Read Talaud EFESUS 3 Bible Online

EFESUS 3 - Talaud bible

EFESUS 3

¹Ana waugu udde i ya'u Paulus, nitaṛṛo su tuttupanna ana waugu Kristus Yesus maola'a hunan kamiu taumata wal᷊ine Yahudi.

²Asinungka i yamiu buatte naaringikka manungku Ruata, ana waugu apapia naung-Nge, i Tou suete nangonggola si ya'u manara indi hunane si yamiu.

³Ruata namasingkattu addapingngu manara-Ne wuṛṛu nabal᷊o si ya'u. (Su olangnge indi suete ta'u niwoṛṛeta al᷊iu rosone ringannu maautta,

⁴wuṛṛu amungkangu i yamiu mabbasa, i yamiu sarun maasunna addapingi Kristus ere lai ya'u maasunna.)

⁵Dorone addapingnge udde tawe niapaasingkatta su taumata, arawe orassa indi Ghaṛṛahon Duata suete namasingkata su manga rasul wuṛṛu nabi-Ne.

⁶Addapingnga udde ete indi: Sulal᷊ummu Watti'u Al᷊al᷊uassa udde, taumata wal᷊ine Yahudi, maapendamma lai manga al᷊amattu Ruata apan dorone nissaddia tumba'u su taumatan Yahudi. Manga taumata wal᷊ine Yahudi naola'e wageangngu wadangnga sambau, wuṛṛu manengkamma lai suadio'a apa apan suete pina'ire Ruata sulal᷊ummi Kristus Yesus.

⁷Ruata nangonggulu al᷊amatta si ya'u — eteudde manara — mammasingkatu Watti'u Al᷊al᷊uassa udde. I ya'u nanengkamma manara udde wuassu taṛṛinon Duata apan mammanara sulal᷊ummu naungku.

⁸Su wallatu anambon al᷊aṛṛana'u Ruata, ete i ya'u aral᷊eoanne. Arawe Ruata nangonggolu al᷊amatta indi si ya'u: Manara mammasingkatu Watti'u Al᷊al᷊uassa su taumata wal᷊ine Yahudi su ola'u paa'alan Kristus apan tawe masue;

⁹wuṛṛu lai tadea'u wuassia'u anambon taumata maasingkata ereapa Ruata, Mandariaddi ul᷊ilin pati'uppa indi, napaamattu manara-Ne ro'en dorone apan iaddappingnga su runia.

¹⁰Pandumannu Ruata eteudde, tadea'u orassa indi, wuassu jamaatta sarangkanambone apan uaagassa taṛṛino su winalanganna masingkatu apanden Duata su al᷊awo'u inolaanne.

¹¹Ruata na'ola'a udde wuassu manara-Ne apan tawe panginsueanne, apan niolang-Nge sulal᷊ummi Kristus Yesus Mawun kite.

¹²Ringannu mangngimanna si Kristus wuṛṛu ana waugu uaaukka ringanni Tou, i ite niwala wotongnge mangundanin Duata ringannu napenen pangangimanna.

¹³Ana waugu udde darorongku eteudde: arie paasinggawangnga su ola'u asasusa'u indi ana waugu i yamiu, ana waugu sarangkanambone udde hunan apapianu.

¹⁴Ana waugu udde i ya'u niumal᷊intudda su saruannu Iamangnga.

¹⁵Ete wuassi Tou suapan amonanna su surga wuṛṛu su runia menengkamma pallal᷊agu-Ne apan apianne.

¹⁶I ya'u u'al᷊iomanna doronganna Ruata apan mawantuga maapulu manohassa naungngu ringannu Ghaṛṛaho-Ne.

¹⁷Doronganna ana waugu i yamiu mangngimanna si Kristus, Kristus matana'a sulal᷊ummu naungngu, wuṛṛu wiakku niwantanna wuṛṛu niparentannu darangngu.

¹⁸I ya'u u'al᷊iomanna doronganna suadio'a ringannu anambon walahannu Ruata, i yamiu wotongnge maasunna aroddi ahewalle wuṛṛu al᷊o'engnge wuṛṛu atanggakke wuṛṛu al᷊al᷊umme darangngun Kristus,

¹⁹apan ringannu ṛingiṛṛannu taumata tawe iasunna saran kadio'a. Doronganna i yamiu maaillal᷊a darangngun Kristus udde, na'oman sara i yamiu mapenen apulun Duata apan nasuungnga.

²⁰Ringannu taṛṛinon Duata apan maṛṛimadda mammanara sulal᷊ummu naungngi ite, Ruata wotongnge ma'ola'a mannamboanne wuassu apa apan wotongnge doronganni ite ara'e iraṛṛingiddi ite.

²¹Ṛinone Ruata wantuhanna sara maṛṛawa mappulunna sulal᷊ummu jamaatta, wuassi Kristus Yesus. Daralo su Ruata saran mal᷊annu-l᷊annu! Amin.