Read Talaud GALATIA 3 Bible Online

GALATIA 3 - Talaud bible

GALATIA 3

¹Manga tuṛṛangnga taumatan Galatia! I yamiu woddo atonna. Tanne i yamiu niaṛṛinoanten wawono'i sai? Papaten Kristus su alu arussa suete ta'u tinal᷊a'a ringannu masema-semakka si yamiu!

²Annama'a wal᷊oa'a si ya'u inolaanna sambau indi: Apa i yamiu suete nanengkamma Ghaṛṛahon Duata ana waugu mappaamattu titan agama, ara'e ana waugu i yamiu naaringikka Watti'u Al᷊al᷊uassa wuassu Ruata wuṛṛu mangngimanna si Kristus?

³Anio i yamiu aroddi awoddone! I yamiu mannattake mabbiakka wakku ringannu Ghaṛṛahon Duata, ṛatadde orassa indi yamiu maapulu maasomba asasuungnga wuassu auatannu sassane?

⁴Tate gunane sarangkanambone apan buatte niapendamanni yamiu udde? Ṛatadde tawe gunane!

⁵Ruata nangonggolu Ghaṛṛaho-Ne si yamiu wuṛṛu na'ola'a manga al᷊aṛṛindu'a su wallatti yamiu. Apa Ruata na'ola'a udde ana waugu i yamiu mappaamattu titan agama ara'e ana waugu i yamiu maddaringikka Watti'u Al᷊al᷊uassa udde wuṛṛu mangngimanna si Kristus?

⁶Udde ere lai uawoṛṛetta sulal᷊ummu Wuke Susi su ola'i Abraham — arendi, “Abraham mangngimanna Ruata wuṛṛu ana waugu pangangimanne udde i tou nitarimmatu Ruata maola'a taumata apan maal᷊uassa naungngu Ruata.”

⁷Nariaddi ṛinone i yamiu manutukka manungku taumata apan atonna-tonna papapulunni Abraham eteudde taumata apan mangngimanna Ruata.

⁸Wuke Susi buatte na'ellega paarorone manungku Ruata namalanmanga taumata wal᷊ine Yahudi masasangkapia apia ringannu Ruata, amungkangngu i mangitou mangngimanna si Tou. Watti'u Al᷊al᷊uassa udde niapaasingkata paarorone si Abraham sulal᷊ummu paaire indi, “Wuassi'o, Ruata sarun mangal᷊amatta al᷊awo'u walahannu taumata su wowon runia indi.”

⁹Araham mangngimanna, ne i tou nial᷊amatanna. Aroddi lai anambon taumata apan mangngimanna sarun al᷊amatanna suadio'a ringanni Abraham.

¹⁰Manga taumata apan uatundeeta su titan agama, sarangkanambone mabbiakka su al᷊ungngu awawontoga. Ana waugu sulal᷊ummu Wuke Susi uawoṛṛetta, “Taumata apan tawe tumuṛṛutta mappaamattu sarangkanambone apan uawoṛṛetta sulal᷊ummu Wuke Titan Agama, awontohannu Ruata!”

¹¹Tawe saran sangkatou apan masasangkapian Duata ana waugu mappaamattu titan agama. Olangnge udde buatte niapaal᷊iatta'a sulal᷊ummu Wuke Susi, “Tumba'u taumata apan mangngimanna Ruata na'oman sara paa'aukke ringannu Ruata maola'a mapia apia, sarun maralukka!”

¹²Arawe titan agama tawe maola'a pangaianannu pangangimanna. Sulal᷊ummu Wuke Susi uawoṛṛetta manungku taumata apan mappaamattu titan agama, sarun maralukka ana waugu tita udde.

¹³Arawe Kristus namallosi ite wuassu awawontogu titan agama. I Tou na'ola'a udde ringannu namalan watangan-Ne awontohanna ana waugu i ite. Ana waugu sulal᷊ummu Wuke Susi uawoṛṛetta, “Niawontohante taumata apan nate niele su alu pangangeleanna.”

¹⁴Kristus na'ola'a aroddi tadea'u al᷊amatta apan pina'iren Duata si Abraham ionggola lai su manga taumata wal᷊ine Yahudi. Ringannu aroddi i ite lai apan mangngimanna Ruata, wotongnge manengkamma Ghaṛṛaho apan pina'iren Duata udde.

¹⁵Manga tuṛṛangnga! Mappianne i ya'u mappaamattu sambau tul᷊adda wuassu apa apan buatte niapendamanna miallo-miallo. Amungkangngu taumata ma'ola'a sambau paaire wuṛṛu paaire udde buatte nia'u su sambau, ne tawe saran sangkatou apan wotongnge mamal᷊u paaire udde, ara'e manamba paaire udde.

¹⁶Manga paaire Ruata niola'u Ruata si Abraham wuṛṛu lai hunane su taumata papapulunni Abraham. Sulal᷊ummu Wuke Susi tawe uawoṛṛetta “wuṛṛu su manga taumata pappapulunni Abraham”, atappasanne eteudde anambon taumata. Apan uawoṛṛetta isudde eteudde “wuṛṛu hunane su taumata papapulunnu”, atappasanne tumba'u sangkatou, eteudde Kristus.

¹⁷Apan ta'u iwal᷊o isindi eteudde indi: paairen Duata buatte niola'a wuṛṛu niwaidda paarorone. Titan agama apan nionggolla 430 su tonnane wua isudde tawe maawal᷊u paairene wuṛṛu maapappassa paaire Ruata udde.

¹⁸Ana waugu amungkangu aonggolu Ruata uatundeeta su titan agama, ne tate lai aonggola apan pina'ire. Ewe'e ana waugu Ruata suete na'ire si Abraham, ne Ruata nangonggolu udde si tou.

¹⁹Amungkangu aroddi, ipa'ura titan agama nionggolla? Sasimbakke eteudde manungku tita udde nipanamba tadea'u mapaal᷊iatta'u lal᷊awangngu taumata. Titan agama udde tumba'u ipappaatta ma'oman sara darantan sangkatou papapulunni Abraham, apan nisaggo sulal᷊ummu paairen Duata si Abraham. Titan agama udde niwal᷊o manga mala'ekatta ringannu pal᷊elene sangkatou taumata.

²⁰Ne, ṛinone pia darua wageange, wakkute udde pia sangkatou pal᷊elene. Arawe Ruata tawe mappanduma pal᷊elene, ana waugu i Tou sassane mammanara.

²¹Apa udde atappasanne manungku titan agama uapapaṛṛalan paaire Ruata? Tawe! Ana waugu amungkangngu titan agama nionggolla maola'a lal᷊annu wiakku taumata, ne taumata wotongnge masasangkapia Ruata ringannu lal᷊anne tumuṛṛutta titan agama.

²²Arawe sulal᷊ummu Wuke Susi uawoṛṛetta manungku anambon walahannu taumata mangke uatana'a su al᷊ungngu taṛṛinon dosa. Ana waugu udde, aonggola apan pina'ire pinangiananne wuassu mangngimanna Mawu Yesus Kristus nionggolla si mangitou apan mangngimanna.

²³Tantal᷊anna taambe nia'omanna tempone i ite mangngimanna Mawu Yesus Kristus, i ite lal᷊u'arannu titan agama ringannu mapia; i ite naal᷊ihida niṛṛimputa ma'oman sara pangangimanni ite udde lumiatta'a.

²⁴Ringannu aroddi, titan agama naola'a mandariaga si ite ma'oman sara Kristus rumanta ma'ola'a si ite masasangkapian Duata ana waugu i ite mangngimanna si Kristus.

²⁵Orassa indi, ana waugu nia'omante tempone taumata sarun mangngimanna si Kristus, ne i ite tate lai rariagannu titan agama.

²⁶Ana waugu i yamiu mangngimanna si Kristus Yesus, ne i yamiu uaaukka ringanni Tou; wuṛṛu ana waugu udde i yamiu maola'a al᷊aṛṛana'u Ruata.

²⁷I yamiu sarangkanambone buatte nisaṛṛani sulal᷊ummu aranni Kristus, nariaddi yamiu buatte nanengkamma sulal᷊ummu watanganni yamiu pallal᷊agun Kristus sassane.

²⁸Sulal᷊ummu olangnge indi tate lai paṛṛalane su wallatu taumatan Yahudi wuṛṛu taumata wal᷊ine Yahudi, su wallatu allangnga wuṛṛu tawe allangnga, su wallatu esakka wuṛṛu wawine. I yamiu sarangkanambone sambau ana waugu Kristus Yesus.

²⁹Amungkangngu i yamiu tatahuanni Kristus ne eteudde i yamiu papapulunni Abraham. Ne i yamiu sarun manengkamma apa apan buatte pina'iren Duata.