Read Talaud YOSUA 3 Bible Online

YOSUA 3 - Talaud bible

YOSUA 3

¹Su allo tiṛṛabine i Yosua wuṛṛu anambon ṛuanganni Israel napu'o marua allo atonna, ana see nanantangken tampa paddasananni mangitou su Sitim, wuṛṛu inaite watukku Sal᷊ukku Yordan. Isudde i mangitou naddasanna lapiddu maṛṛaddo tempone tumumbe.

²Napawe nal᷊iute tallu allo, manga piaṛṛange namal᷊iwutta ahewallu paddasananna,

³wuṛṛu nangonggolu parenta indi su ṛuangannu Israel “Amungkangu i yamiu maasilo imam uapasanna Wantalu Pa'aire MAWU Ruatanu, ṛinone i yamiu lai inai manantangu tampa paddasananna indi. Tantalongke Wantala udde,

⁴arawe imbaṛṛangnga umamatta tumaniten maranin Wantala udde; tantalongke wuassu liudde ringannu wallanne sangkilo araune. Ringannu aroddi yamiu sarun maasingkata lal᷊anna apan ṛinone amatanni yamiu, ana waugu i yamiu taambe wuasu wanua indi.”

⁵I Yosua nabbisara su ṛuangannu Israel, “Ṛinone i yamiu mapaaukkasu watangannu ana waugu tiṛṛabbi MAWU sarun ma'ola'a al᷊aṛṛindu'a su pattanganni yamiu.”

⁶Ana see i Yosua nandolokku manga imam tadea'u mamasanna Wantalu Pa'aire udde ana see inaite inumamatta malliu ṛoro ṛuangannu Israel. Ne i mangitou tinumuṛṛute parentan Yosua.

⁷MAWU nabbisara si Yosua, “Manattaka allo indi i'o sarun Ta'u olaanna taumata wahewa ma'oman sara anambon ṛuangannu Israel mangaddata si'o wuṛṛu maatutukka manungku i Ya'u su sandiṛṛannu ere lai Ya'u su sandiṛṛanni Musa.

⁸Orassa indi doloṛṛeṛṛa'e manga imam apan uapasanna Wantalu Pa'aire udde tadea'u napawe i mangitou na'omate su sal᷊ukka, i mangitou sinumossokke su ua'en sal᷊ukka udde wuṛṛu dirumarisikka su winggine.”

⁹Ana see i Yosua namago manga taumatan Israel wuṛṛu nabbisara, “Wette paddaringikke apa apan sarun irolokku MAWU Ruatanu si yamiu.

¹⁰Amungkangu i yamiu inaite umamatta, MAWU sarun mallimbuakka taumatan Kanaan, Het, Hewi, Feris, Girgasi, Amori wuṛṛu Yebus. Wuṛṛu su tempo Wantalu Pa'aire MAWU ul᷊ilim pati'uppa tinumumbete Yordan malliu ṛoro si mangitou, i yamiu sarun maasilo manungku MAWU Ruata apan biakka, udde su pattangnganni yamiu.

¹²Orassa indi ṛinone i yamiu mamile siri mapul᷊o dua su atoune — sangkatou wuassu sambau ṛuangannu Israel.

¹³Man napawe manga imam apan uapasanna Wantalu Pa'aire MAWU naṛṛindaten leddane sulal᷊ummu ua'en sal᷊ukka Yordan udde, ua'e mangngelekka sarun matta'alla; ua'e apan mangngelekka wuassu ul᷊une aṛṛapinganna su sambau tampa.”

¹⁴Su tempo udde tantal᷊anna orassu pangangitingnga, wuṛṛu ere su inanaramanne ua'en sal᷊ukku Yordan nilumawebbesa. Su tempo taumata Israel nanantangu paddasananni mangitou inai tumumbe Sal᷊ukku Yordan, manga imam niumamatta rorone lapiddu uaapiddu Wantalu Pa'aire. Wuṛṛu su tempo manga imam udde nanal᷊edanna ua'en sal᷊ukka,

¹⁶orassa udde lai ua'en sal᷊ukka nattaalla. Marau su ul᷊un sal᷊ukka, ua'ene uaammula su Adam, sambau soa apan addone su sambaan soa Sartan. Ua'e su wageangngu enggesanne apan mangngelekka watukku tahal᷊oangnga Nate tate mangngelekka, na'oman sara ṛuangannu Israel wotongngete ma'aamatta su leta'a mamara uasaruanna soan Yerikho. Manga imam apan uapasanna Wantalu Pa'aire udde sidutu uarisikka su pattangngannu sal᷊ukka na'oman sara ṛuangannu Israel naal᷊ewesse abbi su samba'a.