Read Talaud 2 KORINTUS 12 Bible Online

2 KORINTUS 12 - Talaud bible

2 KORINTUS 12

¹Atonna tawe auntunganne amungkangngu mamarabunga. Arawe i ya'u lai maapulu mamarabunga manga inolaanna apan niapaasilon Duata si ya'u sulal᷊ummu sondapa ara'e sulal᷊ummu aellega.

²I ya'u maaillal᷊a sangkatou Saṛṛani apan mapul᷊ote appata su tonnane nal᷊iu niapaasengkengnga su tampa atanggaṛṛanne su surga. (I ya'u wagga tanne wadangnge atonna-tonna nasengkengnga ara'e tumba'u sambau aellega — tumba'u Ruata sassane masingkata.)

³Ta'u isul᷊e paassa apia: I ya'u masingkata manungku taumata indi nasengkengnga niapaasutta su Firdaus. (I ya'u wagga tanne wadange atonna-tonna nasengkengnga, ara'e udde tumba'u sambau aellega — tumba'u Ruata apan masingkata.) Poiaroddi taumata sarun maaringikka manga inolaanna apan tawe iasi'attu taumata wuṛṛu isassingadda su taumata mabbisaran wisara udde.

⁵Ete su ola'u taumata udde apan ta'u ipammunga, wal᷊ine su ola'u wadangku sassane. Su ola'u wadangku sassane, tumba'u manga inolaanna apan mapaal᷊iatta'u al᷊allome'u eteudde apan ta'u ipammunga.

⁶Unnu wisara i ya'u lai maapulu mamarabungan sambau inolaanna, i ya'u maddiri mattal᷊imoṛṛonganna apan awusu; i ya'u sarun mabbisara ringannu atonna. Arawe i ya'u maṛṛadannu riri'u, tadea'u tawe taumata massunna i ya'u nangillembo wuassu apa buatte niasiloanni tou su inolaangku ara'e apa apan suete niaringiṛṛanni tou su wisara'u.

⁷Arawe tadea'u i ya'u tawe tumaniten mamarabunga ana waugu aellega apan wahewalla udde, i ya'u nionggol᷊annu lihiddu radda'a su wadangku apan maola'a ahiddu Setanna. Radda'a udde nionggola ipamuulla si ya'u, tadea'u i ya'u tawe mamarabunga.

⁸Paatallu i ya'u u'al᷊iomanna su Ruata tadea'u radda'a udde marau wuassi ya'u.

⁹Arawe Mawu sinumimbakka, “I Ya'u mandangngu si'o wuṛṛu ete indi wuannu; ana waugu taṛṛino-U ahewal᷊anne amungkangngu i'o sulal᷊ummu al᷊allome.” Ana waugu udde naungku mal᷊uassa mamarabungan al᷊allome'u, ana waugu amungkangngu i ya'u lome, ne su tempo udde i ya'u maapendama manungku Kristus uariagga si ya'u ringannu atatohan-Ne.

¹⁰Nariaddi ya'u lulluassa ringannu al᷊allome'u. I ya'u lai lulluassa amungkangngu ana waugu Kristus i ya'u nial᷊uandahanna, i ya'u naasomba asasusa, a'enggenanna, wuṛṛu i ya'u naapendama sahadda. Ana waugu amungkangngu i ya'u lome, su tempo udde i ya'u naola'a matohassa.

¹¹Atonna i ya'u buatte nattanno ere taumata woddo — arawe ete i yamiu na'ola'a si ya'u aroddi. Ṛinone ete i yamiu maddalo si ya'u. Ana waugu salaiwe i ya'u tawe aregane saran kadio'a, i ya'u mangke ere “manga rasul” apan wahewalla udde!

¹²Manga al᷊aṛṛindu'a wuṛṛu manga inolaanna apan tumaniten wahewalla wuṛṛu manga manara apan wahewalla buatte niapaasilo ringannu sabare si yamiu, ipattiala manungku i ya'u sangkatou rasul.

¹³Sulal᷊ummu inolaanna apa i yamiu tawe pandumanna, amungkangngu isumandinga ringannu manga jamaatta waine? Asinungka tumba'u su ola'u inolaanna indi: manungku i ya'u tawe mapaasusan kamiu ana waugu massumbala si ya'u. Ampunge i ya'u su pasasal᷊a'u udde!

¹⁴Orassa indi paatallute i ya'u nasaddiate inai mattembo si yamiu. Wuṛṛu i ya'u maddiri mapaasusan kamiu, ana waugu apulu'u wal᷊inewe apa apan tatahuananni yamiu, ewe'e ririnu. Ana waugu wal᷊ine al᷊aṛṛana'a apan maddea'a wiakka iapaanna su hagurangnge, ewe'e ete hagurangnga udde mappadul᷊i al᷊aṛṛanangnge.

¹⁵Ana waugu udde ringannu naungnga mal᷊uassa i ya'u manantillu al᷊awo'u darotongku si yamiu, ewe'e wadangku sassane lai. Amungkangngu i ya'u aroddi arangngune si yamiu apa i yamiu tawe mandangngu si ya'u?

¹⁶Ne, i yamiu nattatuṛṛutante manungku i ya'u tawe saran paassa napaasusan kamiu. Arawe piaddu mabbisara manungku i ya'u indi mangngapande; manungku i ya'u naasomba auntunganna wuassi yamiu ana waugu i ya'u mangngapande.

¹⁷Tawe mariaddi! Apa wuassu manga taumata apan ta'u nirolokka si yamiu udde i ya'u mangnganu auntunganne wuassi yamiu?

¹⁸I ya'u suete nandolokki Titus inai mattembo si yamiu, wuṛṛu i ya'u nandolokku tuṛṛangnga waine apan Saṛṛani inai su sambau ringanni tou. Apa Titus nanganu auntunganna wuassi yamiu? Arawe iambua mammanara ringannu pandumma apan uasul᷊ungnga wuṛṛu ma'ola'a ringannu inolaanna apan uasul᷊ungnga!

¹⁹Wotongnge mariaddi yamiu massunna, al᷊annunete indi yami tantal᷊anna mangngambangnga watanganni yami su saruanni yamiu? I yamiu nial᷊iwune atonna! Ruata masingkata manungku al᷊awo'u wisaran kami udde tumuṛṛuttu apulun Kristus. Wuṛṛu al᷊awo'u inolaanni yami udde niola'a ipannohassa pangangimanni yamiu.

²⁰I ya'u sussinggawangnga manungku su tempo i ya'u mattembo si yamiu, i ya'u naaratingnga tawe ere apa apan aantimangku. Aṛṛengenne aratinganna piaddu uawawul᷊o, naungnge lal᷊eo, naungnge mal᷊oso, tumba'u madea'a hausannu watanganne, uaaumbilangnga, mappawawul᷊o, mawunga wuṛṛu ma'ola'a patatatiakka.

²¹I ya'u mata'utta amungkangngu su tempo i ya'u rumanta Ruata sarun mapaawawo'u su saruanni yamiu wuṛṛu i ya'u sarun lumuai ana waugu manambo su wallatti yamiu dorone marosa, tawe mawal᷊u, wuṛṛu tawe mangillol᷊o ma'ola'a manga inolaanni mangitou apan sussandaga, nagal᷊imutanna wuṛṛu tawe su ṛinone.