Read Talaud YOSUA 14 Bible Online

YOSUA 14 - Talaud bible

YOSUA 14

¹Manansunna indi eteudde watti'a su ola'u ereapa wanua Kanaan su samba'an baṛṛatu Sal᷊ukku Yordan nitahia su ṛuangannu Israel. Nattahia leta'a udde su ṛuangannu Israel eteudde i Imam Eleazar, i Yosua ana'i Nun, wuṛṛu manga tembonannu amonanna su lal᷊ummu manga ṛuangannu Israel.

²Su ereapa buatte nirolokku MAWU si Musa, manga leta'a su samba'an baṛṛatu Sal᷊ukku Yordan apan tinantunna ionggola su sio mattangnga ṛuangannu walahannu Israel, ṛinone tahianna ringannu lal᷊anne iundi.

³Leta'a su samba'an ra'in Sal᷊ukku Yordan buatte nionggoli Musa su ṛuanganna darua mattangnga waine udde. (Ṛinone iwoṛṛetta isindi manungku papapulunni Yusuf, nattahia su lal᷊ummu ṛuanganna darua: Ṛuanganni Manasye wuṛṛu ṛuanganni Efraim.) Su ola'u ṛuanganni Lewi, tawe leta'a nionggoli Musa si mangitou. I mangitou tumba'u nionggol᷊annu manga soa tampa atatanaanna, ringannu manga wadda'a pabbuwunanna sapi wuṛṛu domba mangitou.

⁵Etearoddi ṛuangannu Israel nattahia leta'a udde ere buatte nirolokku MAWU si Musa.

⁶Su sambau allo manga taumata wuassu ṛuanganni Yehuda nirumanta naisasomban Yosua su Gilgal. Sangkatou su wallati mangitou eteudde i Kaleb ana'i Yefune taumatan Kenas, nabbisara, “Yosua! I'o masingkata apa apan niwal᷊o MAWU si Musa, daroloṛṛannu MAWU Ruata udde,su Kades-Barnea su ola'u i'o wuṛṛu i ya'u.

⁷I ya'u uukke appaten pul᷊o su tonnane su tempo i Musa, allangu MAWU udde, nandolo'u wuassu Kades-Barnea naola'a matataṛṛaso'o wuṛṛu ma'ellega wanua udde. wuṛṛu i ya'u nabelengnga ringanni tou uaapiddu watti'a atonna.

⁸Manga taumata apan uarundinganna si ya'u, naata'utta ṛuangannu Israel. Arawe i ya'u sidutu uatatana'a tuttuṛṛuta MAWU Ruata'u.

⁹Wuṛṛu ana waugu udde, i Musa naddiandi manungku leta'a apan ta'u niamatanna sarun ionggolla si ya'u wuṛṛu al᷊aṛṛana'u maola'a pussa'a kami saran mal᷊annu-l᷊annu.

¹⁰Orasa indi appate pul᷊o lima su tonnane ro'en MAWU nabbisaran olangnge udde si Musa. Udde nariaddi su tempon balahannu Israel namal᷊intaddu su wadda'a. Wuṛṛu ere buatte pina'ire MAWU, MAWU lai buatte nallu'adda si ya'u na'oman sara i ya'u sidutu wiakka nadatingngu orassa indi. Pa'ellega si ya'u uukka orassa indi ual᷊ute pul᷊o lima su tonnane,

¹¹arawe i ya'u ta'e matohassa ere lai su tempo i Musa nandolo'u. I ya'u ta'e matohassa mapapangalo ara'e mammanara al᷊awo'u manara.

¹²Ana waugu udde, onggol᷊a'e orassa indi leta'u panenteanna apan nipa'ire MAWU si ya'u, su tempo i ya'u wuṛṛu manga taumata uaṛundinganna si ya'u nabelengnga uaapiddu watti'a. Su tempo udde i'o sassane naaringikka, manungku poiaroddi pia balahannu wawalla apan isassago walahannu Enak. I mangitou uatana'a su lal᷊ummu manga soa wahewalla apan pia darandunge. Asinungka MAWU nantul᷊ungku na'oman sara i ya'u wotongnge nallimbuakka si mangitou, ere buatte niwal᷊o MAWU.”

¹³Ne i Yosua naddaringikke darorongngi Kaleb ana'i Yefune, ana see i tou nionggol᷊annu soan Hebron maola'a leta'a pusaane.

¹⁴Na'oman sara orassa indi soa udde ta'e naola'a pussa'a papapulunni Kaleb ana'i Yefune, taumatan Kenas, ana waugu i tou satia wuṛṛu matuṛṛuta MAWU, Ruatan Israel.

¹⁵Dorone Hebron isassago soa Arba. (Arba eteudde taumata ahewal᷊anne wuassu walahannu Enak.) Ne wanua udde mal᷊annaba tawe gione ana waugu tate lai pangalo apan mannal᷊awa'a.