Read Talaud YOSUA 4 Bible Online

YOSUA 4 - Talaud bible

YOSUA 4

¹Napawe anambon balahanna udde na'omate su samba'a, MAWU nabbiasra si Yosua,

²Pamilete siri mapul᷊o dua taumata, sangkatou wuassu ṛuanganna sambau.

³Doloṛṛa'a i mangitou mangal᷊appa mapul᷊o dua su waune watu wuassu pattangngannu Sal᷊ukku Yordan, su tampa dararisiṛṛannu manga imam. Doloṛṛa'a i mangitou mamasanna manga watu udde maddatingngu tampa i yamiu maddasanna su tempo ṛabbine.

⁴Ne i Yosua namago siri mapul᷊o dua su atoune apan niapile udde,

⁵ana see nabbisara, “Roote watukku patangngannu Sal᷊ukku Yordan, su saruannu Wantalu Pa'aite MAWU Ruatanu. Sangkatou-sangkatou ṛinone mamasanna sambau watu wua'udde sarangkanambone mapul᷊o dua su waune watu nassulungu anambon maga ṛuanganna sulal᷊ummu walahannu Israel.

⁶Manga watu udde sarun mapaanaungngu walahanna indi su al᷊awo'u inolaanna apan buatte niola'u MAWU. Su allo murine amungkangu al᷊aṛṛanangngu maiwal᷊o apa atappasannu manga watu indi si yamiu,

⁷ṛinone i yamiu mamasingkatta si mangitou ua'en Sal᷊ukku Yordan natta'ala su tempo Wantalu Pa'aire MAWU niapidda tinumumbe sal᷊ukka udde. Manga watu sarun sidutu mapaanaungngu walahannu Israel al᷊awo'a apan nariaddi isindi.”

⁸Siri mapul᷊o dua su atoune udde tinumuṛṛute darolokki Yosua. Wuassu tatantiro MAWU si Yosua, i mangitou nanganu mapul᷊o dua su waune watu wuassu pattangngannu Yordan anambone nisul᷊ungngu anambon manga ṛuanganna sulal᷊ummu walahannu Israel ana see niapidda su paddasananni mangitou.

⁹Su pattangngannu Yordan udde lai, i Yosua nangatokku mapul᷊o dua su waune watu mangke naṛṛino su dararisiṛṛannu manga imam apan uapasanna Wantalu Pa'aire udde. ‘Manga watu udde ta'e isudde sara orassa indi’.

¹⁰Manga imam sidutu uarisikka su pattangngannu Yordan na'oman sara manga taumata udde buatte nammanara al᷊awo'a apan nirolokku MAWU si mangitou wuassi Yosua. Udde nassul᷊ungngu lai manga tatantiro wuassi Musa si Yosua. Ringannu mal᷊ihakka ṛuangannu Israel tinumumbe Sal᷊ukku Yordan.

¹¹Napawe sarangkanambone na'omate su samba'an sal᷊ukka, manga imam apan uapasanna Wantalu Pa'aire, niumamatta su saruanni mangitou.

¹²Uasul᷊ungngu lai ere apan nirolokki Musa, manga tantara wuassu ṛuanganni Ruben, i Gad wuṛṛu mattangnga wuassu ṛuanganni Manasye, nalliuṛṛorote tinumumbe sal᷊ukka.

¹³Sarangkanambone 40.000 su atoune esakka apan pia ahidde nasaddiate inai mapapangalo. Su saruannu MAWU i mangitou niumamatta mattudda watukku wawal᷊anne maranin Yerikho.

¹⁴Allo udde MAWU na'ola'a manga inolaanna tadea'u walahannu Israel mangaddata si Yosua ere sangkatou taumata wahewa. Su al᷊o'engngu pabbiaṛṛanne i mangitou mangngaddata si tou erelai i mangitou mangngaddata si Musa.

¹⁵Wua'udde MAWU nandolokki Yosua,

¹⁶nandolokku manga imam apan uapasanna Wantalu Pa'aire udde tadea'u iapasabanga wuassu Yordan.

¹⁷I Yosua tinumuṛṛutta apa apan nirolokku MAWU si tou.

¹⁸Aroddi manga imam udde na'omate su winggin sal᷊ukka, ua'en sal᷊ukka udde nangelekke apia wuṛṛu nilumawanno ere paarorone.

¹⁹ṛuangannu Israel na'omate su samba'an Yordan su allo apul᷊one wul᷊anna paarorone, wuṛṛu i mangitou naddasanna su Gilgal su samba'a ra'in Yerikho.

²⁰Isudde i Yosua nangatokku mapul᷊o dua su waune watu apan nial᷊appa wuassu Yordan.

²¹Ana se i Yosua nabbisara walahannu Israel, “su allo murine amungkangu manga al᷊aṛṛanangngu maiwal᷊on atappasannu manga watu indi,

²²pasingkataa si mangitou manungku ṛuangannu Israel tinumumbe Sal᷊ukku Yordan indi niumamatta su leta'a mamara.

²³Wattia'a si mangitou manungku MAWU Ruatanu napamaran ua'en Sal᷊ukku Yordan udde si yamiu na'oman sara i yamiu sarangkanambone naddatingnga su samba'ane, ere lai i Tou napaamaran Tahal᷊oangngu Gelagah si yami,

²⁴tadea'u anambon taumata su runia maasingkatta aroddi ahewalle taṛṛino MAWU. Wuṛṛu ringannu aroddi yamiu sarun mangaddata MAWU Ruatanu saran mal᷊annu-l᷊annu.”