Read Talaud YOSUA 15 Bible Online

YOSUA 15 - Talaud bible

YOSUA 15

¹Manga amonanna wuassu ṛuanganni Yehuda nanarimmattu wageangngu leta'a apan passaranne ere manansunna indi: Su samba'an timukka, wageangngu leta'a udde uawannadda ma'oman sara pentakku timukka, su wageangngu leta'u wadda'u Zin su passarannu Edom;

²manattakka wuassu pentakku timukku Tahal᷊oangnga Nate,

³masal᷊a watukku timukka sumabbi manga wawal᷊annu wowone su Akrabim maddatingngu Zin. Wua'udde sumabbi timukku Kades Barnea, masal᷊a sumabbi Hezron, wuṛṛu suma'a watukku Adar, wua'udde mabbeṛṛo watukku Karka.

⁴Wua'isudde masal᷊a lai watukku Azmon, ana see mangin sal᷊ukka ana'u sal᷊ukka su passarannu Mesir, wua'udde masue su Tahal᷊oangnga Tangngane. Etearoddi akkitu passaranna su samba'an timukku leta'u ṛuanganni Yehuda. Wuṛṛu akkitu passaranna udde maola'a lai akkitu passaranna samba'an timukku ahewallu wanua Israel.

⁵Su samba'an ra'i, passaranne eteudde Tahal᷊oangnga Nate, masal᷊a watukku sawannakka maddatingngu mamoṛṛongannu Sal᷊ukku Yordan. Su samba'an sawannakka, passaranne manattakka wuassu mamoṛṛongannu Sal᷊ukku Yordan udde,

⁶suma'a watukku Bet-Hogla, wua'udde masal᷊a watukku passarannu Wawal᷊annu Yordan. Wua'isudde passarannu sawannakka udde masasukka suma'a watukku sawannakka ma'oman sara su Watu Bohan (Bohan eteudde ana'i Ruben),

⁷wua'udde masasukka watukku Wawal᷊annu Asasusa ma'oman sara Debir, ana see mabeṛṛo lai watukku sawannakka watukku Gilgal su tampa apan uasasaruannu manga sendekku wowone su Adumim samba'an timukku wawal᷊anne udde. Wua'isudde masasukka lai watukku al᷊imatan kua'e En Semes, ana see watukku En-Rogel,

⁸wua'udde suma'a sumabbi Wawal᷊annu Hinom su samba'an timukku wuidda, isudde addone Yerusalem, soan taumatan Yebus. Wua'isudde akkitu passaranna udde mattuda puiddu wuidda udde su samba'an baṛṛatu Wawal᷊annu Hinom, su pentakku sawannakka wawal᷊annu Refaim,

⁹wua'udde masal᷊a watukku al᷊imatan kua'e Me-Neftoah, maddatingngu manga soa maranin wowon Efron. Wua'isudde akkitu passarannu leta'a udde mabbeṛṛo watukku Baala (eteudde Kiryat-Yearim),

¹⁰wuṛṛu mamal᷊iwutta wageangngu waṛṛatu Baala watukku panenteannu Edom, ana see masal᷊a watukku wageangngu sawannaku Wowon Yearim (eteudde Wowon Kesalon), wuṛṛu sumossokka watukku Bet-Semes, wua'udde masal᷊a watukku Timna.

¹¹Wuassu Timna, akkitu passaranna udde masal᷊a watukku samba'an sawannaku Wowon Ekron, ana see mabeṛṛo watukku Sikron, sumabbi Wowon Baala, masal᷊a watukku Yabneel, wuṛṛu muddussa su Tahal᷊oangnga Tangngane,

¹²apan maola'a akkitu passaranna su samba'an baṛṛatu leta'u ṛuangannu Yehuda. Su lal᷊ummu wageangngu leta'a udde uatana'a manga taumata wuassu manga amonanna su lal᷊ummu ṛuanganni Yehuda.

¹³Nassul᷊ungngu parentan MAWU si Yosua, sambageanganna wuassu leta'u Yehuda ionggola si Kaleb ana'i Yefune wuassu ṛuanganni Yehuda. I tou niwalungannu Hebron, eteudde soa tatahuananni Arba, iamangngi Enak.

¹⁴Papapulunni Enak eteudde taumatan Sesai, Ahiman wuṛṛu Talmai. I Kaleb nallimbuakka si mangitou sarangkanambone wuassu Hebron.

¹⁵Wua'isudde i tou inaite namangalo manga taumata apan uatana'a su Debir. (Soa udde dorone tinumelengnga aranne Kiryat-Sefer.)

¹⁶Unni Kaleb, “Isai-sai apan botongnge maapangaṛṛo Kiryat-Sefer, i tou wotongnge mapa'awingngu ana'u maṛṛuala, i Akhsa.”

¹⁷I Otniel, ana'u tuṛṛangngi Kaleb aranne i Kenas, naapangaṛṛo soa udde; ne i Kaleb nanantilli Akhsa, anangnge, maola'a awingngi Otniel.

¹⁸So allon kawingngi tarua, i Otniel nammata'i Akhsa tadea'u madorongnga leta'a santampa su iamangnge. Ne i Akhsa sinumossokke wuassu keledaine, ana see i Kaleb naiwal᷊o si tou apa ipaapulune.

¹⁹I Akhsa sinumimbakka, “I ya'u ma'apulu manga pira al᷊imatan kua'e, ana waugu leta'a apan niwalungngi papa si ya'u udde, leta'a mamara.” Ne i Kaleb nangonggola si tou al᷊imatan kua'e su ul᷊une wuṛṛu al᷊imatan kua'e su wunnene.

²⁰Manansunna indi eteudde leta'a apan niwalungnga su manga amonanna su lal᷊ummu ṛuanganni Yehuda maola'a pussa'a mangitou.

²¹Manga soa apan arauanne su samba'an timukka, apan maola'a pussa'an Yehuda, eteudde addone su passarannu Edom, sarangkanambone ruan pul᷊o sio soa, nasutta lai manga ampungnga maranine. Manga soa udde eteudde: Kabzeel, Eder, Yagur, Kina, Dimona, Adada, Kedes, Hazor, Yitnan, Zif, Telem, Bealot, Hazar-Hadata, Keriot-Hezron (eteudde Hazor), Amam, Sema, Molada, Hazar-Gada, Hesmon, Bet-Pelet, Hazar-Sual, Bersyeba, Baala, Iyim, Ezem, Eltolad, Khesil, Horma, Ziklag, Madmana, Sansana, Lebaot, Silhim, Ain wuṛṛu Rimon.

³³Manga soa, nasutta lai manga ampungnga maranin, apan sarangkanambone mapul᷊o appata soa, eteudde: Esytaol, Zora, Asna, Zanoah, En-Ganim, Tapuah, Enam, Yarmut, Adulam, Sokho, Azeka, Saaraim, Aditaim, Gedera wuṛṛu Gederotaim.

³⁷See lai mapul᷊o annumma soa manansunna indi suadio'a ringannu manga ampungnga maranine; Zenan, Hadasa, Migdal-Gad, Dilean, Mizpa, Yokteel, Lakhis, Bozkat, Eglon, Khabon, Lahmas, Khitlis, Gederot, Bet-Dagon, Naama wuṛṛu Makeda.

⁴²See lai sio soa manansunna indi suadio'a ringannu manga ampungnga maranine: Libna, Eter, Asan, Yiftah, Asna, Nezib, Kehila, Akhzib wuṛṛu Maresa.

⁴⁵See lai Ekron wuṛṛu manga soa maradio'a wuṛṛu manga ampungnge,

⁴⁶see anambon manga soa wuṛṛu manga ampungnga maranin Asdod, wuassu Ekron maddatingngu Tahal᷊oangnga Tangngane.

⁴⁷Aroddi lai Asdod wuṛṛu Gaza ringannu manga soa maradio'a wuṛṛu manga ampungnge apan usal᷊iawukka maddatingngu maranin ana'u sal᷊ukka su passarannu Mesir wuṛṛu Tahal᷊oangnga Tangngane.

⁴⁸Su panenteanna pia mapul᷊o assa soa suadio'a ringannu manga ampungnga maranine; Samir, Yatir, Sokho, Dana, Kiryat-Sana (eteudde Debir), Anab, Estemoa, Anim, Gosyen, Holon wuṛṛu Gilo.

⁵²See lai sio soa manansunna indi; nasutta manga ampungnga maranine; Arab, Duma, Esan, Yanum, Bet-Tapuah, Afeka, Humta, Kiryat-Arba (eteudde Hebron) wuṛṛu Zior.

⁵⁵See lai mapul᷊o soa manansunna indi suadio'a ringannu manga ampungnga maranine; Maon, Karmel, Zif, Yuta, Yizreel, Yokdeam, Zanoah, Kain, Gibea wuṛṛu Timna.

⁵⁸Wuṛṛu annumma soa manansunna indi lai suadio'a ringannu manga ampungnga maranine; Halhul, Bet-Zur, Gedor, Maarat, Bet-Anot wuṛṛu Eltekon.

⁶⁰See lai darua soa manansunna indi suadio'a ringannu manga ampungnga maranine: Soa Kiryat-Baal (eteudde Kiryat-Yearim) wuṛṛu Soa Raba.

⁶¹Su leta'u wadda'a, pia annumma soa manansunna indi suadio'a ringannu manga ampungnga maranine; Bet-Araba, Midin, Sekhakha, Nibsan, Soa Asimma wuṛṛu En-Gedi.

⁶³Soan Yerusalem nasutta lai pussa'an Yehuda, arawe taumatan Yehuda tawe maal᷊imbuakka taumatan Yebus apan uatana'a isudde. Naddatingngu orassa indi taumatan Yebus ta'e uatana'a su sambau ringannu taumatan Yehuda su soa udde.