Read Talaud YOSUA 20 Bible Online

YOSUA 20 - Talaud bible

YOSUA 20

¹Wua'udde MAWU nandolokki Yosua,

²nabbisara arendi su taumatan Israel, “I Ya'u buatte nandolokki Musa tadea'u i tou mamasingkata si yamiu su ola'u manga soa tatal᷊anganna, eteudde manga soa suapan taumata wotongnge tumal᷊angngu watanganne tadea'u maasomba pattillindumanna. Orassa indi pamilete manga soa udde.

³Taumata apan namate taumata waine ringannu tawe nipatatudda, wotongnge tumal᷊angnga su soa udde tadea'u mal᷊iu wuassu taumata apan mabbal᷊issa inolaanne udde.

⁴I tou wotongnge tumal᷊angnga su wallatu sambau wuassu manga soa udde; wuṛṛu inai su tampa pamarikisanna su ngaran soa wahewalla udde, ana see manal᷊a'a su manga piaṛṛangnge isudde apa apan buatte nariaddi. Manga piaṛṛangnge udde sarun mamalan tou sumutta su soa udde, wuṛṛu i tou onggol᷊annu tampa atatanaanne.

⁵Amungkangngu taumata apan maapulu mabbal᷊issa inolaanna udde nangenggenna si tou ma'oman sara isudde, tumana'u soa udde tawe wotongnge manantillu taumata udde si tou. I mangitou ṛinone mallindumma ana waugu i tou namate taumata ringannu tawe nipattatudda, wuṛṛu wal᷊ine ana waugu uawawul᷊o.

⁶I tou wotongnge matana'a su soa udde ma'oman sara i tou buatte niparikisanna su saruannu awadaalla, wuṛṛu ma'oman sara taumata uaagassa Imam Bahewa su tempo udde mate. Wua'udde, wotongngete taumata udde mapul᷊e su ampungnga atatanaanne wuassuapa i tou tinumal᷊angnga.”

⁷Ne su wageangngu waṛṛatu Sal᷊ukku Yordan ṛuangannu Israel nanantunnu manga soa indi maola'a soa tatal᷊anganna: Kades su panteannu Naftali su Galilea, Sikhem su panenteannu Efraim, wuṛṛu Hebron su panenteannu Yehuda.

⁸Su wageangngu ra'in Sal᷊ukku Yordan su penenteannu wadda'u anne samba'a ra'in Yerikho, i mangitou nanantunnu manga soa manansunna indi maola'a soa tatal᷊anganna: Soa Bezer su wageangngu leta'i Ruben, soa Ramot su Gilead su leta'a wageangngi Gad, wuṛṛu soan Golan su Basan, leta'a wageangngi Manasye.

⁹Eteudde sarangkanambone manga soa tatal᷊anganna apan tinantunnu hunan anambon ṛuangannu Israel wuṛṛu lai su taumata raho apan uatana'a su pattangnganni mangitou. Suapan taumata apan namate taumata waine ringannu tawe nipattatudda, wotongnge maasomba aambangnga su manga soa udde wuassu aenggennu taumata apan ma'apulu mabbal᷊issa si tou; i tou tawe wotongnge pateanna amungkangu taambe niparikisanna su saruannu awadaalla.