Read Talaud YOSUA 22 Bible Online

YOSUA 22 - Talaud bible

YOSUA 22

¹Wua'udde i Yosua namago manga taumata wuassu ṛuanganni Ruben, i Gad wuṛṛu sambageanganna ṛuanganni Manasye su samba'a ra'in Sal᷊ukku Yordan,

²ana see nabbisara si mangitou, “I yamiu buatte tinumuṛṛutta al᷊awo'u darolokki Musa allangu MAWU udde si yamiu. Wuṛṛu i yamiu lai buatte tinumuṛṛutta parenta'u.

³Al᷊annunete indi tawe saran paassa i yamiu namalan manga tuṛṛangngu, taumatan Israel waine, uapapangalo sassane. I yamiu buatte tinumuṛṛutta manga parenta MAWU Ruatanu ṛingannu atonna-tonna.

⁴Ne ere buatte nipa'ire-Ne, MAWU Ruatanu buatte nangonggolu atatammudda su manga tuṛṛa-tuṛṛangngu, taumatan Israel waine. Nariaddi, orassa indi pabelengke watukku wageangngu letangngu sassane su samba'an ra'in Sal᷊ukku Yordan udde apan nionggoli Musa si yamiu paarorone.

⁵Wuṛṛu paariagai tadea'u i yamiu sidutu tuttuṛṛutta tita apan nirolokki Musa si yamiu, eteudde: Pandangngute MAWU Ruatanu, tantalongke apulu-Ne, tantuṛṛutte manga parenta-Ne, pa'ala'e apulu-Ne, ringannu ahewallu naungngu wuṛṛu ahewallu.”

⁶Wua'udde i Yosua nangimpal᷊ukka wuṛṛu nandolokki mangitou mabelengnga watukku leta'a wageangngi mangitou ringannu nangonggolu tanata indi, “I yamiu orassa indi naalate wuṛṛu i yamiu mabelengnga ringannu uaapiddu manambo winatangnga, sal᷊a'a, wul᷊awanna, witu'a, atta'a wuṛṛu laubba. Tahiate lai manga hessin inasaharannu su manga taumata waine ṛuanganna sambau.” Ne ṛuanganni Ruben, i Gad wuṛṛu ṛuanganna Manasye su samba'an ra'in Yordan udde nanantangngu taumatan Israel waine, wua'udde inaite watukku Silo su Kanaan mattudda leta'i mangitou sassane su wageangngu Gilead. I mangitou namanua su leta'a udde wuassu parenta MAWU si Musa. (Sambageanganna ṛuanganni Manasye buatte nanengkamma wuassi Musa, leta'a su samba'an ra'in Sal᷊ukku Yordan, wuṛṛu sambageanganna ṛuanganni Manasye waine, nanengkamma wuassi Yosua leta'a su samba'an baṛṛatu Sal᷊ukku Yordan su sampunna ringannu manga ṛuanganna waine.)

⁷

⁸

⁹

¹⁰Su tempo ṛuanganni Ruben, i Gad, wuṛṛu ṛuanganni Manasye su samba'an ra'in Sal᷊ukku Yordan udde na'omate su Gelilot — ta'e su samba'an baṛṛatu Sal᷊ukku Yordan — i mangitou napararisikku sambau mezbah apan bahewalla wuṛṛu maṛṛansanga maranin sal᷊ukka.

¹¹Manga taumatan Israel waine naaringikka walahanna sandingananni mangitou nabbisara, “Manga taumata ṛuanganni Ruben, i Gad wuṛṛu ṛuanganni Manasye su samba'an ra'in Yordan suete napararisikku sambau mezbah su Gelilot maranin Sal᷊ukku Yordan su wageangngu leta'i ite!” Ne i mangitou sarangkanambone naammulla su Silo inai mamangalo manga ṛuangannu Israel su wageangngu ra'in Sal᷊ukku Yordan udde.

¹²

¹³Ana see i Pinehas, ana'i Imam Eleazar, nirolokku ṛuangannu Israel inai ringannu ṛuanganni Ruben, i Gad wuṛṛu ṛuanganni Manasye su wageangngu Gilead su samba'a ra'in Sal᷊ukku Yordan.

¹⁴Suadio'a ringanni Pinehas inai lai siri mapul᷊o piaṛṛa'u walahannu Israel, — sangkatou wuassu sambau ṛuanganna su samba'an waṛṛatu Sal᷊ukku Yordan, sangkatou-sangkatou uddewe tembonannu alahanna su lal᷊ummu amonanni mangitou.

¹⁵Ne i mangitou na'omate su tampan ṛuanganni Ruben, i Gad wuṛṛu ṛuanganni Manasye su wageangngu Gilead.

¹⁶Ana see ringannu arannu anambon al᷊aṛṛana'u MAWU, i mangitou nabbisara su manga taumata wuassu ṛuanganni Ruben, i Gad wuṛṛu ṛuanganni Manasye udde, “Anio i yamiu na'ola'a inolaanna apan lal᷊eo indi su saruannu MAWU Ruatan Israel? Ringannu napararisikku mezbanu sassane, i yamiu nilumawangnga MAWU! I yamiu tate tumuṛṛutta manga parenta-Ne!

¹⁷I yamiu tawe maanaungnga rosan kite su Peor? Su tempo udde i ite niṛṛuumannu MAWU ringannu sambau al᷊aṛṛusa'itta, salaiwe i ite indi walahan-Ne sassane! Naddatingngu orasa indi i ite ta'e uapasanna rosane. Apa udde taambe lai maawal᷊u si yamiu?

¹⁸Wuṛṛu orassa indi apa i yamiu maapulu tumal᷊iudda MAWU lai? Amungkangngu allo indi yamiu lumawangnga MAWU, tiṛṛabbi i Tou sarun masa'u anambon walahannu Israel.

¹⁹Amungkangngu wageangngu letangngu udde lal᷊eo wuṛṛu tawe su tampane olaanna tampan patataṛṛamawuanna su MAWU, pangingkate inawarendi su wageangngu leta'u MAWU, isindi pia Dasannu MAWU. Padorongke samba'a wuassu wageangngi yami, arawe ariete lumawangnga MAWU ara'e lumawangnga si yami manamban sambau mezbah waine, ewe'e piate mezbah MAWU Ruatan kite.

²⁰Naungete, i Akhan ana'i Zerah madiri tumuṛṛutta parenta MAWU su ola'u manga saranapa apan ṛinone tutunganna, wuṛṛu apa sombangnge? Anambon ṛuangannu Israel niṛṛuumanna! Sumbal᷊i na'ola'a rosa tumba'u i Akhan, arawe wal᷊ine tumba'u i tou sassane nate!”

²¹Ana see manga taumatan ṛuanganni Ruben, i Gad wuṛṛu i Manasye su samba'a ra'i udde sinumimbakka,

²²“Apan Lembon Taṛṛino eteudde MAWU! Apan Lembon Taṛṛino eteudde MAWU! I tou masingkatta anio yami na'ola'a inolaanna indi, wuṛṛu yami maapulu tadea'u i yamiu lai maasingkatta! Unnu wisara na'ola'a inolanna indi ringannu pandumma lumawangnga MAWU ara'e ana waugu yami tate lai mangimanna si Tou, wala'e yami mate orassa indi!

²³MAWU sassane apan maṛṛuumanni yami, amungkangngu yami pia pandumma lumawangnga MAWU wuṛṛu ma'ola'a mezbah kami sassane pangadoannu sasamba itattambunna ara'e sasamba ganduma ara'e sasamba pagahahawe.

²⁴Wal᷊inewe udde pandumanni yami, Tuṛṛ-tuṛṛangnga! Yami mapararisikku mezbah udde, ana waugu yami sussinggawangnga su allon sal᷊immurine papapulunni yamiu mabbisara papapulunni yami, ‘I yamiu tawe pa'a'aukka ringannu MAWU, MAWU Ruatan Israel!

²⁵Panutukke, I Tou nangaddon Sal᷊ukku Yordan indi su pattangnganni ite udde ana waugu mapaṛṛaṛṛaeng kami wuṛṛu i yamiu manga taumatan Ruben wuṛṛu Gad. Atonna i yamiu tawe pa'a'aukka ringannu MAWU.’ Ne apa sarun mariaddi su allo murine? Su lal᷊ummete papapulunni yamiu sarun maaola'a papapulunni yami mangillol᷊on patataṛṛamawu su MAWU.

²⁶Nariaddi, yami napararisikku mezbah, wal᷊ine ipa'ola'a sasamba itattambunna ara'e maola'a sasambang kami,

²⁷arawe udde maola'a tatiala si ite ruan ba'a, wuṛṛu su papapulunni ite su allo addantane, manungku atonna yami indi mattaṛṛamawu MAWU su Rasannu Daranta-Ne ringannu uaapiddu sasamba itattambunna, manga sasamba wuṛṛu sasamba pagahahawe. Ringannu aroddi papapulunni yamiu tawe mabbisara manungku papapulunni yami tawe pa'a'aukku ringannu MAWU.

²⁸Nariaddi, pandumanni yami eteudde: unnu wisara papapulunni yamiu mabbisara aroddi, ne papapulunni yami wotongnge mabbisara, ‘Pa'ellega mezbah udde! Iupungngu al᷊amonan kami napararisikku sambau mezbah apan uasul᷊ungngu mezbah MAWU, wal᷊ine ipaatta su sasamba itattambunna ara'e aonggola, arawe udde maola'a sambau tatiala si ite ruan ba'a.’

²⁹Pangimante, yami madiri lumawanna MAWU ara'e mangillol᷊o mattaṛṛamawu si Tou ringannu manamba mezbah waine ara'e sasamba itattambunna ara'e sasamba gandumma, ara'e tumba'u aonggola, arawe mezbah MAWU Ruatan kite piate su saruannu Rasannu Darantan MAWU.”

³⁰Sarangkanambone apan nital᷊a'a manga taumata wuassu ṛuanganni Ruben, i Gad wuṛṛu ṛuanganni Manasye su samba'an da'i udde niaringiṛṛanni Imam Pinehas wuṛṛu sire mapul᷊o piaṛṛa'u tumana'u Israel wuassu wageangngu waṛṛatu Sal᷊ukku Yordan. Ne i mangitou nal᷊uassu tatal᷊a'a udde.

³¹Ana see unni Pinehas, ana'i Imam Eleazar, su manga taumata ṛuanganni Ruben, i Gad wuṛṛu Manasye su samba'an Da'i, “Orassa indi yami masingkatta manungku MAWU uarundinganna si ite, ana waugu i yamiu tawe lumawanna si Tou. I yamiu suete nanal᷊amatta ṛuangannu Israel wuassu ṛuumannu MAWU.”

³²Wua'udde napul᷊ete i Pinehas wuṛṛu manga piaṛṛa'u Israel udde. I mangitou nanantangngu manga taumatan Ruben wuṛṛu Gad su Gilead, ana see nabelengke su Kanaan, wua'udde nabbati'u hatto udde su ṛuangannu Israel.

³³Ne taumatan Israel nilumuassu olangnge udde, na'oman sara i mangitou naddalote MAWU Ruata. I mangitou tate lai maggahatton pandumanni mangitou inai mamangalo taumatan Ruben wuṛṛu Gad, wuṛṛu maṛṛimunsa'a wanuane.

³⁴Panginsueanne ṛuanganni Ruben wuṛṛu i Gad udde nabbisara, “Meddan sasamba indi maola'a tatialan kite sarangkanambone manungku MAWU eteudde MAWU Ruata.” Ne i mangitou nanagon mezbah udde “Tatiala”.