Read Talaud KOLOSE 4 Bible Online

KOLOSE 4 - Talaud bible

KOLOSE 4

¹Manga tuṛṛangnga apan naola'a tuangnga! Ṛinone i yamiu ma'ola'a manga allangngu ringannu apapia wuṛṛu atatul᷊idda. Paanaunge manungku i yamiu pia sangkatou tuangnga su surga.

²Ṛinone i yamiu umal᷊iomanna ringannu ma'uddupa wuṛṛu maantaga, lapiddu maadiangkamanna su Ruata.

³I yami lai aal᷊iomana'a tadea'u Ruata mangoggolu allo mapia si yami manal᷊iawukku watti'a su ola'a addapingingi Kristus. Ana waugu olangnge udde ne i ya'u orassa indi uatana'a sulal᷊ummu tuttupanna.

⁴Aal᷊iomante tadea'u i ya'u wotongnge manal᷊a'an addapingnga udde ringannu masema-semakka, su ereapa pandumanne.

⁵Sulal᷊ummu paa'aukki yamiu ringannu manga taumata apan tawe mangngimanna, ṛinone i yamiu mabbiakka su atatul᷊idda wuṛṛu mappa'attu al᷊awo'u tempo mapia udde, ringannu mapia-pia.

⁶Ṛinone manga inolaanna apan iwabbisaran kamiu sidutu maal᷊uassa wuṛṛu apangimananna. Ṛinone i yamiu maasingkata ereapa ṛinone i yamiu sumimbakka manga aiwal᷊on taumata.

⁷Tikhikus, tuṛṛangngi ite apan arangnguanna, sarun mamasingkata si yamiu su ola'a alawo'u inolaangku. I tou matammuda mammanara ringanni yami hunan Mawu.

⁸I ya'u nandolokki tou ringanni yamiu pandumanne tadea'u i yamiu maasingkata ola'i ami wuṛṛu i yamiu iapaal᷊uassa.

⁹Onesimus sarun inai su sampunna ringanni Tikhikus; i tou sangkatou wuassu walahannu. I tou taumata matuṛṛute, wuṛṛu i yami marangngu si tou. I tou wuṛṛu Tikhikus sarun mamasingkata si yamiu alawo'u apa apan nariaddi su tampa'u indi.

¹⁰Aristarkus, apan sulal᷊ummu tuttupanna suadio'a ringangku, nandohon tabea si yamiu. Aroddi lai Markus, tuṛṛangi Barnabas. (I yamiu suete nirohoannu watti'a ipanansomakka si tou amungkangu i tou rumanta ringanni yamiu.)

¹¹Tabea lai wuassi Yesus apan aranne lai isassago Yustus. Wuassu manga taumatan Yahudi apan nangimante Mawu Yesus, tumba'u i mangitoun tallu apan orassa indi mammanara suadio'a ringangku mappaamattu manaran Duata. I mangitou atonna-tonna mantul᷊ungku.

¹²Tabea wuassi Epafras. I tou lai wuassu walahannu. I tou allangngi Kristus Yesus, apan sidutu u'al᷊iomanni yamiu ringannu maṛṛimadda. I tou sussal᷊ande Ruata tadea'u pangangimannu mabal᷊i matohassa wuṛṛu i yamiu atonna-tonna natimmaddete, tadea'u i yamiu lai nasuungnga tuttuṛṛuta apulun Duata.

¹³I tou naasilo sassane manungku i tou suete nammanara maṛṛimada hunane si yamiu wuṛṛu su manga taumata su Laodikia wuṛṛu Hierapolis.

¹⁴Doktere Lukas, apan arangnguanni ite, wuṛṛu Demas nandohon tabea si yamiu.

¹⁵Wal᷊oa'a lai tabea wuassi yami su manga manga tuṛṛangnga Saṛṛani su Laodikia; wuṛṛu lai si Nimfa, wuṛṛu su manga jamaatta apan mattaṛṛamawu su wal᷊ene sambau-sambau.

¹⁶Napawe suratta indi suete niwasan kamiu, suapan botongnge wasa'a lai ringannu jamaatta su Laodikia. Aroddi lai yamiu sassane ṛinone mabbasan suratta apan sarun iroho wuassu Laodikia si yamiu.

¹⁷Wuṛṛu wal᷊oa'a si Arkhipus, “Insuete manara apan nionggolla si'o ipangngimbe Mawu.”

¹⁸Tabea wuassia'u, Paulus. I ya'u sassane apan namoṛṛetu addoanne indi. Arie paabul᷊iane manungku i ya'u ta'e sulal᷊ummu tuttupanna! Doronganna Mawu mangal᷊amatta si yamiu. Tabea wuassi yami, Paulus