Read Talaud FILIPI 3 Bible Online

FILIPI 3 - Talaud bible

FILIPI 3

¹Panginsueanne, manga tuṛṛangku, ṛinone i yamiu lumuassa ana waugu i yamiu suete naaukka ringannu Mawu. I ya'u tawe maapendamma masahadda manul᷊e apia apa apan suete niwoṛṛeta si yamiu paarorone; ana waugu olangnge udde mapia su asasal᷊amannu.

²Paatehamma su saruannu manga taumata apan ma'ola'a inolaanna lal᷊eo, manga taumata apan wotongnge isaggo ‘asu’. I mangitou mammata'a tadea'u manga taumata udde iapa sunatta.

³Sumbal᷊i ete i ite manga taumata apan suete nanarimmattu sunatta apan tutune, wal᷊inewe i mangitou. I ite massubba Ruata ringannu aehettu Ghaṛṛahon Duata sassane, wuṛṛu i ite maadiangkamanna ana waugu i ite mabbiakka su sambau ringanni Kristus Yesus. I ite tawe uatundeeta su manga inolaanna apan a'olaannu taumata.

⁴Su ṛinone i ya'u wotongnge tumundeeta su manga inolaannu taumata udde. Ana waugu amungkangu pia sangkatou apan uapendamma i tou pia pangianannu antimma su inolaannu taumata su runia indi, ya'u nangillembo lai.

⁵I ya'u nissunatta su tempo uukka ual᷊u allo. I ya'u niasungkangnga ere sangkatou Israel, wuassu ruanganni Benyamin; i ya'u taumatan Ibrani tutune. Sulal᷊ummu tatuṛṛuta su manga titan agaman Yahudi, ya'u nasutta su reengannu taumatan Farisi.

⁶I ya'u lembon mammanara maṛṛimada na'oman sara i ya'u mammate jamaatta. Amungkangu ellehanna wuassu titan agaman Yahudi, ya'u sangkatou taumata mapia apan tawe sal᷊ane.

⁷Arawe ana waugu Kristus, ne sarangkanambone apan dorone sassunnangku sambau auntunganna, orassa indi naola'a sambau apan maarugi.

⁸Wal᷊ine tumba'u manga inolaanna udde; arawe lai al᷊awo'u inolaanna apan sassunnangku ere manga inolaanna tumba'u maaruggi. Apan tatahuanangku orassa udde lembon maaregganne; eteudde maaillal᷊a si Kristus Yesus Mawu'u. Ana waugu Kristus, ne i ya'u suete namallosu manga al᷊awo'a. Aellehangku sarangkanambone udde ere sapadda, tadea'u i ya'u wotongnge maasomba si Kristus,

⁹wuṛṛu atonna-tonna uaaukka ringanni Tou. Pasasambau apan mapia ringannu Ruata tate ta'u manaranna sassane, ringannu tuttuṛṛuta titan agama. Orassa indi ya'u pia paa'aukka apan mapia ringannu Ruata, ana waugu i ya'u mangngimanna si Kristus. Nariaddi, paa'aukka apan mapia udde darantane wuassu Ruata, wuṛṛu pinangiannne ana waugu mangngimanna si Yesus Kristus.

¹⁰Tumba'u sambau apan ipaapulu'u eteudde tadea'u i ya'u maaillal᷊a si Kristus, wuṛṛu maapendamma taṛṛino apan napaawiakki Tou wuassu papate. I ya'u maapulu matataṛṛanga suaddio'a ringanni Tou wuṛṛu maola'a uasul᷊ungnga ere i Tou su ola'u papate-Ne.

¹¹Wuṛṛu i ya'u mangantimma manungku i ya'u sassane sarun iapaawiakka apia wuassu papate.

¹²I ya'u tawe mabbisara manungku i ya'u naasombate auntunganna, ara'e nasuungke. Arawe i ya'u sidutu maddea'a maapangaṛṛo aonggola apan suete nissaddian Kristus Yesus. Ana waugu udde i Tou suete nangaṛṛo si ya'u, wuṛṛu niola'a pussa'a-Ne.

¹³Natantuna, manga tuṛṛangnga, atonna i ya'u tawe naapendamma manungku i ya'u suete naapangaṛṛo aonggola udde. Arawe pia sambau apan ta'u olaanna, eteudde timbul᷊ianante apa apan su liu'u wuṛṛu mangke mattinsahadde tadea'u maasomba apa su saruangku.

¹⁴Ana waugu udde i ya'u sidutu tuttal᷊angnga mattuddan tampa panguddusanne ana see maasomba auntunganna, eteudde mabbiakka su surga; ana waugu udde Ruata namaggo si ite sulal᷊ummi Kristus Yesus.

¹⁵I ite sarangkanambone apan timmaddete su pangangimanna, ṛinone mabbiakka aroddi. Arawe amungkangu su wallatti yamiu pia ṛingiranna waine, ne Ruata sarun manal᷊a'a lai si yamiu.

¹⁶Arawe olangnge udde ṛinone inunuannu: I ite ṛinone uatana'a mabbiakka tumuṛṛutta atoranna apan suete niola'i ite na'oman sara orassa indi.

¹⁷Manga tuṛṛangnga sarangkanambone! Pattannote tul᷊ada'u. I yami suete nangonggolu tul᷊ada apan naṛṛino, ana waugu udde paatutuṛṛe paapia-pia manga taumata apan mattanno tul᷊adan kami udde.

¹⁸I ya'u masokkate mamasingkata si yamiu, wuṛṛu orassa indi ta'u isul᷊e apia ringannu lulluai, manungku pia manambo taumata apan mabbiakka mangngal᷊iwun atappasannu papaten Kristus su alu arussa.

¹⁹Wiakku manga taumata ereudde panginsueanne papate, ana waugu mawu mangitou eteudde apulun wadangngi mangitou sassane. Manga inolaanna apan maasili, eteudde ipammunga mangitou; ana waugu i mangitou tumba'u maṛṛingiddu manga inolaanna apan ipaapulun dunia indi.

²⁰Arawe ete i ite tumana'u araratuannu surga. Ete wua isudde Ratun Punnu Sal᷊amatti ite, Mawu Yesus Kristus, sarun rumanta. Ete i Tou apan mangke raṛṛadoanni ite.

²¹Wadangngi ite apan lome wuṛṛu wotongnge maṛṛenessa indi, sarun wal᷊uanni Kristus maola'a ere wadang-Nge sassane apan mawantuga. I Tou wotongnge ma'ola'a udde ana waugu I Tou uatahuanna taṛṛino mapassuṛṛubawan sarangkanambone.