Read Talaud FILIPI 1 Bible Online

FILIPI 1 - Talaud bible

FILIPI 1

¹Manga tuṛṛangnga al᷊aṛṛana'u Ruata sarangkanambone apan uatana'a su Filipi, wuṛṛu apan uaaukke ringanni Kristus Yesus. Wuṛṛu manga tuṛṛangnga piaṛṛangnge see lai matatul᷊ungngu jamaatta! I ya'u, Paulus, suadio'a ringanni Timotius, manga allangngi Kristus Yesus,

²mangantimma doronganna Ruata Iamangngi ite wuṛṛu Mawu Yesus Kristus mangonggolu al᷊amatta wuṛṛu paddarame si yamiu.

³Suapawe i ya'u maanaungnga si yamiu, i ya'u maadiangkamanna su Ruata.

⁴Wuṛṛu suapan i ya'u umal᷊iomanni yamiu sarangkanambone, i ya'u u'al᷊iomanna ringannu naungnga mal᷊uassa.

⁵I ya'u maadiangkamanna su Ruata ana waugu ro'en paarorone na'oman sara orassa indi, yamiu suete nallal᷊ima si ya'u mamasingkatu Watti'u Al᷊al᷊uassa wuassu Ruata.

⁶Ruata sassane apan nanattakku manara apan mapia udde si yamiu, wuṛṛu i ya'u mangantimma i Tou sarun manassu manara udde ma'oman sara masue su allo Kristus Yesus rumanta apia.

⁷Atonna su tampane i ya'u pia apendamma ereudde su saruanni yamiu, ana waugu i yamiu sarangkanambone sidutu marani su naungku. Ana waugu i yamiu lai suadio'a ringangku, nanengkamma al᷊amatta apan nionggolu Ruata si ya'u: mapia orassa indi tantal᷊anna i ya'u sulal᷊ummu tuttupanna ara'e lai su tempo i ya'u su liudde ana waugu mangngesakku Watti'u Al᷊al᷊uassa udde.

⁸Ruata masingkatta manungku i ya'u atonna-tonna luṛṛintulun kamiu ringannu apendamu darangngu wuassi Kristus Yesus sassane.

⁹Ete indi aal᷊iomangku si yamiu: doronganna i yamiu lembon mandangngu Ruata wuṛṛu sansul᷊ungngu taumata wuṛṛu sidutu aatambanna sulal᷊ummu asingkatta apan ṛinone wuṛṛu ṛingiranna apan pande.

¹⁰Ringannu aroddi yamiu masingkatta mamile apa apan apianne, wuṛṛu wiakku na'ukkassa wuassu angngo ara'e al᷊awo'u aansilla su allo Kristus rumanta apia.

¹¹Wiakku sarun lumambalanna ringannu pallal᷊agu apan atonna-tonna mapia apan darantane tumba'u wuassi Yesus Kristus sassane; ne Ruata sarun wantuhanna wuṛṛu raloanna.

¹²I ya'u maapulu i yamiu maasingkata, manungku manga inolaanna apan suete nariaddi si ya'u, ewe'e naaola'a manambo taumata maddaringikka wuṛṛu mangngimanna Watti'u Al᷊al᷊uassa udde.

¹³Pangillul᷊eanne, anambon mandariagga wal᷊en araratuanna wuṛṛu manga taumata su soa indi masingkata manungku i ya'u niṛṛuumanna ana waugu i ya'u mabbatti'i Kristus.

¹⁴Wuṛṛu i ya'u niṛṛuumanna indi naatamba manga taumatan Saṛṛani su soa indi lembon mangngimanna lai Mawu, na'oman sara i mangitou lembon waṛṛani lai mamasingkatu tanatan Duata ringannu tawe matta'utta.

¹⁵Atonna pia sire pira wuassu wallatti mangitou apan mabbatti'i Kristus ana waugu naungnge lal᷊eo wuṛṛu maapulu mattatiakka, arawe waine mabbatti'i Kristus ana waugu pia pandumma apan mapia.

¹⁶Manga taumata indi na'ola'a aroddi ana waugu i mangitou mandangngu Ruata wuṛṛu si ya'u, ana waugu i mangitou masingkata manungku Ruata suete napamanara'u mapaal᷊iatta'a manungku Watti'u Al᷊al᷊uassa udde atonna.

¹⁷Arawe taumata waine mabatti'i Kristus ringannu pandumma lal᷊eo; i mangitou mabatti'a hunane su wadangi mangitou sassane. Ringannu udde i mangitou mangngantima wotongnge mapaasusa'u sulal᷊ummu ṛuumanna.

¹⁸Arawe tawe apane! Ana waugu salaiwe ereapa, mawae udde a'olaanna ringannu pandumma apan mapia ara'e ringannu pandumma apan nassal᷊a, ne Kristus mangke iwabbatti'a lai; nariaddi ya'u lulluassa. Wuṛṛu i ya'u sidutu uapendamma aroddi,

¹⁹ana waugu i ya'u masingkata manungku ringannu manga aal᷊iomannu udde wuṛṛu ringannu sasumbala Ghaṛṛahon Yesus Kristus, i ya'u sarun ipallosa.

²⁰Lembon ipaapulu'u wuṛṛu aantimanna eteudde tadea'u imbaṛṛangnga i ya'u tawe maa'sue manara'u. Arawe i ya'u mangantimma tadea'u suapan tempo, nangillembo orassa indi, ya'u wotongnge maola'a waṛṛani ma'oman sara ringannu ahewallu apulun waddangku — mawae i ya'u wiakka ara'e i ya'u nate — Kristus mangke wabantuhanna.

²¹Ana waugu matataṛṛino si ya'u, tuddan wia'u tumba'u si Kristus Wuṛṛu mate udde auntunganna.

²²Arawe amungkangu ringannu mabbiakka su runia indi, ya'u wotongnge ma'ola'a manara lembon pia gunane, ne i ya'u wagga suapa apan sarun ta'u pileanna.

²³I ya'u wabollenganna wuassu ruan ba'a. I ya'u maapulu atonna manantangngu runia indi see inai matana'a ringanni Kristus, ana waugu eteudde lembon apianne;

²⁴arawe ana waugu hunane su waddangu udde, mappianne amungkangu i ya'u sidutu uatana'a su runia.

²⁵I ya'u mangngimanna su olangnge udde. Ana waugu udde i ya'u masingkata, i ya'u sidutu uatana'a ringanni yamiu sarangkanambone, tadea'u wotongnge mantul᷊ungngi yamiu maola'a lembon matohassa wuṛṛu lembon mal᷊uassa sulal᷊ummu pangangimanna su Mawu.

²⁶Ana waugu udde, amungkangu i ya'u mabelengnga apia ringanni yamiu, i yamiu apan suete naaukka ringanni Kristus Yesus sarun maatahuanna lembon manambo lai pangiananne su ipalluassu riri'u.

²⁷Ne, apianne orassa indi eteudde manungku i yamiu mabbiakka mapia ere su ipaapulun Watti'u Al᷊al᷊uassa su ola'i Kristus udde. Ringannu aroddi tanne i ya'u wotongnge mappassomban kamiu ara'e tate, i ya'u sarun maaringikka manungku i yamiu siddutu uaaukka wuṛṛu mammanara suaddio'a tumba'u sambau pandumma wuṛṛu sambau apulu; eteudde hunan pangangimanna apan uasul᷊ungngu Watti'u Al᷊al᷊uassa wuassu Ruata udde.

²⁸Ṛinone i yamiu siddutu waṛṛani; arie matta'uttu manga seennu. Ringannu aroddi yamiu mapaal᷊iatta'a manungku i mangitou sarun maruggi, wuṛṛu i yamiu sarun maauntunga, ana waugu Ruata sassane apan mangonggolu auntunganna si yamiu.

²⁹Ana waugu Ruata suete nangonggolu al᷊amatta si yamiu, wal᷊ine tumba'u ipangimanna si Kristus, arawe lai matataṛṛangnga asasusa ana waugu Kristus.

³⁰Orassa indi yamiu suaddio'a ringangku sulal᷊ummu manara apan uasul᷊ungnga; eteudde apan suete niasiloanni yamiu, mammanarangku rorone, wuṛṛu apan ta'e mammanarangku sara orassa indi, ere lai suete niaringiṛṛani yamiu su orassa indi.