Read Talaud YOSUA 12 Bible Online

YOSUA 12 - Talaud bible

YOSUA 12

¹Wageangngu leta'a samba'an da'in Yordan wuassu Wawal᷊annu Sal᷊ukku Arnon masal᷊a suma'a watukku Wawal᷊annu Yordan maddatingngu araune su Wowon Hermon su samba'an sawannaka, buatte niaṛṛo wuṛṛu wawanuanten taumatan Israel. Pia ruan katou ratu apan niawaddon mangitou.

²Iapa sangkatou aranne i Sihon, ratun Amori apan uaparenta su Hesybon. Wageangngu leta'a paparentanne eteudde samba'a wuassu wageangngu leta'u Gilead: eteudde wuassu Aroër (su winggin Bawal᷊annu Arnon) wuṛṛu soa apan su pattangngannu wawal᷊anne udde ma'oman sara araune su Sal᷊ukku Yabok su passarannu wageangngu leta'u walahannu Amon;

³ana see lai naapangana wageangngu Wawal᷊annu Yordan su samba'an da'i, wuassu Ranon Galilea watukku timukka maddatingngu Bet-Yesimot (su samba'an Tahal᷊oanga Nate), masal᷊a watukku wawal᷊annu Wowon Pisga.

⁴Ratu waine apan mawaddon taumatan Israel eteudde i Ratu Og wuassu wanua Basan, apan uatana'a su Asytarot wuṛṛu Edrei. I tou suwallatu sangkatou apan nallambe wuassu walahannu Refaim.

⁵Wageangngu leta'a paparentanne eteudde wuassu Wowon Hermon, Salkha, wuṛṛu ahewallu Basan maddatingngu araune su wageangngu leta'u Gesur wuṛṛu Maakha, wuṛṛu lai naapanganu samba'a wageangngu leta'u Gilead araune maddatingngu wageangngu leta'a paparentanni Ratu Sihon su soan Hesybon.

⁶Eteudde ruan katou ratu apan niawaddon Musa suadio'a ringannu walahannu Israel. Leta'u manga ratu udde nionggoli Musa, allangngu MAWU udde, su ṛuanganni Ruben, i Gad wuṛṛu sambageanganna ṛuanganni Manasye, maola'a leta'a pussa'a mangitou.

⁷Manga ratu apan niawaddon Yosua suadio'a ringannu walahannu Israel eteudde anambon manga ratu su wageangngu leta'a samba'an baṛṛatu Sal᷊ukku Yordan, wuassu Baal-Gad su Wawal᷊annu Libanon masal᷊a watukku Paneneteannu Lol᷊okka su samba'an timukka maranin Edom. Wageangngu leta'a nitahian Yosua su manga ṛuanganna sulal᷊ummu walahannu Israel maola'a leta'a pussa'a mangitou.

⁸Wageangngu leta'a udde eteudde wageangngu panenteanna, wageangngu wawal᷊annu wuidda su samba'an baṛṛatta, Wawal᷊annu Yordan ringannu wageangngu wawal᷊annu wuidda, wageangngu welene su samba'an ra'i, wageangngu wadda'a su samba'a timukka. Manga wageangngu leta'a eteudde wua niatanaannu walahannu Het, Amori, Kanaan, Feris, Hewi wuṛṛu Yebus.

⁹Manga ratu apan niawaddo, sarangkanambone tatallun pul᷊o assa su atoune, eteudde manga ratu wuassu manga soa manansunna indi: Yerikho, Ai (maranin Betel), Yerusalem, Hebron, Yarmut, Lakhis, Eglon, Gezer, Debir, Geder, Horma, Arad, Libna, Adulam, Makeda, Betel, Tapuah, Hefer, Afek, Lasaron, Madon, Hazor, Simron-Meron, Akhsaf, Taanakh, Megido, Kedes, Yokneam (su Karmel), Dor (su apanne), Goyim (su Galilea) wuṛṛu Tirza.