mabbisara, “Ore”, wuṛṛu tanal᷊anna'a adio'a mabbisara “Tawe”?

¹⁸Ringannu arannu Ruata apan apangngimananna, paaire'u si yamiu wal᷊inewe “Ore” wuṛṛu “Tawe”.

¹⁹Ana waugu Yesus Kristus, Ana'u Ruata, apan nipaasingkati Silas, Timotius; wuṛṛu i ya'u sassane lai, wal᷊inewe taumata “Ore” wuṛṛu “Tawe”. Arawe udde naaola'a sasimbakka “Ore” wuassu Ruata.

²⁰Ana waugu sulal᷊ummi Tou Ruata suete nabbisara “Ore” su al᷊awo'u paaire-Ne. Ana waugu udde i ite mabbisara “Amin” su Ruata ana waugu Yesus Kristus. I yami na'ola'a aroddi tadea'u Ruata wantuhanna.

²¹Ruata sassane apan na'ola'a si yami wuṛṛu si yamiu uaaukka su sambau ringanni Kristus ete i Tou lai sassane apan namile si ite hunane si Tou.

²²Ana waugu udde Ruata suete nanga'u si ite maola'a pussa'a-Ne wuṛṛu mangonggolu Ghaṛṛaho-Ne sulal᷊ummu naungngi ite, apan maola'a sambau wataṛṛu manungku i Tou sarun mangonggolu si ite sarangkanambone apan suete pina'iren Tou.

²³Ruata maola'a tiala'u — ana waugu i Tou masingkatu lal᷊oṛṛo naungku — manungku i ya'u tawe nariaddi watukku Korintus, ana waugu i ya'u maddiri ma'ola'a naungngi yamiu masusa.

²⁴I ya'u tawe mamata'i yamiu su ola'u apa apan pangimananni yamiu, ana waugu i yamiu lembo mangngimanna si Kristus. I ya'u tumba'u mammanara su sambau ringanni yamiu tadea'u i yamiu lembo lulluassa.