Read Talaud GALATIA 6 Bible Online

GALATIA 6 - Talaud bible

GALATIA 6

¹Manga tuṛṛangnga! Amungkangngu sangkatou niaratinganna ma'ola'a rosa, ṛinone i yamiu mabbiakka tuttuṛṛuta Ghaṛṛahon Duata, mangehetta taumata udde mabbelengnga su lal᷊anna apan naṛṛino. Arawe i yamiu ṛinone ma'ola'a udde ringannu masaṛṛionto'a wuṛṛu paariagai arie ma'oman sara i yamiu sassane lai awono'anna.

²Ṛinone i yamiu uatatul᷊ungnga uapasanna winabbawan taumata waine tadea'u ringannu aroddi yamiu tuttuṛṛuta parentan Kristus.

³Amungkangu sangkatou massunna watanganne mappianna, wutte'e tawe, taumata udde nangawusu watanganne sassane.

⁴Suapan taumata, ṛinone mamarikissa sassane apa pallal᷊agune mapia ara'e lal᷊eo. Amungkangu mapia, i tou wotongnge mamarabungan inolaanne udde. Arawe arie i tou manumandingi tou ringannu apa apan a'olaannu taumata waine.

⁵Ana waugu sangkatou-sangkatou ṛinone mamasanna winabbawane sassane.

⁶Taumata apan mannengkama al᷊aṛṛa'i Kristus, ṛinone mattahia ringannu hurune anambon apa apan mapia apan tatahuannanni tou.

⁷Arie awahianna. Ruata tawe ianalangnga! Apa apan isuanna eteudde lai apan itinganna.

⁸Amungkangu taumata massuanna tumuṛṛuttu pallal᷊agun taumata, i tou sarun mangitingnga apapate wuassu pallal᷊agune udde. Arawe amungkangu i tou massuanna tumuṛṛuttu piaṛṛa'u Ghaṛṛahon Duata, i tou sarun mangitingnga wiakka tutune wuṛṛu mal᷊annu-l᷊annu wuassu Ghaṛṛahon Duata.

⁹Ana waugu udde arie i ite mawusa ma'ola'a manga inolaanna mapia; ana waugu amungkangu i ite tawe illol᷊one mammanara manara udde su paassa i ite sarun mangitingnga wuane.

¹⁰Nariaddi, tantal᷊anna ta'e pia tempo si ite, ṛinone i ite ma'ola'a apapia su anambon taumata, nipangillembo su manga tuṛṛangngi ite apan sulal᷊ummu pangangimanna sambau.

¹¹Paatutuṛṛe paapia-pia wageangnge indi apan ta'u niwoṛṛeta sassane ringannu woṛṛetta apan wahahewalla.

¹²Manga taumata apan maapulu mapaatolon batanganne ringannu inolaannu runia, ete i mangitou apan mappandumma mamata'i yamiu tumuṛṛutta atorannu sunatta. Arawe i mangitou na'ola'a udde tumba'u tadea'u i mangitou tawe sansarannu taumatan Yahudi ana waugu arussa Mawu Yesus.

¹³Manga taumata apan tuttuṛṛuta atorannu sunatta lai tawe tumuṛṛutta titan agama. Arawe i mangitou maapulu i yamiu sunatanna, tadea'u i mangitou wotongnge lumuassa manungku i yamiu tinumuṛṛuta atoranna udde.

¹⁴Arawe i ya'u atonna-tonna maddiri lumuassu al᷊awo'u apa, tumba'u su Mawun kite Yesus Kristus apan nate niarussa. Wuṛṛu ana waugu i Tou suete nate niarussa, ne runia tate mangal᷊ene lai si ya'u, wuṛṛu ana waugu runia indi, pendamangku i ya'u lai ere natete.

¹⁵Nisunatta ara'e tawe nisunatta udde tawe maola'a hatto. Apianne eteudde maola'a taumata wakku.

¹⁶Su taumata apan mabbiakka ringannu ṛingidda udde, aroddi lai su anambon al᷊aṛṛana'u Ruata, i ya'u mangngantima Ruata sarun mangonggolu paddarame wuṛṛu al᷊aman-Ne.

¹⁷Wua'udde, arie pia sangkatou lai mapaasusa'u lai, ana waugu su wadangku pia manga tatiala manungku i ya'u mallal᷊aṛṛenggennu Mawu Yesus.

¹⁸Doronganna Mawun kite Yesus Kristus sidutu mangal᷊amatta manga tuṛṛangnga. Amin. Tabea wuassi yami, Paulus