Read Talaud GALATIA 5 Bible Online

GALATIA 5 - Talaud bible

GALATIA 5

¹I ite orassa indi nal᷊iute, ana waugu Kristus buatte namallosi ite! Ana waugu udde paa'agassa apapallosa udde, wuṛṛu ariete pattingka allangnga apia.

²Paanaunge, amungkangngu i yamiu madorongnga maisunatta, udde mangal᷊ene Kristus tawe gunane si yamiu. Nabbisara wisara indi, eteudde i ya'u sassane, Paulus.

³Paassa lai ya'u mappaanaungnga su taumata apan ma'isunatta, manungku i tou ṛinone mappaamattu anambon titan agama!

⁴Amungkangngu i yamiu maapulu masasangkapia apia ringannu Ruata wuassu lal᷊ummu titan agama, udde atappasanne paa'aukku ringanni Kristus nabassute. Ringannu aroddi yamiu mabbiakka su liuddu darangngun Ruata.

⁵Arawe si yami indi, yami mangngantima manungku ringannu tul᷊ungannu Ghaṛṛahon Duata wuṛṛu sulal᷊ummu pangangimanni ami si Kristus, Ruata namalan kami masasangkapia apia ringanni Tou.

⁶Ana waugu amungkangu i ite buatte naaukka ringanni Kristus Yesus, su ola'u tumuṛṛutta ara'e maddiri tumuṛṛutta atorannu sunatta tate maola'a sambau hatto lai. Lembon apianne tumba'u mangngimanna si Kristus, wuṛṛu udde nilumiatta'a sulal᷊ummu darangngun kite su taumata waine.

⁷Dorone i yamiu mammanara ringannu mapia! Orassa indi anio i yamiu maddirite tumuṛṛutta apia apulun Duata? Isai buatte nassal᷊o'i yamiu?

⁸Natantuna iapa ma'ola'a udde wal᷊inewe Ruata apan suete namaggo si yamiu!

⁹“Ragi addio'a sarun mapaatuwon anambon taponna niluakka,” unnu taumata.

¹⁰Salaiwe aroddi ya'u ta'e mangngimanna manungku ṛingiṛṛanni yamiu tawe nawal᷊u, ana waugu i ite suete naaukka ringanni Kristus. Wuṛṛu i ya'u mangngimanna manungku isai-sai apan mangngal᷊iwun ṛingiṛṛannu, sarun iṛṛuumannu Ruata.

¹¹Matataṛṛino si ya'u, manga tuṛṛangnga, anio i ya'u mangke ipasseetta amungkangu i ya'u ta'e mammasingkata manungku sunatta udde ta'e wotongnge? Amungkangngu atonna i ya'u ta'e mammasingkata aroddi, ne bawal᷊o'u su ola'u arussan Kristus tawe maaola'a patatiakka.

¹²Lembon apianne manga taumata apan mangngal᷊iwun ṛingiṛṛannu udde mappianne lapiddu sumabbanga wuassu jamaatta!

¹³I yamiu suete niwagoanna maola'a taumata apan napallose. Arawe arie mappaattu apapallosi yamiu udde sidutu ma'ola'a apulun naungngi yamiu sassane. Arawe ṛinone i yamiu sidutu uaa'akkana wuṛṛu sidutu uaa'imbe.

¹⁴Anambon titan agama naammulle sulal᷊ummu parenta sambau indi, “Ṛinone i yamiu uararangngu su sansul᷊ungngu taumata ere lai yamiu mandangngu wadangngu sassane.”

¹⁵Arawe amungkangu i yamiu mangke uaaṛṛautta, paatemhamma, panginsueanne i yamiu maṛṛimunsa'a suaddio'a.

¹⁶Pandumangku arendi: Wala'e Ghaṛṛahon Duata mangehetta si yamiu wuṛṛu ariewe mabbiakka tumuṛṛutta apulun pallal᷊agun taumata.

¹⁷Ana waugu apulun taumata uatataaen apulun Ghaṛṛahon Ruata, wuṛṛu apulun Ghaṛṛahon Ruata uatataaen apulun taumata. Itarua mangke tawe massomba, na'oman sara i yamiu tawe maaola'a apa apan ipaapulun kamiu.

¹⁸Arawe amungkangu Ghaṛṛahon Duata mangngehetta si yamiu, ne i yamiu tawe paparentannu titan agama.

¹⁹Apulun pallal᷊agun taumata nilumiatta'a sulal᷊ummu manga inolaanna apan lal᷊eo, nallal᷊uhuranna, wuṛṛu tawe su ṛinone;

²⁰sulal᷊ummu pasasubba monganna, wuṛṛu wakin mata; sulal᷊ummu pasaseetta, uawawul᷊o, mallu'adda awingnge, mal᷊ihakka masa'u, wuṛṛu tumba'u maṛṛingiddu watanganne sassane; patatal᷊ei wuṛṛu uasasamba'a,

²¹mangngune, mabbu'anna, taṛṛa ramea wuṛṛu al᷊awo'u inolaanna waine. Sulal᷊ummu sarangkanambone udde i ya'u mapaanaungnga si yamiu orassa indi, su ereapa lai ya'u napaananungnga si yamiu rorone, manungku manga taumata apan ma'ola'a inolaanna ereudde tawe maola'a al᷊aṛṛana'u Ruata.

²²Arawe, amungkangu manga taumata aehetannu Ghaṛṛahon Duata hessine eteudde: I mangitou uararangngu, i mangitou lulluassa, i mangitou pia atatammudu naungnga, i mangitou masabare wuṛṛu mapia su saruannu taumata waine, i mangitou matuṛṛuta,

²³i mangitou masaṛṛionto'a, wuṛṛu wotongnge maataṛṛangnga apulun naungnga. Tawe titan agama apan manningaddu manga inolaanna ereudde.

²⁴Manga taumata apan naola'e pussa'an Kristus Yesus, manga taumata udde buatte nanantangngu pallal᷊agun taumata ringannu al᷊awo'u apulu naungnge wuṛṛu pallal᷊agune.

²⁵Ghaṛṛahon Duata buatte nangonggola si ite wiakka apan wakku; ana waugu udde ete i Tou lai ṛinone mangatokku wiakki ite.

²⁶I ite tawe wotongnge mattingkawunga, wuṛṛu maddal᷊al᷊eo naungnga, wuṛṛu uaa'une sangkatou ringannu waine.