Read Talaud GALATIA 2 Bible Online

GALATIA 2 - Talaud bible

GALATIA 2

¹Mapul᷊o appata su tonnane wua'udde, i ya'u nabbelengke watukku Yerusalem su sambau ringanni Barnabas, wuṛṛu uaapidi Titus.

²I ya'u inai watukku Yerusalem ana waugu Ruata buatte napaal᷊iatta'a si ya'u manungku i ya'u ṛinone inai. Wuṛṛu sulal᷊ummu sambau ammul᷊anna apan tumba'u ringannu manga piaṛṛangnge poiaroddi, ya'u mannal᷊a'an Watti'u Al᷊al᷊uassa apan iwabatti'u su manga taumata apan wal᷊ine Yahudi. Ana waugu i ya'u maddiri manara'u dorone, ara'e manara'u tempo indi maola'a tawe mangal᷊ene.

³Titus, apan uaammungnga si ya'u, eteudde sangkatou taumatan Yunani, arawe i tou tawe niwata'a tumuṛṛutta atorannu sunatta,

⁴salaiwe pia manga taumata mammata'u olangnge udde. I mangitou udde manga taumata apan sinumutta awagananna sulal᷊ummu ammul᷊anni ite wuṛṛu mattingkaola'a ere tuṛṛangnga. I mangitou sinumutta ringannu mal᷊anna-l᷊annaba mannaṛṛassida al᷊al᷊uassa apa niola'i ite ana waugu i ite uaaukke ringanni Kristus. I mangitou maapulu mapaawelengngi ite su olangnge paarorone ere sangkatou allangnga,

⁵arawe i yami maddiri sumoṛṛota sarang kadio'a wuassi mangitou, ana waugu i yami maapulu mandiaga tadea'u Watti'u Al᷊al᷊uassa udde mangke uatana'a waresi ringanni yamiu.

⁶Manimbe aroddi, tawe inolaanna wakku apan radeaannu manga taumata apan aellehanna ere piaṛṛangnge wuassia'u — mawala si ya'u tawe paṛṛalanne amungkangngu i mangitou piaṛṛangnge ara'e tawe, ana waugu Ruata tawe mamile hati.

⁷Arawe manga taumata apan aellehanna piaṛṛange udde mangnga'u manungku Ruata buatte napamanara'u mamasingkatu Watti'u Al᷊al᷊uassa su taumata wal᷊ine Yahudi, ere lai i Tou buatte napamanaram Petrus namasingkatu Watti'u Al᷊al᷊uassa udde su taumatan Yahudi.

⁸Ana waugu Ruata nangonggolu atatohassa si Petrus maola'a rasullu taumatan Yahudi, wuṛṛu nangonggola lai atatohassa si ya'u maola'a rasullu taumata wal᷊ine Yahudi.

⁹Yakobus, Petrus wuṛṛu Yohanes, apan aellehanna naola'a manga piaṛṛa'u jamaatta, mangnga'u manungku Ruata buatte nangonggolu manara indi si ya'u. Ne i mangitou naa'agassa lima ringanni Barnabas wuṛṛu i ya'u, maola'a sambau tatialan pagahahawe. See i mangitou wuṛṛu i yami sambaidda manungku i yami sarun mammanara su wallatu manga walahanna wal᷊ine Yahudi, wuṛṛu i mangitou su wallatu taumatan Yahudi.

¹⁰Tumba'u sambau darorongngi mangitou eteudde tadea'u i yami umakkannu taumata asiangnga. Wuṛṛu i ya'u sidutu mal᷊uassa mammanara udde.

¹¹Su tempo Petrus nirumanta su Antiokhia, i ya'u nanagu si tou ringannu uahahati, ana waugu pallal᷊agune nassal᷊a.

¹²Paarorone i tou inuma'ianna u'anna suaddio'a ringannu manga tuṛṛanga apan wal᷊ine Yahudi. Arawe napawe manga taumata daroloṛṛani Yakobus narantate, i tou nassal᷊iu marau wuassu manga tuṛṛanganga apan wal᷊ine Yahudi wuṛṛu maddirite umanna suadio'a ringanni mangitou, ana waugu matta'uttu manga taumata apan maapulu anambon taumata udde sunatanna.

¹³Manga tuṛṛangnga Yahudi apan waine lai nattanno ere lilangkamal᷊e'i Petrus, na'oman sara Barnabas niawoheanna lai nattanno pallal᷊agun mangitou.

¹⁴Aroddi ya'u naasilo manungku pallal᷊agu mangitou uapapaṛṛalan atatul᷊iddu Watti'u Al᷊al᷊uassa udde, i ya'u nabbisara si Petrus su saruannu awadaalla apan uasemodda isudde. “Amungkangngu Tuṛṛangnga sangkatou Yahudi apan buatte nabbiakka naal᷊ihidda taumata wal᷊ine Yahudi, anio Tuṛṛangnga orassa indi maapulu mamata'u manga taumata waine mabbiakka ere taumatan Yahudi?”

¹⁵Atonna tumuṛṛuttu tampa inariadianna, i yami indi taumatan Yahudi wuṛṛu wal᷊ine “taumata wal᷊ine Yahudi apan marosa.”

¹⁶Salaiwe aroddi yami masingkata manungku taumata nasasangkapian Duata tumba'u ana waugu mangngimanna si Yesus Kristus, wuṛṛu wal᷊ine ana waugu tuttuṛṛuta titan agama. I yami sassane lai mangngimanna Mawu Yesus Kristus tadea'u i yami masasangkapia Duata wuassu pangangimanni yami udde, wal᷊ine ana waugu mappaattu titan agama. Ana waugu mappaattu titan agama, tawe saran sangkatou masasangkapia apia ringannu Ruata.

¹⁷I yami mappandumma masasangkapia apia ringannu Ruata ringannu mabbiakka uaaukki Kristus. Arawe amungkangngu buatte na'ola'a aroddi, inauranna i yami ta'e lai “manga taumata marosa” ere lai manga taumata wal᷊ine Yahudi, apa indi atappasanne manungku ete Kristus apan naarosa si yami? Natantuna tawe!

¹⁸Amungkangngu i ya'u manattakke mapararisikka apia atorannu titan agama apan buatte ta'u nihohakka, ne i ya'u napaal᷊iatta'a manungku i ya'u buatte na'ola'a lumal᷊awangnga tita udde.

¹⁹Arawe i ya'u natete su saruannu titan agama — nipaten tita udde sassane — tadea'u i ya'u wotongnge mabbiakka hunane su Ruata. I ya'u buatte niarussa su sambau ringanni Kristus.

²⁰Orassa indi wal᷊inewe i ya'u mabbiakka, arawe ete Kristus apan mabbiakka sulal᷊ummu wadangku. Wiakka apan iraṛṛingi'u orassa indi eteudde mabbiakka ipangngimanna Ana'u Ruata apan marangngu si ya'u wuṛṛu buatte nanantillu watangan-Ne ana waugu i ya'u.

²¹I ya'u tawe mangngadio'a darangngun Ruata. Amungkangngu paa'aukku taumata ringannu Ruata mabbal᷊i mapia apia ana waugu mappaamattu titan agama, udde mangal᷊ene papaten Kristus tawe gunane!