Read Talaud GALATIA 1 Bible Online

GALATIA 1 - Talaud bible

GALATIA 1

¹Manga tuṛṛangnga manga jamaatta su wageangngu Galatia, i ya'u, Paulus, wuṛṛu anambon tuṛṛangnga taumatan Saṛṛani apan suadio'a ringangku, mangngantima doronganna Ruata Iamangngi ite wuṛṛu Mawu Yesus Kristus mangonggolu al᷊amatta wuṛṛu paddarame si yamiu. I ya'u naola'a rasul wal᷊ine ana waugu wuassu taumata, ara'e ana waugu nitenegu taumata, ewe'e ana waugu Yesus Kristus Ruata Iamangngi ite apan suete napaawiakki Tou apia wuassu papate.

⁴Tuttuṛṛuta apulun Duata Iamangngi ite, Kristus nanantillu watangan-Ne maola'a sasamba ana waugu manga rosang kite, tadea'u i ite iapaasal᷊amatta wuassu tempo apan lal᷊eo indi.

⁵Daralo su Ruata ma'oman sara mal᷊annu-l᷊annu! Amin.

⁶I ya'u tinumiangnga su ola'u manga tuṛṛangnga! I yamiu niwagoannu Ruata ana waugu darangngun Kristus, arawe orassa indi yamiu aroddi al᷊ihakke tinumal᷊iudda Ruata wuṛṛu mangngimanna “watti'u al᷊al᷊uassa” apan uapapaṛṛalan Watti'u Al᷊al᷊uassa wuassu Ruata.

⁷Tumuṛṛuttu atonna tate lai “watti'u al᷊al᷊uassa apan waine”. Tumba'u pia manga taumata apan mammasingkata si yamiu “watti'u al᷊al᷊uassa”, su ola'i Kristus apan niwal᷊elongngi mangitou na'oman sara i yamiu nial᷊iwune.

⁸Taumata apan mabatti'u “watti'u al᷊al᷊uassa” apan uapapaṛṛala wuassu Watti'u Al᷊al᷊uassa apan buatte niapaasingkati ami, wala'e i tou iṛṛuumannu Ruata — salaiwe taumata udde, i yami sassane ara'e mala'ekatta wuassu surga!

⁹I yami buatte nabbisara paarorone, orassa indi ya'u mabbisara paassa lai: Taumata apan mammasingkata si yamiu “watti'u al᷊al᷊uassa” apan uapapaṛṛalan Watti'u Al᷊al᷊uassa apan suete niaringiṛṛani yamiu wuassi yami, taumata udde ṛinone iṛṛuumannu Ruata!

¹⁰Apa ringannu olangnge udde pendamanna ere i ya'u mangngantima a'uannu taumata? Atonna-tonna tawe! I ya'u tumba'u mangngantima panga'uanna wuassu Ruata. Apa i ya'u sidutu mattinsahadda mammol᷊engnga naungngu taumata tadea'u i ya'u maal᷊uassa taumata? Amungkangngu inolaangku sidutu aroddi, ya'u wal᷊inewe allangngi Kristus.

¹¹Manga tuṛṛangnga ṛinone maasingkata manungku Watti'u Al᷊al᷊uassa apan iwabbatti'u udde darantane wal᷊ine wuassu taumata.

¹²I ya'u tawe nanengkamma watti'a udde wuassu taumata, wuṛṛu tawedu sangkatou apan nangaṛṛa'a si ya'u. Mawu Yesus Kristus sassane apan namu'a lal᷊oṛṛon Watti'u Al᷊al᷊uassa udde si ya'u.

¹³Asinungka i yamiu buatte naaringikka su ola'u i ya'u mabbiakka dorone eteudde sangkatou apan mangngimanna agaman Yahudi. Yamiu masingkata ereapa aṛṛagine i ya'u su jamaatu Mawu wuṛṛu ereapa aṛṛagine i ya'u mappandumma mamate si mangitou.

¹⁴Sulal᷊ummu mappaamattu agaman Yahudi, ya'u nangillembo wuassu anambon taumatan Yahudi apan santuwo'u. I ya'u maṛṛimada su ola'u manga inolaannu addatu iupungngu al᷊amonan kami.

¹⁵Arawe ana waugu apapian naungngu Ruata, i Tou namile si ya'u tantal᷊anna i ya'u taambe niasungkanga wuṛṛu namago si ya'u iapa'imbe si Tou.

¹⁶Ruata nanualagu Anang-Nge si ya'u tadea'u Watti'u Al᷊al᷊uassa su ola'u Anang-Nge wotongnge iwatti'u su manga taumata wal᷊ine Yahudi. Su tempo udde i ya'u tawe inai ringannu sangkatou madorongnga al᷊aṛṛa'a.

¹⁷I ya'u lai tawe inai ringannu manga taumata su Yerusalem apan maddoroneanna wuassia'u naola'a rasul. Arawe i ya'u inaite watukku leta'u Arab, see wua isudde nabelengke apia watukku Damsyik.

¹⁸Tallu tonna wua'udde, i ya'u inaite watukku Yerusalem maisasomban Petrus. I ya'u uatana'a ringanni tou tumba'u mapul᷊o lima su allone al᷊annune.

¹⁹I ya'u tawe nassomba manga rasulle waine, tabbene'e Yakobus, tuṛṛangngu Mawu.

²⁰Apa apan ta'u niwoṛṛeta indi atonna. Ruata masingkata manungku i ya'u tawe mangawusu!

²¹Wua'udde i ya'u inaite watukku manga wageangngu Siria wuṛṛu Kilikia.

²²Na'oman sara tempo udde manga jamaattu Saṛṛani su Yudea taambe naaillal᷊a si ya'u ringannu uahahati.

²³I mangitou tumba'u maaringikka taumata mabbisara, “Taumata apan dorone mandal᷊eo si yami, orassa indi mabatti'u pangangimanna apan dorone ihagohakki tou.”

²⁴Ne i mangitou nadalote Ruata ana waugu i ya'u.