Read Talaud YOSUA 24 Bible Online

YOSUA 24 - Talaud bible

YOSUA 24

¹I Yosua nangammulu anambon ṛuangannu walahannu Israel su Sikhem, ana see nandolokku manga tembonanne, piaṛṛangnge, mallaṛuṛungnga wuṛṛu manga tembonannu tantara rumanta sumaruanna. Ne nirumantate i mangitou sinamaruanna MAWU Ruata.

²Wua'udde i Yosua nabbisara si mangitou sarangkanambone, “Paddaringikka apa apan iapaasingkattu MAWU, Ruatan Israel si yamiu, ‘Su runia dorone, iupungngu al᷊amonanu uatana'a su samba'an Sal᷊ukku Efrat, wuṛṛu massubba manga monganna. Sangkatou wuassi mangitou eteudde i Terah, iamangngi Abraham wuṛṛu i Nahor.

³Ana see i Ya'u mangal᷊appa si Abraham, iamangngu al᷊amonanu udde, wuassu wanua su samba'an Efrat udde, wuṛṛu nandolokki tou namal᷊intaddu ahewallu wanua Kanaan. I Ya'u nangonggolu manambo papapulunna si tou. Paarorone i Ishak Ta'u nionggola si tou,

⁴ana see i Ishak Ta'u nionggol᷊annu ruan katou ana'a, eteudde i Yakub wuṛṛu i Esau. I Ya'u nangonggola si Esau leta'u panenteannu Edom maola'a leta'a pussaane, arawe i Yakub iamangngu al᷊amonanu udde, nangingkatta su Mesir, suadio'a ringannu al᷊aṛanangnge.

⁵Wua'udde i Ya'u nandolokki Musa wuṛṛu i Harun, wuṛṛu nandantan sa'itta apan bahewalla su Mesir, ana see i Ya'u napasabangngi yamiu wua poiaroddi.

⁶I Ya'u nangapiddu iupungngu al᷊amonanu udde sinumabbangnga wuassu Mesir, ana see taumatan Mesir nangenggenna si mangitou ringannu keretan pangalo wuṛṛu tantara uasa'e awal᷊o. Wuṛṛu su tempo iupungngu al᷊amonanu udde na'omate su Tahal᷊oangnga Gelagah,

⁷i mangitou sinumal᷊ande si Ya'u naiontolla. Ne tampa su wallati mangitou wuṛṛu manga taumatan Mesir udde Ta'u niola'a nabbal᷊i marandumma, wuṛṛu taumatan Mesir Ta'u nioopannu ua'en tahal᷊oangnga na'oman sara i mangitou sarangkanambone nal᷊ammissa. I yamiu naasingkatte al᷊awo'u inolaang-Ku su Mesir. Mal᷊annu atonna i yamiu uatana'a su wadda'u anne.

⁸Ana see i Ya'u nangapiddi yamiu watukku wanuan taumatan Amori apan uatana'a su samba'a da'in Sal᷊ukku Yordan. I mangitou namangalo si yamiu, arawe i Ya'u napaauntungi yamiu. I yamiu naapangaṛo wanuan mangitou, wuṛṛu i Ya'u namate si mangitou.

⁹Ana see ratun Moab, eteudde i Balak ana'i Zipor, nandoappa si yamiu. I Tou nandolokku taumata inai ringanni i Bileam ana'i Beor wuṛṛu madorongnga tadea'u i Bileam mamontoga si yamiu.

¹⁰Arawe i ya'u tawe tinumuṛṛuta apulun Bileam, ne i tou nangal᷊amatta si yamiu. Etearoddi i Ya'u nanal᷊amatta si yamiu wuassi Balak.

¹¹Wua'udde i yamiu tinumumbete Sal᷊ukku Yordan, wuṛṛu na'omate su Yerikho. Manga taumatan Yerikho namangalo si yamiu, aroddi lai taumatan Amori, taumatan Feris, Kanaan, Het, Girgasi, Hewi wuṛṛu taumatan Yebus. Arawe i Ya'u napaauntungi yamiu wuassi mangitou sarangkanambone.

¹²Su tempo i yamiu inaite mamangalo si mangitou i Ya'u napaatingnganga wuṛṛu napaata'utti mangitou, na'oman sara ruan katou ratun Amori udde tinumal᷊angngi yamiu. Wal᷊ine hal᷊elenu wuṛṛu wal᷊ine anaannu apan naauntungnga si yamiu.

¹³Leta'a apan Ta'u nionggola si yamiu, nisengkammi yamiu ringannu tawe sahadde. Wuṛṛu manga soa apan Ta'u nionggola si yamiu, wal᷊ine i yamiu napararisikka. Arawe orassa indi, ete i yamiu apan uatana'a poiaroddi, wuṛṛu ete i yamiu lai mallal᷊umanna'u wuan anggore wuṛṛu wuan Zaitun, sumbal᷊i wal᷊ine i yamiu nassuanna.’ ”

¹⁴“Nariaddi, orassa indi,” unni Yosua nanassukku wisarane, “pangaddate MAWU. Pattaṛṛamawute si Tou ringannu naungnga mal᷊uassa wuṛṛu matammuda. Paaraua'a manga passasubba MAWU waine apan sassubannu iunpungngu al᷊amonanu tiwatta su Mesopotamia wuṛṛu su Mesir. Pattaṛṛamawute tumba'u su MAWU sassane.

¹⁵Unnu wisara i yamiu mattaṛṛamawu su MAWU, paaṛṛawesse allo indi lai, ete sisai yamiu maapulu mattaṛṛamawu; su manga MAWU waine apan sassubbannu iupungngu al᷊amonanu su Mesopotamia dorone, ara'e su manga mawun taumatan Amori apan wanuane atatanaanni yamiu orassa indi. Arawe yami — i ya'u wuṛṛu amonangku sarun tumba'u mattaṛṛamawu su MAWU sassane.”

¹⁶Ne ṛuangannu Israel udde sinumimbakka, “Yami tawe saran paassa nanantangngu MAWU, ana waugu massubba MAWU waine!

¹⁷Ete MAWU Ruatan kite apan napaasabangngu manga al᷊amonan kite wuṛṛu i ite sassane wuassu pattataṛṛuallanga su Mesir. I ya'u naasilote manga al᷊aṛindu'a apan niola'u MAWU. MAWU sidutu ual᷊u'adda si ite su al᷊o'engngu amatani ite, sussabbi wanua manga taumata waine.

¹⁸Wuṛṛu su tempo i ite sinumutta su wanua indi, MAWU nallimbuakka anambon taumatan Amori apan uatana'a isindi. Nariadi, yami ma'apulu mattaṛṛamawu MAWU, ana waugu ete i Tou MAWU Ruatan kite.”

¹⁹Ana see i Yosua nabbisara, “Arawe i yamiu asinungka tawe maataṛangnga massubba MAWU, ana waugu ete i Tou MAWU Ruata apan na'ukkassa, Apan Tinggassa. I Tou madiri pia do'appa. Amungkangngu i yamiu manantangngi Tou wuṛṛu mattaṛṛamawu manga MAWU waine, i Tou tawe mangampungnga rosanu. Arawe mawal᷊elongnga i Tou sarun lumawanna wuṛṛu maṛṛuumanni yamiu, salaiwe paarorone i Tou marangngu si yamiu.”

²¹Ne manga taumatan Israel udde sinumimbakka, “Tawe! Yami tawe mattaṛṛamawu manga MAWU waine. Yami tumba'u mattaṛṛamawu MAWU sassane!”

²²Ana see i Yosua nabbisara, “Ne ete i yamiu sassane maola'a tialane manungku i yamiu buatte nakkawessa manungku tumba'u mattaṛṛamawu su MAWU sassane.” “Atonna,” sasimbakki mangitou, “yammite sassane maola'a tialane.”

²³“Amungkangngu aroddi, paaraua'a manga mawun walahanna waine apan sasahipunanni yamiu udde,” unni Yosua, “wuṛṛu pa'diandite manungku i yamiu sidutu tuttuṛutta MAWU, MAWU Ruatan Israel.”

²⁴Ana see manga taumata nabbisara si Yosua, “Yami sidutu tumba'u mattaṛṛamawu MAWU, MAWU Ruatan kite. Yami sarun tumuṛutta manga parenta-Ne.”

²⁵Ne su allo udde su Sikhem i Yosua na'ola'a paddariandi ringannu taumatan Israel; wuṛṛu isudde i tou nangonggolu manga tita si mangitou wuṛṛu manga atoranna apan ṛinone olaanni mangitou.

²⁶Anambon tita wuṛṛu manga atoranna udde niwoṛṛetti tou su lal᷊ummu Wuken Tita MAWU. Wua'udde i tou nanganu sambau watu wahewalla su tampa apan apianne su MAWU.

²⁷Wua'udde i Yosua nabbisarate anambon taumata udde, “Watu indi maola'a tialan kite. Anambon bisara apan niwisaran MAWU si ite, buatte niwisara su saruannu watu indi. Nariadi ete watu indi apan maola'a tiala su saruanni yamiu, mapaanaungngi yamiu tadea'u tawe lumawanna Ruatanu.”

²⁸Panginsueanne i Yosua nandolokku manga taumata udde niapaapul᷊e; wua'udde i mangitou sarangkanambone nabelengke su leta'i mangitou sambau-sambau.

²⁹Wua'udde i Yosua ana'i Nun allangu MAWU udde, nate su uukka maṛasutta mapul᷊o su tonnane.

³⁰I tou nilabingnga su leta'a pussaane sassane su Timnat-Serah su panenteanni Efraim su samba'an sawannaku Wowon Gaas.

³¹Su al᷊o'engngu allo i Yosua mabbiakka, ṛuangannu Israel mattaṛṛamawu MAWU. Wuṛṛu napawe i tou natete lai i mangitou sidutu mattaṛṛamawu MAWU tantal᷊anna suwallati mangitou ta'e pia manga piaṛṛa'a apan buatte naasilo sassane al᷊awo'u inolaannu MAWU su ṛuangannu Israel.

³²Winal᷊unanni Yusuf apan niapiddu ṛuangannu Israel wuassu Mesir, nilabingnga su Sikhem su leta'a apan buatte niwallianni Yakub, aregane maṛṛasutta roitta sal᷊a'a wuassu al᷊aṛana'i Hemor, iamangngi Sikhem. Leta'a udde tinantilla su papapulunni Yusuf.

³³Wua'udde i Eleazar ana'i Harun nate lai, wuṛṛu nilabingnga su Gibea, eteudde sambau soa apan addone su panenteanni Efraim. Soa udde buatte nionggola si Pinehas, ana'i Eleazar.