Read Talaud YOSUA 1 Bible Online

YOSUA 1 - Talaud bible

YOSUA 1

¹Napawe i Musa natete, allangngu MAWU udde, MAWU nabbisara su tepelli Musa eteudde Yosua ana'i Nun.

²MAWU nabbisara, “Allang-Ku i Musa natete. Ne orassa indi mappianne i'o wuṛṛu anambon ṛuangannu Israel pandiahite inai tumumbe Sal᷊ukku Yordan, wuṛṛu sumutta su leta'a apan Ta'u ionggola si yamiu.

³I Ya'u buatte nabbal᷊o si Musa manungku suapan letaa buatte niamatanni yamiu buatte Ta'u nionggola si yamiu, si Yosua wuṛṛu anambon al᷊aṛṛana'u.

⁴Leta'a sarun mawannada wuassu wadda'a su timukka ma'oman sara watukku wowonen Libanon su sawannaka wuṛṛu wuassu Sal᷊ukku Efrat apan bahewalla udde masassukka mamal᷊iwutta wanuan balahannu Het ma'oman sara watukku Tahal᷊oangnga Tangngane su waṛṛata.

⁵Tawe saran sangkatou apan botongnge maawaddonu Yosua, su al᷊o'engngu pabbiaṛṛannu. Ana waugu i Ya'u sidutu su sandiṛṛannu ere lai dorone su sandiṛṛanni Musa. I Ya'u tawe manantangu.

⁶Ṛinone i'o mangimanna wuṛṛu waṛṛani, ana waugu i'o sarun mamiaṛṛa'u walahanna indi ana waugu i mangitou matana'a su wanua apan Ta'u pina'ire su iupungu al᷊amona mangitou.

⁷Tumba'u ṛinone i'o atonna-tonna mangimanna wuṛṛu waṛṛani. I'o ṛinone uanaungnga tadea'u i'o tuttuṛṛuta anambon tita apan nionggoli Musa allang-Ku udde si'o, imbaṛṛangnga abul᷊ianannanu ne i'o sarun ma'aola'a sarangkanambone.

⁸Wuken tita udde ṛinone masokka iwasanu su al᷊aṛṛana'-U. Wasa'e wuke udde allo wuṛṛu ṛabbi, tadea'u i'o sidutu tuttuṛṛuta manga tita apan uawoṛṛetta sul᷊alumme. Amungkangu i'o tuttuṛṛuta sarangkanambone udde, ne wiakku sarun mal᷊uassa wuṛṛu maaola'a sarangkanambone.

⁹Naunge, i Ya'u buatte namarenta si'o tadea'u i'o atonna-tonna mangimanna wuṛṛu waṛṛani! Imbaṛṛanga i'o mata'utta ara'e alal᷊eoannu ikkata, ana waugu i Ya'u MAWU Ruatanu uṛundingnna su al᷊awo'u tampa a'amatannu.”

¹⁰Ne i Yosua nandolokku manga piaṛṛa'u ṛuangannu Israel,

¹¹tadea'u mamal᷊iwutta ahewallu paddasanannu ṛuangannu Israel wuṛṛu mangonggolu parenta indi, “Panaddia wal᷊unna, ana waugu ete tallu allo lai yamiu tumumbete Sal᷊ukku Yordan wuṛṛu matana'a su wanua apan nionggolu MAWU Ruatanu si yamiu.”

¹²Tembonannu ṛuanganni Ruben, ṛuanganni Gad, wuṛṛu sambageanganna ṛuanganni Manasye, i Yosua nabbisara,

¹³“Paanaunge! I Musa allangu MAWU udde buatte nabbal᷊o si yamiu manungku leta'a susamba'a da'in Sal᷊ukku Yordan indi nionggolu MAWU Ruatanu si yamiu maola'a wanuanu.

¹⁴Al᷊aranangu, awingngu wuṛṛu winatangngu wotongnge matana'a isindi, arawe manga tantaranu ṛinone uasaddia mapapangalo wuṛṛu malliu ṛoro manga taumatan Israel waine tumumbe Sal᷊ukku Yordan.

¹⁵I yamiu ṛinone mantulungngi mangitou ma'oman sara i mangitou maawanua su leta'a su samba'an waṛṛata Sal᷊ukku Yordan indi apan nionngolu MAWU Ruatanu si mangitou. Napawe MAWU buatte nangonggolu atatammudda su anambon balahannu Israel, wakkute udde i yamiu wotongngete mabelengnga su letangngu sassane su samba'an da'in Yordan indi, apan nionggoli Musa allangu MAWU udde si yamiu.”

¹⁶Ne ṛuanganni Ruben, i Gad, wuṛṛu sambageanganna ṛuanganni Manasye udde sinumimbakka, “Al᷊awo'u apa apan nirolokka si yami, sarun olaanni yami, wuṛṛu su al᷊awo'u tampa yami irolokku yami sarun inai.

¹⁷Yami sarun matuṛṛutta si'o, ere lai yami sidutu tuttuṛṛuta si Musa. Antimanna MAWU Ruatanu maṛundingannu ere i Tou uaṛṛundinganna si Musa!

¹⁸Suapan taumata apan madiri umol᷊obba su taṛṛinonu, ara'e maddiri tumuṛṛuta parentanu, sarun iṛṛuumanna pateanna. Ṛinone i'o mangimanna wuṛṛu waṛṛani!”