Read Talaud 2 KORINTUS 2 Bible Online

2 KORINTUS 2 - Talaud bible

2 KORINTUS 2

¹Ana waugu udde i ya'u buatte nakkawessa tate lai rumanta ringanni yamiu ana waugu patatembo'u apan maasusa si yamiu.

²Ana waugu amungkangngu i ya'u mapaasusan kamiu, isai lai apan wotongnge mallimbatta naungku, amungkangngu wal᷊ine manga taumata udde lai apan buatte niapaasusa'u naungnge?

³Ana waugu udde i ya'u namoṛṛettu suratta udde si yamiu. I ya'u maddirite mattembo si yamiu, see mapaasusan kamiu, sumbal᷊i ete i yamiu malluassa si ya'u. Ana waugu i ya'u mangngimanna manungku amungkangngu i ya'u lulluassa, ne i yamiu sarangkanambone lulluassa lai.

⁴I ya'u namoṛṛettu suratta si yamiu ringannu naungnga massusa wuṛṛu ipabbawata'a wuṛṛu ringannu manambo mapaaturon allo mata. Pandumangku wal᷊ine tadea'u i yamiu masusa, arawe tadea'u i yamiu maatutukka manungku i ya'u lembon mandangngu si yamiu.

⁵Amungkangngu pia taumata apan nallaṛṛa'u asasusa, ne olangnge udde niola'i tou wal᷊ine tuddane si ya'u, ewe'e su tuṛṛangnga sarangkanambone ara'e asinungka sangkadoanna wuassu tuṛṛangnga. I ya'u maddiri tumaniten maṛṛagissa si tou.

⁶Su taumata apan ereudde, ṛuumanna apan ionggola si tou wuassu taumata anamboanne su wallatti yamiu, wotongngete.

⁷Orassa indi yamiu ṛinone mangampunga si tou wuṛṛu mangonggolu sasasa lai si tou tadea'u i tou tawe tumaniten masusa naungnge ma'oman sara tate antimma saran kadio'a.

⁸Ana waugu udde i ya'u sumal᷊ande, tadea'u i yamiu mapaal᷊iatta'a apia si tou, manungku i yamiu atonna-tonna marangngu si tou.

⁹I ya'u namoṛṛettu suratta udde si yamiu ringannu pandumanne maannamma si yamiu, tanne i yamiu sidutu maapulu tumuṛṛutta manga tatantiro'u.

¹⁰Amungkangngu i yamiu mangampunga taumata apan buatte nassal᷊a si yamiu, ne i ya'u lai mangampunga taumata udde. Ana waugu apa apan buatte niampungangku — amungkangngu atonna ta'e pia apan ta'u ampunganna — udde ampungangku su saruanni Kristus maola'a apapian kamiu.

¹¹I ya'u na'ola'a udde tadea'u Setanna tawe maapanganu tempone ipamarenta si ite, ana waugu i ite masingkatu manga pandumanne.

¹²Su tempo i ya'u na'omate su Troas ringannu pandumanna mabbatti'u Watti'u Al᷊al᷊uassa su ola'i Kristus, Mawu buatte namu'a lal᷊anna si ya'u ipammanara su tampa udde.

¹³Arawe i ya'u tawe matammuda ana waugu taambe napassomban tuṛṛangngi ite Titus poiaroddi. Ne i ya'u naddorongke mapul᷊e su manga taumata su tampa udde see inaite watukku Makedonia.

¹⁴Arawe aadiangkamanna su Ruata! I Tou sidutu mangngehetta si yami tumantalongnga su amatanni Kristus ana waugu i yami mabbiakka su sambau ringanni Tou. Ruata nappaatti yami tadea'u watti'a su ola'i Kristus massal᷊iawukka naal᷊ihida hal᷊uru mawangngi su al᷊awo'u tampa.

¹⁵Ana waugu i yami naal᷊ihida hal᷊urun amania apan mawangngi, apan tinutungngu Mawu Yesus hunane su Ruata. Su saruannu manga taumata apan mattudan papate, i yami indi naal᷊ihida hal᷊urun papate apan maapate; arawe su taumata nambo apan tantal᷊anna iapaasal᷊amatta, i yami indi naal᷊ihida hal᷊uru mawangngi apan mandantan pabbawiakka. Ei, isai wotongnge maasuungngu manara indi?

¹⁷I yami tawe naal᷊ihida ere taumata nambo apan ma'ola'a Watti'u Ruata ere saranapa wal᷊u'anna. Manga pandumanni yami udde waresi, ana waugu i yami nirolokku Ruata. Wuṛṛu Ruata sassane ua'ellega manungku i yami mammasingkatu watti'a udde naola'a allangngi Kristus.