Read Talaud 2 KORINTUS 13 Bible Online

2 KORINTUS 13 - Talaud bible

2 KORINTUS 13

¹Indi atallunete i ya'u rumanta mattembo si yamiu. Sulal᷊ummu Wuke Susi uawoṛṛetta, “Suapan hatto ṛinone pia matatialane darua ara'e sire tallu, wakkute udde hatto udde atonna.”

²Manga taumata su tempo nal᷊iu suete na'ola'a rosa wuṛṛu anambon taumata waine, buatte niwal᷊oangku paarorone su tempo i ya'u aruane nattembo si yamiu. Orassa indi ana waugu i ya'u maraute ringanni yamiu, i ya'u mabal᷊o apia amungkangngu i ya'u rumanta lai, tawe saran sangkatou wuassi mangitou apan mal᷊iu wuassu ṛuumanna.

³Ne i yamiu sarun maasomba anambon tatialane apan ipaapulun kamiu manungku Kristus atonna-tonna mabbisara si ya'u. Amungkangngu Kristus mamasingkata si yamiu, i Tou tawe mamasingkata ringannu al᷊allome, arawe ṛinone i Tou mapaal᷊iatta'u taṛṛino-Ne su wallatti yamiu.

⁴Atonna su tempo i Tou niarussa, i Tou lome, arawe orassa indi i Tou mabbiakka ringannu taṛṛino Ruata. I yami lai lome sulal᷊ummu wiakki yami apan uaaukka ringanni Kristus, arawe napawe sumaruanna si yamiu, i yami lai matohassa su sambau ringanni Kristus ana waugu taṛṛinon Duata.

⁵Annama'o i yamiu maannammu watanganni yamiu sassane, apa i yamiu atonna-tonna mabbiakka ana waugu mangngimanna si Kristus! I yamiu sarun maatutukka manungku Kristus Yesus udde sulal᷊ummu naungngi yamiu! — waine lai olangnge amungkangngu i yamiu tawe mangngimanna atonna-tonna.

⁶I ya'u mangantimma i yamiu maatutukka manungku i yami wal᷊inewe taumata mal᷊ihakka awono'anna.

⁷I yami u'al᷊iomanna su Ruata antimanna i Tou mantul᷊ungngi yamiu ana see tawe ma'ola'a pasasal᷊a. Wal᷊inewe mapaal᷊iatta'a manungku i yami indi pande mammanara, arawe tadea'u i yamiu tuttuṛṛutta apulun Duata — salaiwe aellehanna i yami tawe tumuṛṛutta, udde tawe apane!

⁸Ana waugu i yami tawe maapa'ola'a sambau inolaanna apan uataae ringannu apan naṛṛino; i yamiu sarun tumuṛṛutta apan naṛṛino.

⁹I yami lulluassa amungkangngu i yami lome wuṛṛu i yamiu matohassa. I yami u'al᷊iomanna lai tadea'u i yamiu maola'a masuungnga.

¹⁰Ana waugu udde, i ya'u namoṛṛettu suratta indi su tempo i ya'u taambe uatana'a su pattangnganni yamiu. Ringannu aroddi, amungkangngu i ya'u rumantate, i ya'u tawe mamarenta ringannu maṛṛagissa su saruanni yamiu ringannu taṛṛino apan nionggolu Mawu si ya'u. Taṛṛino udde nionggola ipannohassa pangangimanni yamiu, wal᷊inewe ipandal᷊eo si yamiu.

¹¹Panginsueanne, manga tuṛṛangnga, ṛinone i yamiu lumuassa, wuṛṛu padea'a, tadea'u i yamiu maola'a masuungnga. Sengkamawe al᷊awo'u tatantiro'u. Ṛinone i yamiu naungnga sambau wuṛṛu mabbiakka su paddarame. Ruata Lembon Maakkanna wuṛṛu masaṛṛionto'a udde sarun matana'a ringanni yamiu.

¹²Paa'adattawe sangkatou ringannu sangkatou, ringannu aakkanna ere passasangkatuṛṛangannu taumatan Saṛṛani. Anambon al᷊aṛṛana'u Ruata napaapiddu tabea si yamiu.

¹³Mawu Yesus Kristus mangal᷊amatta si yamiu, Ruata mandangngu si yamiu, wuṛṛu Ghaṛṛahon Duata uaintaṛṛo si yamiu sarangkanambone! Tabean wuassi yami, Paulus