Read Talaud 1 TESALONIKA 5 Bible Online

1 TESALONIKA 5 - Talaud bible

1 TESALONIKA 5

¹Manga tuṛṛangnga, i yami salaiwe lasa'e mamoṛṛettu suratta si yamiu angngerate tempone apan na'etta'a, manga olangnge udde sarun mariaddi.

²Ana waugu i yamiu sassane masingkatta ringannu masemakka manungku allon darantan Mawu udde sarun rumanta ere taṛṛa ta'o su tempo ṛabbi.

³Amungkangu taumata mabbisara, “Sarangkanambone mal᷊annabba wuṛṛu matammudda,” ne ete su tempo udde inaṛṛombanganne i mangitou sarun aṛṛiaannu papate wuṛṛu tawe saran sangkatou apan wotongnge maatal᷊angnga. Olangnge udde sarun mariaddi sangkaṛṛondapa, ere taddu'u sangkatou wawine apan sarun mangunsiwe.

⁴Arawe i yamiu wal᷊inewe taumata apan mabbiakka sulal᷊ummu araranduma, na'oman sara allo udde naaṛṛindu'a si yamiu ere darantan sangkatou taṛṛa ta'o.

⁵Tuṛṛanga sarangkanambone eteudde taumata apan mabbiakka sulal᷊ummu asasemakka; i yamiu nasutta su allo apan masemakka. I ite wal᷊ine taumata apan mabbiakka sulal᷊ummu araranduma, ara'e nasutta su ṛabbi apan marandumma.

⁶Ana waugu udde imbaṛṛangnga i ite tumba'u mattiilla ere taumata waine. I ite ṛinone uariagga wuṛṛu ṛingiṛṛanni ite ṛinone masemakka.

⁷Su tempo ṛabbi taumata mattiilla, wuṛṛu su tempo ṛabbi lai taumata mabbal᷊i wu'anna.

⁸Arawe i ite indi manga taumata apan nasutta su allo apan masemakka; ana waugu ṛingiṛṛanni ite ṛinone masemakka. I ite ṛinone sidutu mangngimanna Mawu wuṛṛu mandangngu manga taumata waine wuṛṛu mangngantimma ringannu atonna manungku Ruata sarun manal᷊amatta si ite. Eteudde ahidda apan ual᷊indumma si ite sulal᷊ummu manara lumawangnga araranduma.

⁹Ruata namile si ite wal᷊ine iṛṛuumanna, arawe tadea'u maasomba asasal᷊amatta wuassu Mawun kite Yesus Kristus.

¹⁰I Tou nate hunan kite, tadea'u su tempo i Tou rumanta apia — tanne i ite ta'e wiakka, ara'e natete — i ite wotongnge mabbiakka su sambau ringanni Tou.

¹¹Ana waugu udde ṛinone i yamiu sidutu uasasasa wuṛṛu uatatohassa ere lai a'olaanni yamiu orassa indi.

¹²Manga tuṛṛangnga, i yami sumal᷊ande tadea'u i yamiu mangaddata taumata apan mammanara su pattangngani yamiu; eteudde i mangitou apan suete nipilen Mawu mamiaṛṛa'a wuṛṛu manantiro si yamiu.

¹³Pangaddatta si mangitou ringannu mapia-pia wuṛṛu ringannu paddararangngu ana waugu ipannaungnga apa apan suete niola'i mangitou. Pabbiakke sidutu ringannu paddarame.

¹⁴I yami maddoronga lai, manga tuṛṛangnga, taggue ringannu paddarame taumata apan maddiri mammanara; tohassa naungngu taumata apan matta'utta; tul᷊unga'a taumata apan wotongnge iatul᷊unga, wuṛṛu paasabare su saruannu awadaalla.

¹⁵Paariagai tadea'u arie pia taumata apan mabal᷊issu al᷊al᷊eo ringannu al᷊al᷊eo. Paddea'e sidutu ringannu ma'ola'a apapia, sangkatou ringannu waine wuṛṛu su anambon taumata.

¹⁶Ṛinone i yamiu sidutu lulluassa,

¹⁷wuṛṛu sidutu u'al᷊iomanna.

¹⁸Sulal᷊ummu alawo'u inolaanna ṛinone i yamiu maadiangkamanna, ana waugu eteudde ipaapulun Duata wuassi yamiu taumata apan mabbiakka uaaukka ringanni Kristus Yesus.

¹⁹Arie manaṛṛangnga Ghaṛṛahon Duata.

²⁰Arie mangaddio'a manga watti'a apan nionggolu Ghaṛṛahon Duata.

²¹Sarangkanambone ṛinone iannamma, wuṛṛu apapia sarun tattuṛṛutanna.

²²Pangindauten al᷊awo'u hatin al᷊al᷊eo.

²³Antimanna Ruata sassane mangonggolu paddarame si ite, ma'ola'a si yamiu taumata apan atonna-tonna mabbiakka hunan Duata sassane. Doronganna Ruata mallu'adda ahewallu wadangngu, mawae ghaṛṛaho, ṛimuudda, wuṛṛu lai wadangngu, ma'oman sara tawe sangkule su tempo Mawun kite Yesus Kristus rumanta apia.

²⁴Ruata, apan suete namaggo si yamiu, sarun ma'ola'a olangnge udde ana waugu i Tou tawe maabbul᷊i.

²⁵Al᷊iomana'a i yami, manga tuṛṛangnga!

²⁶Paa'addate sarangkanambone ringannu aakkannu pasasangkatuṛṛangannu taumatan Saṛṛani.

²⁷Sulal᷊ummu taṛṛinon Mawu, i ya'u sumal᷊ande tadea'u i yamiu mabbasan suratta indi su anambon tuṛṛanga apan sambau su pangangimanna.

²⁸Antimanna Mawun kite Yesus Kristus mangal᷊amatta si yamiu. Tabea wuassi yami, Paulus