Read Talaud YOSUA 6 Bible Online

YOSUA 6 - Talaud bible

YOSUA 6

¹Su soan Yerikho manga ngara pasellanganna rariagante ringannu matohassa wuṛṛu niṛṛuudda masaga-sagada tadea'u taumatan Israel tawe maasutta. Tawe saran sangkatou apan iwala sumutta ara'e sumabbanga su soa udde.

²MAWU nabbisara si Yosua, “Orassa indi Ta'u itantilla si'o Yerikho wuṛṛu ratune wuṛṛu manga tantarane apan baṛṛani udde.

³I'o wuṛṛu tantaranu ṛinone mabbarissa mamal᷊iwutta soa udde paassa allo massallo al᷊annune annumu allo.

⁴Siri pitu imam, sangkatou-sangkatou uaapiddu trompeta, ṛinone u'amatta su saruannu Wantallu Pa'aire. Su allo appitune, i'o wuṛṛu tantaranu ṛinone mamal᷊iwutta soa udde paapitu tantal᷊anna manga imam mattiuppa trompeta.

⁵Wua'udde manga imam mattiuppa trompene ringannu tingikke apan mal᷊o'enga. Aroddi yamiu naaringikka tingikke apan mal᷊o'engnga udde, tantara sarangkanambone ṛinone maggio ringannu ruddallu'a, ne darandungu soa udde sarun maṛṛa'a. Ana see i yamiu sarangkanambone lapiddu sumutta su soa udde.”

⁶Ne i Yosua namago manga imam, wuṛṛu nabbisara, “Pasante Wantalu Pa'aire udde; siri pitu su wallati yamiu ṛinone umamatta su saruanne wuṛṛu uaapiddu trompeta.”

⁷Ana see i Yosua nandolokku tantarane mabbarissa mamal᷊iwutta soa udde, su monane warisannu mandariaga apan u'amatta nalliu ṛoro Wantalu Pa'aire MAWU.

⁸Wuassu parentan Yosua, inaite warisannu mandariaga su monane nalliu ṛoro manga imam mattatiuppa trompeta, tatantalongannu manga imam apan uapasanna Wantalu Pa'aire, wua'ude niuddusu warisannu mandariaga su liudde. Tantal᷊anna i mangitou u'amatta, trompetta sidutu tattiupanna.

¹⁰Anambon tantara buatte niparentanna tawe iapahahio wuṛṛu tawe iapahahatto, amungkangu i Yosua taambe nandolokka.

¹¹Ete aroddi i Yosua nandolokku tantarane mangapiddu Wantalu Pa'aire namal᷊iwutta soa udde paassa, wua'udde nabelengnga su paddasananna, wuṛṛu nanaṛṛabi isudde.

¹²Tiṛṛabbine marua'allo atonna, i Yosua napu'o na see su aruane manga imam wuṛṛu tantara nabbarissa namal᷊iwutta soa udde ere lai su atokke allo paarorone; dorone warisannu mandariaga su monane, wua'udde siri pitu imam matatiupa trompeta, tatantuṛṛutannu manga imam apan uapasanna Wantalu Pa'aire, wuṛṛu pangudusanne warisannu mandariaga liudde. Tantal᷊anna udde trompeta sidutu tattiupanna.

¹⁴Su allo aruane udde, i mangitou namal᷊iwutta soa paassa wua'udde nabelengke su paddasananna. Ete arodde niola'i mangitou miallo-miallo sulal᷊ummu annumu allo al᷊annune.

¹⁵Su allo appitune i mangitou napu'o marua'allo su tempo matannallo wakkute sumapputa, ana see nabbarissa paapitu namal᷊iwutta soan Yerikho ringannu olange apan uasul᷊ungnga. Tumba'u su allo appitune i mangitou namal᷊iwutta soa udde paapitu anambone.

¹⁶Su appitune namal᷊iwutta, aroddi manga imam nattiuppa trompeta, i Yosua namarenta anambon tantara iapahahio. I Yosua nabbisara, “MAWU buatte nanantilu soa indi si yamiu!

¹⁷Ahewallu soa ma'oman sara lal᷊oṛṛone ṛinone ṛimunsaanna tawe lambene maola'a sambau sasamba su MAWU. Tumba'u i Rahab wawine masandaga udde wuṛṛu lal᷊oṛṛon bal᷊ene niwala wiakka, ana waugu i tou buatte nantul᷊ungngu matataṛṛaso'on kite.

¹⁸Imbaṛṛanga manganu saran sambau wuassu anambon saranapa apan ṛinone ṛimunsaanna. Amungkangu i yamiu manganu, paddasanannu Israel sarun aṛṛiaannu asasilaka wuṛṛu asasusa.

¹⁹Anambon saranapa sal᷊a'a, wul᷊awanna, witu'a wuṛṛu atta'a ṛinone iṛṛae ionggola su MAWU, wuṛṛu iaddo su tampa pangangadoannu pussa'a MAWU.”

²⁰Ana see manga imam nattiuppa trompene. Wuṛṛu aroddi manga taumatan Israel naaringikka tingikku trompeta udde, i mangitou hinumio ma'ikka-ikkata, ana see darandungu soan Yerikho naṛṛa'a. Anambon tantaran Israel lapiddu niumawitta, wuṛṛu sinumutta su soa udde ana see nangaṛṛote.

²¹Sarangkanambone apan sulal᷊ummu soa udde, timmade dario'a, esakka wawine, nipaten hal᷊ele. Al᷊awo'u winatanga sapi, domba wuṛṛu keledai lai nipate.

²²Su ruan katou apan buatte naola'a matataṛṛaso'o, i Yosua nabbisara, “Roote su wal᷊en bawine masandaga udde, wuṛṛu apira'e i tou sumabbanga suadio'a ringannu amonanne ere buatte pina'iren kamiu si tou.”

²³Ne ruan katou matataṛṛaso'o udde inaite, wuṛṛu nangapiddi Rahab wuṛṛu hagurangnge, see lai tuṛṛa-tuṛṛange wuṛṛu ṛuangannu amonanne apan baine. Anambon amonanni Rahab udde wuṛṛu manga allange niapidda su liudde su tampa apan mal᷊annaba marani paddasanannu Israel.

²⁴Wua'udde tantara Israel nanutungnga ahewallu soa udde su sambau ringannu lal᷊oṛṛone sulal᷊umme na'oman sara nasue, nallambe manga saranapa wul᷊awanna, sal᷊a'a, witu'a wuṛṛu atta'a. Manga saranapa udde nianu mangitou wuṛṛu niapidda su tampa pangangadoannu darotongnga pussa'a MAWU.

²⁵Arawe i Rahab wawine masandaga udde ringannu amonanne niwalan Yosua, wiakka, ana waugu i tou buatte nantulungu ruan katou matataṛṛaso'o apan nirolokki Yosua watukku Yerikho. (Na'oman sara allo indi papapulunni Rahab ta'e uatana'a su Israel.)

²⁶Su tempo udde i Yosua napaasabangu sasingadda indi, “Suapan isai apan pia apulu mapararisikku apia soan Yerikho indi, sarun aṛṛinoannu wawontogu MAWU. Isai apan mangaddon rapappake sarun awul᷊iannu ana'a pahul᷊une wuṛṛu isai apan mangele manga ngarane sarun awul᷊iannu ana'a ṛembonne.”

²⁷MAWU uaṛundinganna si Yosua, wuṛṛu aranni Yosua tinumelengke su ahewallu wanua udde.