Read Talaud YOSUA 7 Bible Online

YOSUA 7 - Talaud bible

YOSUA 7

¹MAWU buatte namarenta su walahannu Israel manungku wuassu al᷊awo'u saranapa su soan Yerikho apan ṛinone tutunganna, saran sambau imbaṛṛanga anuanna. Arawe parenta udde tawe niraringiṛṛana. Sangkatou esakka aranne i Akhan nilumawanna parenta udde, na'oman sara MAWU nasa'u su ṛuangannu Israel. (Iamangi Akhan aranne i Karmi wuṛṛu iupunge aranne i Zabdi wuassu ṛuanganni Zerah sulal᷊ummu ṛuanganni Yehuda.)

²Su tempo udde i Yosua nandolokku siri piran katou wuassu Yerikho watukku Ai, eteudde sambau soa su samba'a ra'in Betel, maranin Bet-Awen. Manga taumata udde nirolokka niapaparikissa wanua udde. Napawe i mangitou buatte na'ola'a manara udde,

³i mangitou nabelenga wuṛṛu nabbal᷊o si Yosua. I mangitou nabbisara, “I ite salaiwe lasa'e inai mamangalo Ai. Pandolokke manga darua ara'e tallu ṛiwu su atoune. Arie paddoloṛṛa'a abbi tantara inai mapapangalo, ana waugu soa udde addio'a.”

⁴Nariaddi inai mamangalo soa udde tumba'u tallu ṛiwu su atoune, arawe i mangitou sinumoṛṛota.

⁵Manga taumatan Ai nangenggena si mangitou wuassu ngara pasallangannu Soan Ai, na'oman sara leta'u Syebarin, ana see iraṛṛangngo namate tallu pul᷊o annumma su atoune su wallati mangitou su welen wuidda. Ne manga taumatan Israel sussinggawangke wuṛṛu matta'utta.

⁶I Yosua wuṛṛu manga piaṛṛa'u ṛuangannu Israel mangke massusa na'oman sara i mangitou nanggesa'a laubbi mangitou, wuṛṛu su al᷊o'engngu allo maddatingu ṛabbi i mangitou u'al᷊intudda su saruannu Wantalu Pa'aire MAWU ringannu nangaddon awu su pua mangitou maola'a sambau tatiala massusa.

⁷I Yosua nabbisara su MAWU, “Oh Ruata MAWU'U! Anio I'o nangapiddi yami su samba'an Yordan indi? Apa manantili yami su manga taumatan Amori? Tadea'u yami mate? Mappianne yami matana'a poiaroddi, su samba'an Yordan!

⁸Oh MAWU! Seetti yami buatte nangenggena manga taumatan Israel. Orassa indi apa ṛinone ta'u iwisara?

⁹Taumatan Kanaan wuṛṛu anambon taumata waine su leta'a indi sarun maaringikka olangnge udde. I mangitou sarun mamangalo wuṛṛu mamate si yami sarangkanambone! Ana see apa sarun olaannu tadea'u I'o sidutu a'addatanna?”

¹⁰MAWU sinumimbakka si Yosua, “Apu'ote! Tawe gunane i'o u'al᷊intudda su leta'a!

¹¹Taumatan Israel buatte na'ola'a rosa. I Ya'u buatte namarenta tadea'u i mangitou sidutu uaagasa pa'aire su wallati mangitou wuṛṛu i ya'u, arawe i mangitou nilumawanna! Manga saranapa apan ṛinone tutunganna buatte nianu mangitou. I mangitou manna'o wuṛṛu namunin saranapa udde su wallatu saranapa mangitou tadea'u tawe asingkatanna.

¹²Ana waugu udde i mangitou tawe naataṛṛanga sumaruanna seetta. I mangitou nienggenannu seetta ana waugu i mangitou sassane lai niaṛṛiaannu ṛuumanna pateanna. I Ya'u madirite tumantalongnga si yamiu lai, amungkangu manga saranapa apan tawe wotongnge anuanna udde taambe nitutunga.

¹³Orassa indi darisikke, Yosua! Waresite naungngu taumatan Israel wuṛṛu doloṛṛa'e i mangitou pandiahi tiṛṛabbi, ana waugu i Ya'u MAWU Ruatan Israel sarun mamasingkattu indi si mangitou: ‘Ei manga taumatan Israel! Manga saranapa apan buatte Ta'u niapaatutunga si yamiu, sambageanganna udde ta'e pia si yamiu. Tantal᷊anna i yamiu taambe nandammen manga saranapa udde, i yamiu tawe aaroopa seetta!’

¹⁴Ana waugu udde, i Yosua, wal᷊oa'a si mangitou manungku tiṛṛabbi marua'allo i mangitou sarun parikisanna passambalahanna. Amungkangu i Ya'u manta'en ṛuanganna sambau, anambon amonanna sulal᷊ummu ṛuanganna udde ṛinone umamatta amonanna ṛingannu amonanna. Wuṛṛu amungkangu i Ya'u manta'en amonanna sambau, anambon alahanna sulal᷊ummu amonanna udde ṛinone umamatta ual᷊al᷊ol᷊ossa alahanna ṛingannu alahanna. Wua'udde amungkangu i Ya'u manta'en bal᷊e sambau, suapan taumata sulal᷊ummu wale udde ṛinone umamatta passangkatou.

¹⁵Ana see taumata apan nita'e wuṛṛu nasemakke uaraddo manga saranapa apan isassingadda udde ṛinone insueanna tutunganna su sambau ringannu laloṛṛon bal᷊ene wuṛṛu al᷊awo'u saranapa apan tatahuananne; ana waugu ete i tou apan nilumawanna pa'aire wuṛṛu na'ola'a al᷊al᷊eo wahewalla su pattangannu taumatan Israel.”

¹⁶Tiṛṛabbine marua'allo atonna, i Yosua nandolokku taumatan Israel inai watukku saruanne, passaṛṛuanganna, ne ete ṛuanganni Yehuda niata'eanne.

¹⁷Ana see Yosua nandolokku ṛuanganni Yehuda inai watukku saruanne, passangkamonanna, wuṛṛu ete ṛuanganni Zerah niata'eanne. Wua'udde ṛuanganni Zerah nirolokka inai watukku saruanne, ual᷊al᷊ol᷊ossa passangkamonanna, laloṛṛon bal᷊en Zabdi niata'eanne.

¹⁸Wua'udde Yosua nandolokku laloṛṛon bal᷊en Zabdi inai watukku saruanne, passangkatou; ne i Akhan, ana'i Karmi, pulunni Zabdi niata'eanne.

¹⁹I Yosua nabbisara si Akhan, “Ana'u, panga'ute wuṛṛu wal᷊oa'e uahahati isindi su saruannu MAWU Ruatan Israel, sarangkanambone apan buatte niolangu. Wal᷊oa'e si ya'u, arie pabbunia'a.”

²⁰“Atonna,” unni Akhan, “I ya'u buatte na'ola'a rosa susaruannu MAWU, MAWU Ruatan Israel. Ete indi ta'u niola'a:

²¹Su wallatu manga saranapa apan niapiddi ite, i ya'u naasilo sambau juba apan mapia atonna, niola'a su Babilonia, wuṛṛu lai sal᷊a'a awakkane iraṛṛangngo dua kilo, wuṛṛu sambua wul᷊awanna satenga kilo pia lebbene. I ya'u ma'apulu atonna manga saranapa udde, ne ta'u nianu wuṛṛu niwuni sulal᷊ummu leta'a su rasangku: sal᷊aane niaddo al᷊iu wowane.”

²²Ana see mal᷊iha-l᷊ihakka i Yosua nandolokku taumata watukku rasanni Akhan. Nasemakke manungku manga saranapa apan isassingada udde sarangkanambone uaraddo poiaroddi, niwuni sulal᷊ummu leta'a sal᷊aane niaddo al᷊iu wowane.

²³I mangitou nanganu manga saranapa udde wuṛṛu niapidda ringanni Yosua wuṛṛu su anambon taumatan Israel. Ana see manga saranapa udde niaddo su saruannu MAWU.

²⁴Wua'udde i Yosua wuṛṛu anambon ṛuangannu Israel nanametta si Akhan, wuṛṛu i tou niapidda watukku Wawal᷊annu Asasusa su sambau ringannu al᷊aṛṛanange, sapi, keledai, domba, rasanna wuṛṛu al᷊awo'u saranapa tatahuananne wuṛṛu sal᷊a'a, juba wuṛṛu wual᷊awanna apan nita'one.

²⁵Ana see i Yosua nabbisara si Akhan, “Anio i'o mandantan asasusa si ite? Orassa indi MAWU sarun mandatan asasusa si'o!” Ana see taumatan Israel nanuntungu watu si Akhan suadio'a ringannu laloṛṛon bal᷊ene na'oman sara nate. Anambon saranapa pussaane, wuṛṛu manga saranapa nita'o nasue nitutungnga.

²⁶Ana see tampa udde niomboanni mangitoun batu, wuṛṛu na'oman sara allo indi ta'e poiaroddi. Ana waugu udde tampa udde isassago Wawal᷊annu Asasusa. Ne nompo'e asasa'u MAWU.