Read Talaud 2 KORINTUS 11 Bible Online

2 KORINTUS 11 - Talaud bible

2 KORINTUS 11

¹Wala'e i ya'u mattingka woddo addio'a. Wotongnge are?

²I ya'u luṛṛintulunu, ere Ruata sassane lai luṛṛintulun kamiu. I yamiu ere sangkatou maṛṛuala apan ta'e susi wuṛṛu buatte nipa'ire'u iapaawingngu sangkatou umbasanna, eteudde Kristus.

³Arawe i ya'u sussinggawangnga ṛingiṛṛannu, sarun awono'anna tawe tumuṛṛutta si Kristus, ere Hawa paarorone lai inawono'annu atoanna.

⁴Ana waugu ellehanna i yamiu mal᷊uassa manarimmattu taumata apan rumanta ringannu wuṛṛu mangngaṛṛa'u Mawu Yesus waine — wal᷊ine Mawu Yesus apan niapaasingkati yami si yamiu. Wuṛṛu i yamiu lai mal᷊utu manal᷊oho ghaṛṛaho wuṛṛu “watti'u al᷊al᷊uassa” apan uapapaṛṛalan Ghaṛṛahon Duata wuṛṛu Watti'u Al᷊al᷊uassa apan suete nitarimmatti yamiu wuassi yami.

⁵I ya'u tawe maapendama saran kadio'a manungku i ya'u mabbawoanna wuassu “manga rasul” apan pande udde!

⁶Asinungka i ya'u tawe tumani masingkata mabbisara, arawe su ola'u asingkata, i ya'u wal᷊ine taumata woddo. Udde buatte niapaal᷊iatta'a si yamiu su al᷊awo'u inolaanna.

⁷Su tempo i ya'u mabbati'u Watti'u Al᷊al᷊uassa wuassu Ruata si yamiu, i ya'u tawe nadorongnga i yamiu mappadul᷊i si ya'u; wuṛṛu ringannu aroddi ya'u napaawawon wadangku. I ya'u na'ola'a udde see i yamiu maola'a matanggakka. Apa udde maola'a sambau pasasal᷊a su saruannu?

⁸Su tempo i ya'u mangngaṛṛa'a si yamiu, i ya'u papadul᷊ianannu manga jamaatta waine. Wotongnge iwisara i ya'u nandugi manga jamaatta udde tadea'u wotongnge mantul᷊ungngi yamiu.

⁹Amungkangngu su tempo udde i ya'u sulal᷊ummu paa'asiangnga, i ya'u tawe mapaasusa saran sangkatou wuassu wallatti yamiu. Anambon apa apan pappandumangku suete nissaddian manga tuṛṛangnga apan nirumanta wuassu Makedonia. I ya'u uariaga mapia-pia tadea'u i ya'u tawe mapaasusan kamiu su al᷊awo'u inolaanna, wuṛṛu i ya'u sidutu uariaga tadea'u olangnge udde tawe mawal᷊u.

¹⁰Alal᷊ua'u indi tawe iapappassa suapan tampa su leta'u Akhaya, ana waugu al᷊ara'i Kristus apan naṛṛino udde si ya'u.

¹¹Anio i ya'u mabbisara aroddi? Apa ana waugu i ya'u tawe mandangngu si yamiu? Ruata masingkata manungku i ya'u marangngu!

¹²Apa apan a'olaangku orassa indi sidutu mammanarangku tadea'u “manga rasul” apan waine udde tawe pangiananne mapamarabungan watanganne wuṛṛu mabbisara manungku i mangitou mammanara ere lai yami.

¹³Manga taumata ere udde, uddewe rasul awusu. I mangitou mammamanara mangngawusu taumata wuṛṛu mattingkaola'a naal᷊ihida ere manga rasul wuassi Kristus.

¹⁴Tawe iaherangnga pallal᷊agu mangitou aroddi, ana waugu Setanna lai sassane mattingkaola'a naal᷊ihida ere mala'ekattu asasemakka!

¹⁵Nariaddi tawe iaherangnga lai amungkangngu mammamanaran Setanna mattingkaola'a naal᷊ihida ere mangangimbe apan tuttuṛṛutta apulun Duata. Panginsueanne i mangitou lai sarun manengkamma wawal᷊inne apan uasul᷊ungngu inolaanni mangitou.

¹⁶I ya'u isul᷊e lai apia: Arie piaddu massunna si ya'u woddo. Arawe amungkangngu i yamiu massunna si ya'u aroddi, wala'ewe i ya'u apan woddo indi mamarabunga lai addio'a.

¹⁷Manansunna indi sarun ta'u iwal᷊o al᷊al᷊ua'u, arawe wal᷊ine Mawu apan nandolo'u mabbisaran olangnge udde. Su olangnge indi atonna-tonna i ya'u mabbisara naal᷊ihidda taumata woddo.

¹⁸Atonna manambo taumata apan lulluassu manga inolaannu runia, nariaddi ya'u maapulu lumuassa lai ere i mangitou.

¹⁹I yamiu ringannu naungnga mal᷊uassa masabbare su saruannu taumata woddo, ana waugu i yamiu mammendama ririnu apandeanne!

²⁰I yamiu mangke mammalan taumata mapataṛṛuallangngi yamiu, ara'e mangngapande manaranu wuṛṛu mangnganu auntunganna wuassi yamiu, ara'e mammendama ririne mattanggaṛṛanna wuassi yamiu wuṛṛu waṛṛani mamero si yamiu.

²¹I ya'u massili manga'u manungku i yamiu tumaniten lome ma'ola'a ereudde. Arawe apa apan ilalluassu taumata waine ringannu waṛṛani, ya'u lai waṛṛani! (I ya'u mabbisara ere taumata woddo).

²²I mangitou taumatan Ibrani? I ya'u lai taumatan Ibrani. I mangitou taumatan Israel? I ya'u lai taumatan Israel. Papapulunni Abraham i mangitou? I ya'u lai aroddi ere i mangitou!

²³I mangitou lai daroloṛṛanni Kristus? Aringiṛṛanna naal᷊ihida ere i ya'u inawul᷊ianten apande, arawe atonna i ya'u daroloṛṛanna apan lembon apianne wuassi mangitou sarangkanambone! I ya'u aṛṛimaranne mammanara, i ya'u asokkanne itaṛṛo sulal᷊ummu tuttupanna, i ya'u asokkanne sansaranna wuṛṛu masokka lai maraniten mate.

²⁴Paal᷊imate i ya'u sassansarannu taumatan Yahudi ringannu pappuul᷊anna paatallun pul᷊o sio anambone.

²⁵Paatallu i ya'u nipuullu manga taumatan Roma; i ya'u lai suete niwaretannu watu. Paatallu lai naapendama niṛṛammon kapalla su tahal᷊oangnga, wuṛṛu paassa i ya'u ual᷊allatto su tahal᷊oangnga al᷊annune massallo saṛṛabbi.

²⁶Masokka i ya'u ma'ola'a amamatta apan pia silakane: silakannu manawangnga, silaka mangangaṛṛo, silaka wuassu taumatan Yahudi ara'e lai wuassu taumata wal᷊ine Yahudi, silaka sulal᷊ummu soa, silaka su liuddu soa, silaka su tahal᷊oangnga, wuṛṛu silaka wuassu manga tuṛṛangnga apan mangnga'u ririne Saṛṛani wutte'e wal᷊ine.

²⁷I ya'u mattingkasahadda wuṛṛu mammanara maṛṛimadda: pattaṛṛa assa tawe matiilla, tawe umanna, tawe ma'inumma, masokka i ya'u umamatta mal᷊unussa, aamansungeanna, ana waugu tawe laubba wuṛṛu tawe tampa atatanaanna.

²⁸Su liuddu sarangkanambone udde, mamiallo i ya'u sussinggawangnga lai su ola'u anambon jamaatta.

²⁹Amungkangngu piaddu lome, i ya'u lai mammendama lome su sambau. Amungkangngu piaddu nanawo su rosa, naungku lai massusa.

³⁰Ne, amungkangngu i ya'u mammarabungan sambau inolaanna, ne i ya'u mammarabunga manga inolaanna apan mapaal᷊iatta'u al᷊allome'u.

³¹Ruata, Iamangngu Mawu Yesus masingkata manungku i ya'u tawe mangawusu. Aranne raloanna saran mal᷊annu-l᷊annu.

³²Su tempo i ya'u uatana'a su Damsyik, gubernure apan uaparenta isudde su al᷊ungngu parentan Ratu Aretas, nandolokku tantara mandiaga ngaran soa udde see iapasametta si ya'u.

³³Arawe ringannu sambau so'anna wahewa i ya'u niul᷊ukka su sambau loṛṛangnga su paggala watu udde. Aroddi ya'u nal᷊iu wuassu liman gubernure udde.